ސަލާމަތީ ބާރުތަކުގެ އަގު ވައްޓާލުމަކީ ޣައްދާރުވުން: ސީސީ
3 މާރިޗު 2018 | ހޮނިހިރު 13:57ސީސީ މިމޭރުމުން ވާހަކަ ދެއްކެވީ މިސްރުގެ ސަލާމަތީ ބާރުތަކުން ހިންގާފައިވާ ޖަރީމާތަކުގެ މައްސަލަތަކެއް ބީބީސީއިން ފެންމަތިކުރުމާއި ވިދިގެން
މިސްރުގެ ރައީސް އަބްދުލްފައްތާޙް އަލްސީސީ
މިސްރުގެ ސަލާމަތީ ބާރުތަކުގެ އަގު ވެއްޓޭ ގޮތަށް ވާހަކަ ދެއްކުމަކީ ޤައުމަށް ޣައްދާރުވުން ކަމަށް މިސްރުގެ ރައީސް އަބްދުލް ފައްތާޙް އަލް ސީސީ ވިދާޅުވެއްޖެއެވެ.
އިނގިރޭސިވިލާތުގެ ބީބީސީއިން މިސްރުގެ ސަލާމަތީ ބާރުތަކުން ހިންގާ ލާއިންސާނީ އަމަލުތަކާއި ގުޅޭ ޕްރޮގްރާމެއް ތައްޔާރުކުރުމާއި ގުޅިގެން މިސްރު ސަރުކާރުގެ ފާޑުކިޔުންތައް ބީބީސީއަށް އަމާޒުވެފައިވާ މިދަނޑިވަޅުގައި ސީސީ ވިދާޅުވީ، މިސްރުގެ ސަލާމަތީ ބާރުތަކުގެ ސިފައިންނާއި ފުލުހުން ހަނގުރާމަވެރިންގެ އެތައް ހަމަލާއެއްގެ ޝިކާރަޔަކަށް ވެފައިވާ ކަމަށެވެ. އަދި އެބާރުތަކުގެ އަގު ވައްޓާލުމަށް ކުރާ މަސައްކަތް ސިފަކުރެވޭނީ އެންމެ މަތީ ދަރަޖައިގެ ޣައްދާރުވުމުގެ ގޮތުގައި ކަމަށް ސީސީ ވިދާޅުވިއެވެ. އަދި އެއީ ޚިޔާލު ފާޅުކުރުމާއި ބަސްބުނުމުގެ މިނިވަންކަމުގެ ތެރެއިން ހިމެނޭ ކަމެއް ނޫންކަމަށް ވެސް ސީސީ ވިދާޅުވިއެވެ.
"އަޅުގަނޑު މިމަޤާމުގައި ހުއްޓާ އެއްވެސް މީހަކަށް ސަލާމަތީ ޚިދުމަތްތަކުގެ އަގު ވައްޓައެއް ނުލެވޭނެ،" ސީސީ ވިދާޅުވިއެވެ.
ސީސީ މިވާހަކަ ދައްކަވާފައި މިވަނީ ދޮގު ޚަބަރާއި ތުންތުންމަތިން ދެކެވެމުންދާ ވާހަތައް ޝާއިއުކުރާ މީޑިއާތަކާއި މެދު ފިޔަވަޅު އަޅާނެކަމުގެ އިންޒާރު މިސްރުގެ ސަރުކާރުން ދިންތާ އެއް ދުވަސްފަހުންނެވެ . މިސްރުގެ ޕްރޮސިކިއުޓަރ ޖެނެރަލް ނަބީލް ސާދިޤް ވިދާޅުވީ މިފިޔަވަޅު އަޅުއްވަން ޖެހުނީ ދޮގު ޚަބަރު ފަތުރައިގެން ޤައުމީ ސަލާމަތަށް ނުރައްކާ ކުރުމަށް ބައެއް ފަރާތްތަކުން މަސައްކަތް ކުރާތީ ކަމަށެވެ.
ބީބީސީއިން ދެއްކި ރިޕޯޓާއި ގުޅިގެން މިސްރުން ކަންބޮޑުވުން ފާޅުކުރި ނަމަވެސް، ބީބީސީއިން ބުނީ އެރިޕޯޓަކީ ސައްހަ ރިޕޯޓެއް ކަމަށާއި، ބީބީސީގެ ވިސްނުން ބަދަލުނުކުރާނެ ކަމަށެވެ.
ސަލާމަތީ ބާރުތަކުގެ ދިފާޢުގައި ސީސީ ވާހަކަފުޅު ދެއްކެވިއިރު، އެމަނިކުފާނަކީ މިސްރުގެ ސިފައިންގެ ކުރީގެ އިސްވެރިޔާއެވެ. އަދި 2013ވަނަ އަހަރު ސީސީ ވެރިކަމަށް ވަޑައިގަތީ އޭރު މިސްރުގައި ހުންނެވި އިންތިޚާބީ ރައީސް މުޙައްމަދު މުރްސީގެ ވެރިކަން އަސްކަރިއްޔާއިން ގެނައި ބަޣާވާތެއްގައި ވައްޓާލުމަށްފަހުއެވެ.
