މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ވީމީޑިއާ ހަތަރު ލައްކަ ރުފިޔާ އިން ޖޫރިމަނާ ކުރުމާއި ގުޅިގެން، އެ ފައިސާ ދެއްކުމަށް "ހަނގާ ފަންޑު ފޮށި" ގެ ނަމުގައި ފަންޑު ފޮށްޓެއް ބަހައްޓައިފި އެވެ.
ބްރޯޑްކޮމް އިން އެކުންފުނި ހަތަރު ލައްކަ ރުފިޔާ އިން ޖޫރިމަނާ ކުރިކަން އެންގުމާއެކު، ފަންޑު ފޮށްޓެއް ބެހެއްޓުމަށް ނިންމީ ޖޫރިމަނާ ފައިސާ ދެއްކުމުގައި އެހީތެރިކަން ފޯރުކޮށްދިނުމަށް ބޭނުންވެ، ގިނަ ބަޔަކު އެކަމަށް އެދެމުންދާތީ ކަމަށެވެ.
ހެޔޮއެދޭ ފަރާތްތަކަށް ފައިސާ ޖަމާކުރެވޭ ގޮތަށް ވީމީޑިއާގެ "ހަނގާ ފަންޑު ފޮށި" ބަހައްޓާފައިވަނީ ސޯސަން މަގުގައި ހުންނަ ވީމީޑިއާގެ އިމާރާތުގައެވެ. މީގެ އިތުރުން ފަންޑު ފޮށި މާލޭގެ އެކި ސަރަހައްދުތަކާއި، އަތޮޅުތެރޭގެ ބައެއް ރަށްރަށުގައިވެސް ބަހައްޓާނެ ކަމަށް ވީމީޑިއާ އިން މައުލޫމާތު ދެއެވެ.
މީގެ އިތުރުން ރާއްޖޭގެ އެކި ކަންކޮޅުތަކުން އިންޓަރނެޓް ބޭންކިންގ މެދުވެރިކޮށް ފަންޑަށް ފައިސާ ޖަމާކުރުމަށް ބޭނުންވާ ފަރާތްތަކުގެ ތެރެއިން ދިވެހި ރުފިޔާ އަދި އެމެރިކާ ޑޮލަރުން ފައިސާ ޖަމާކުރުމަށް ހާއްސަ ދެ އެކައުންޓެއް ވީމީޑިއާ އިން ވަނީ ހަމަޖައްސާފައެވެ.
ވީމީޑިއާގެ ހަނގާ ފަންޑު ފޮށްޓަށް ބޭންކް އެކައުންޓް މެދުވެރިކޮށް ފައިސާ ފޮނުވަން ބޭނުންވާ ފަރާތްތަކުން ފައިސާ ޖަމާކުރުމަށް ހަމަޖައްސާފައިވާ ދެ އެކައުންޓަކީ:
- ދިވެހި ރުފިޔާ އިންނަމަ: 7704 281040 001
- އެމެރިކާ ޑޮލަރުންނަމަ: 7704 281040 002
ފަންޑު ފޮށި ބެހެއްޓުމަށް ބުރާސްފަތި ދުވަހުގެރޭ ވީމިޑިއާގައި ބޭއްވި ރަސްމިއްޔާތުގައި ފަންޑު ފޮށި ހުޅުވައިދެއްވާ ފަންޑަށް އެންމެ ފުރަތަމަ ފައިސާ ހަދިޔާ ކުރެއްވީ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު މުޙައްމަދު މުސްތަފާ އެވެ.
ވީމީޑިއާ ޖޫރިމަނާ ކޮށްފައިވަނީ ގުޅިފައިވާ ޕާޓީތަކުން މިދިޔަ އަހަރުގެ ޑިސެމްބަރު މަހުގެ އަށްވަނަ ދުވަހުގެ ރޭ ފ. މަގޫދޫގައި ބޭއްވި ޖަލްސާއެއްގައި މެންބަރު މުސްތަފާ ދެއްކެވި ވާހަކަފުޅުގައި ބޭނުންކުރެއްވި އެންމެ ބަހެއްގައި ހިފައިގެން ކަމަށާއި، މުސްތަފާ ބޭނުންކުރެއްވި އިބާރާތަކީ އަބުރު ރައްކާތެރިކޮށްދިނުމާއި ޚިޔާލުފާޅުކުރުމުގެ މިނިވަންކަމުގެ ޤާނޫނުގެ ދަށުން މީހެއްގެ އަބުރާ ބެހެވޭ ފަދަ އިބާރާތެއް ކަމަށް ބްރޯޑްކޮމް އިން ގަބޫލުކޮށްފައިވާތީ ކަމަށް ވީމީޑިއާ އިން ބުންޏެވެ.
ބްރޯޑްކާސްޓިންގ ކޮމިޝަނުން މިމައްސަލަ ބެލުމަށްފަހު، އަބުރު ރައްކާތެރިކޮށްދިނުމާއި ހިޔާލުފާޅުކުރުމުގެ މިނިވަންކަމުގެ ގާނޫނުގެ 10 ވަނަ މާއްދާގެ (ހ) ގެ އެއްވަނަ ނަމްބަރާއި އެގާނޫނުގެ 10 ވަނަ މާއްދާގެ (ބ) އަދި ބްރޯޑްކާސްޓް ކުރުމުގެ ސުލޫކީ މިންގަނޑުގެ ދެވަނަ ހަމައިގެ ދެވަނަ ނަމްބަރާއި ވީމީޑިއާ އިން ޚިލާފްވެފައިވާ ކަމަށް ބުނެއެވެ.
އެގޮތުން، އެޖަލްސާ ވީމީޑިއާގެ ވީޓީވީ އާ، ވީއެފްއެމް އިން ވަގުތުން ބްރޯޑްކާސްޓް ކޮށްފައިވާތީ، ވީޓީވީ ދެ ލައްކަ ރުފިޔާ އިން ޖޫރިމަނާކޮށް، ވީއެފްއެމް އިތުރު ދެ ލައްކަ ރުފިޔާ އިން ޖޫރިމަނާ ކުރުމަށް ބްރޯޑްކާސްޓިންގ ކޮމިޝަނުން ވަނީ ނިންމާފައެވެ. އެގޮތުން ޖުމްލަ ހަތަރު ލައްކަ ރުފިޔާގެ ޖޫރިމަނާ ފައިސާ 30 ދުވަހުގެ ތެރޭގައި ދެއްކުމަށް ވީމީޑިއާ އަށް ބްރޯޑްކާސްޓިންގ ކޮމިޝަނުން ވަނީ އަންގާފައެވެ.
ބްރޯޑްކާސްޓިންގ ކޮމިޝަނުން މީގެ ކުރިން ވަނީ، އަބުރު ރައްކާތެރި ކުރުމާއި ޚިޔާލު ފާޅު ކުރުމުގެ މިނިވަން ކަމުގެ ޤާނޫނުގެ ދަށުން ރާއްޖެޓީވީ ތިން ފަހަރެއްގެ މަތިން ޖޫރިމަނާކޮށްފައެވެ. އެގޮތުން ތިން ފަހަރެއްގެ މަތިން ޖުމްލަ 1.7 މިލިއަން ރުފިޔާ ޖޫރިމަނާގެ ގޮތުގައި ރާއްޖެޓީވީ އިން ބްރޯޑްކާސްޓިންގ ކޮމިޝަނަށް ދައްކާފައިވާއިރު، ޖޫރިމަނާ ފައިސާ ދެއްކުމަށް ރާއްޖެޓީވީ އިން ބެހެއްޓި ފަންޑަށް ހެޔޮ އެދޭ ފަރާތްތަކުން ވަރަށް ބޮޑު އެހީތެރިކަމެއް ފޯރުކޮށްދީފައިވެއެވެ.
