މިނިވަން މުއައްސަސާތަކުގެ ޒިންމާ އަދާކުރާ ތަނެއް ނުފެނޭ: ރިޔާޒު ރަޝީދު
ސުލައިމާނަކީ ގާބިލު ބޭފުޅެއް: ރިޔާޒު ރަޝީދު
މެމްބަރު ރިޔާޒު ރަޝީދު
ދިވެހިރާއްޖޭގައި އުފައްދާފައިވާ މިނިވަން މުއައްސަސާތަކުން އެކަށީގެންވާ ގޮތެއްގައި މަސައްކަތް ކުރަމުން ނުދާ ކަމަށް ވިދާޅުވެ، ސަރުކާރު ހިންގާ ޕީޕީއެމް ޕާލަމެންޓްރީ ގްރޫޕްގެ ނާއިބު ލީޑަރު ރިޔާޒު ރަޝީދު ފާޑު ވިދާޅުވެއްޖެއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ނެޝަނަލް އިންޓެގްރިޓީ ކޮމިޝަނުގެ މެމްބަރު ކަމަށް ކުރިން އިކްޝަންސް ކޮމިޝަނުގެ ރައީސްކަން ކުރެއްވި އަހުމަދު ސުލައިމާން އައްޔަރު ކުރެއްވުމަށް މަޖިލީހަށް ހުށަހެޅި ރިޕޯޓަށް ބަހުސް ކުރައްވަމުން ރިޔާޒު ވިދާޅުވީ މިނިވަން މުއައްސަސާތަކުން މިނިވަންކަމާ އެކު، ގާނޫނު އަސާސީ އާއި ގާނޫނާ އެއްގޮތަށް އަމަލުކުރުމަކީ ވަރަށް މުހިއްމު ކަމެއް ކަމަށާއި ނަމަވެސް އެކަން ފެންނަމުން ނުދާ ކަމަށެވެ.
"މިއަދު ހުށަހެޅިގެން މިދިޔައީ މިނިވަން މުއައްސަސާތަކުގެ ތެރެއިން އެއް މުއައްސަސާ އަށް ވުރެ ގިނަ މުއައްސަސާތަކުގެ އިންޓެގްރިޓީގެ ކަންތައްތައް ބަލާ ކޮމިޝަނަށް މެމްބަރު އައްޔަން ކުރުމުގެ މައްސަލަ. ފުލުހުންގެ މުއައްސަސާ އާއި އެފަދަ އެހެނިހެން މުއައްސަސާތަކުގެ ކަންކަން ބެލެހެއްޓުމަށް ވަރަށް މުހިއްމު މަސްއޫލިއްޔަތުތަކެއް ހަވާލުކޮށްފައިވާ މުއައްސަސާއެއް. މިމުއައްސަސާގައި ތެރެއިން ކަންތައްތައް ކުރިއަށް ގެންދާއިރުގައި މިކަމުގައި ހަވާލުވެފައި ތިބި މީހުންގެ ގާނޫނީ މަސްއޫލިއްޔަތު، އެފަރާތްތަކަށް ހަނދާންކޮށްދިނުމަކީ ރައްޔިތުންގެ މަޖިލީހުން ކުރަންޖެހޭ ކަމެއް. އަދި އެހެންވެގެން މިނިވަން މުއައްސަސާތަކާ ބެހޭ ދާއިމީ ކޮމެޓީއެއް ރައްޔިތުންގެ މަޖިލީހުގައި އޮންނަނީ. އެހެންވީމާ އެކޮމެޓީގެ ވެސް މަސްއޫލިއްޔަތެއް މިދެންނެވި މުއައްސަސާތަކުން ހިންގާ ކަންތައްތަކަކީ އެއީ ދިވެހިރާއްޖޭގެ ގާނޫނުއަސާސީއާ ގާނޫނާ އެއްގޮތްވާ ގޮތުގެ މަތިން ހިނގާތަންތަންކަން ކަށަވަރު ކުރުމަކީ،" ރިޔާޒު ވިދާޅުވިއެވެ.
ރިޔާޒު ވިދާޅުވީ ސުލައިމާނަކީ ރައްޔިތުންގެ ހާއްސަ މަޖިލީހުގައި ވެސް މަސައްކަތް ކުރެއްވި އަދި ދަންނަ ބޭފުޅެއް ކަމަށެވެ.
"ސުލައިމާނަކީ އިލެކްޝަންސް ކޮމިޝަނުގެ ރައީސް ކަމުގެ މަގާމު ވެސް އަދާކުރެއްވި ބޭފުޅެއް. ނޭޝަނަލް އިންޓެގްރިޓީ ކޮމިޝަނުގައި ކުރިން ހުންނެވި ރައީސް ކަންކަން ކުރެއްވި ގޮތް ރައްޔިތުންނަށް އެނގޭ. ކަންކަން ހާސިމް ކުރުމަށްޓަކައި ގާނޫނުގެ އިމުގެ ތެރެއިން ކަންކަން ކުރުމަކީ ވަރަށް މުހިއްމު ކަމެއް. ތިމާ ބޭނުންވާ ކަންތައްތައް ނުކުރެވުނީމައި އެކަމާ ބެހޭ ގޮތުން ކަންކަން ފާޅުކުރަންޖެހޭނީ ސޯޝަލް މީޑިއާގައެއް ނޫން. ކަންކަމާ ހަވާލުވެތިބޭ މީހުންގެ އެކަމަކާ ގުޅުންހުރި ފަރާތްތަކާ ބައްދަލުކޮށް މައްސަލަ ހައްލުކުރުމުގެ ކެޕޭސިޓީ ހުންނަންޖެހޭނެ. ދައުލަތުގެ ސިއްރު ހިފެހެއްޓުމާއި ސިއްރު މައުލޫމާތު ހޯދުމާއި އަދި ތަހުގީގު ކުރުމަކީ ގާނޫނުތަކާ އެއްގޮތަށް ކުރަންޖެހޭ ކަމެއް. ސުލައިމާނަކީ އަޅުގަނޑުމެން އެންމެންވެސް ދަންނަ މިކަން ކުރުމުގެ ގާބިލްކަންހުރި ފަރާތެއް. އަޅުގަނޑު އުއްމީދު ކުރަނީ އެކޮމިޝަނުގެ މަސައްކަތް ކުރިއަށް ވުރެ ހަލުވިވާނެ ކަމަށް،" ރިޔާޒު ވިދާޅުވިއެވެ.
މީގެ އިތުރުން ރިޔާޒު ވަނީ ގާނޫނުއަސާސީގެ ދަށުން އުފައްދާފައި ހުރި ކޮމިޝަންތަކުގެ ޒިންމާ އަދާކުރުމަށް އުނިވަނީ ކޮން ކަމެއްތޯ ރިޔާޒް ސުވާލު އުފައްދަވާފައެވެ. އޭނާ ވިދާޅުވީ ދައުލަތުން ވަރަށް ބޮޑެތި ހަރަދުތަކެއް މުއައްސަސާތަކަށް ކުރަމުން އަންނަ އިރު، އެ ބަޔަކާ ހަވާލުކޮށްފައިވާ މަސްއޫލިއްޔަތެއް އަދާކުރާ ނަމަ، ގައުމު ދާނީ ރަނގަޅަށް ކަމަށެވެ.
ރިޔާޒު ވިދާޅުވީ މިއަހަރަކީ ރިޔާސީ އިންތިހާބު އޮންނަ އަހަރަށް ވުމާ އެކު، ދުނިޔޭގެ އެތައް ބައެއްގެ ކަޅި ރާއްޖެއާ ދިމާލަށް ހުއްޓިގެންދާނެ ކަމަށެވެ. އެހެންވެ، މުއައްސަސާތައް ހޭލައި ތިބެ، ކަންކަން އަދުލުވެރިކަމާ އެކު ކުރަން ޖެހޭ ކަމަށް ވެސް ރިޔާޒް ވިދާޅުވިއެވެ.
