ވިސާ ކަންތަކުގައި ސަރުކާރަށް ތަކުރާރުކޮށް މެއިލްކުރިން، ޖަވާބެއް ނުލިބުނު: ލޯ އޭޝިއާ

ވިސާގެ ނުނަގައި ރާއްޖެއައިކަމަށް ބުނެ ވެލާނާ އިންޓަނޭޝަނަލް އެއަރޕޯޓުގައި ބަންދުކޮށް، ޑިޕޯޓްކޮށްލި ލޯ އޭޝިއާގެ ވަފުދުގެ ބޭފުޅުން ވިސާގެ ކަންތައްތައް އޮންނަ ގޮތް އޮޅުން ފިލުވުމަށް އިމިގްރޭޝަނަށް ފޮނުވި މެއިލްތަކަށް ޖަވާބު ނުލިބުނުކަމަށް އެޖަމާޢަތުން ބުނެފިއެވެ.

އޭޝިއާ ސަރަހައްދުގެ ގާނޫނީ ވަކީލުންގެ ޖަމިއްޔާތަކުގެ އެންމެ އިސް ފަރާތުގެ ގޮތުގައި ޤާނޫނީ ބޭފުޅުން ބަލާ ލޯ އޭޝިއާގެ ރައީސް ކްރިސްޓޮފަރ ލިއޯން އިސްވެ ހުންނަވައި ރާއްޖެއަށް ވަޑައިގެންނެވި ވަފުދުގެ ބޭފުޅުން ޑީޕޯޓްކޮށްލުމާއި ގުޅޭ ގޮތުން، އެކަމާއި ކަންބޮޑުވުން ފާޅުކުރައްވައި ލިއޯން ނެރުއްވި ބަޔާނެއްގައި ވިދާޅުވީ އިމިގްރޭޝަނުން ޖަވާބެއް ނުލިބުމުން ފޮރިން މިނިސްޓްރީއަށްވެސް މެއިލްކުރިކަމަށެވެ. އަދި ފުރަތަމަ ކުރި މެއިލްއަށް ޖަވާބުދީ، ލޯއޭޝިއާގެ ވަފުދުގެ ބޭފުޅުންނަށް ބޭނުންވާ މައުލޫމާތު ފޮރިން މިނިސްޓްރީގެ އޭޝިއާ ޑޕާޓްމަންޓުން ފޯރުކޮށްދޭނެކަމަށް ފޮރިން މިނިސްޓްރީއިން ބުނިކަމަށާއި، އެހެން ނަމަވެސް ފަހުން ޚަބަރެއް ނުވާނަކަމަށް ލިއޯން ވިދާޅުވިއެވެ.

ފޮރިން މިނިސްޓްރީއިންވެސް އަދި އިމިގްރޭޝަނުންވެސް ޖަވާބެއް ނުލިބުމުން، އެޖަމާޢަތުގެ ވަފުދެއް ރާއްޖެއަށް ޓޫރިސްޓް ވިސާގައި ދަތުރުކުރާނެކަމުގެ މައުލޫމާތު ކަމާއި ބެހޭ ފަރާތްތަކަށް ފޮނުވިކަމަށާއި، ރާއްޖެއަށް އައިސް، އިމިގްރޭޝަނުގައި އެބޭފުޅުންގެ ދަތުރުގެ ބޭނުމުގެ ވާހަކަ ދެންނެވިކަމަށް ލިއޯން ވިދާޅުވިއެވެ.

ބޭރުގެ ޖަމާޢަތްތަކަށް ރާއްޖޭގެ ހާލަތުގެ ބަލަން އައުމުގެ ދައުވަތު ސަރުކާރުން ދިނުމަށްފަހު، ސަރުކާރުން ކަންތައް ކުރިގޮތާއިމެދު ލޯއޭޝިއާއިން ވަނީ ކަންބޮޑުވުން ފާޅުކޮށްފައެވެ. އަދި ވަކި ފަރާތަކަށް ނުޖެހޭ، މިނިވަން ފަރާތަކުން ރާއްޖޭގެ ޤާނޫނީ ދާއިރާގެ މައުލޫމާތު ދުނިޔެއަށް ފޯރުކޮށްދިނުމަށް ސަރުކާރަށް ލިބުނު ފުރުސަތު ސަރުކާރުން ނަގާލާފައިވާކަން ލޯ އޭޝިއާއިން ފާހަގަކުރިއެވެ.

ރާއްޖެއަށް ވަޑައިގެންނެވި ލޯއޭޝިއާގެ ވަފުދުގައި ހިމެނިވަޑައިގަންނަވަނީ އެޖަމިއްޔާގެ ރައީސް ކްރިސްޓޮފާ ލިއޮން އާއި ކުރީގެ ރައީސް ޕްރަޝާންތު ކުމާރާއި އެ ޖަމިއްޔާގެ އެގްޒެކެޓިވް ކޮމެޓީގެ މެމްބަރު އުޕުލް ޖަޔަސޫރިޔާ އާއި ލޯ އޭޝިއާގެ ކަންޓްރީ ކައުންސެލަރު އަދި ސިންގަޕޫރުގެ ބާ އެސޯސިއޭޝަންގެ ރައީސް ގްރެގަރީ ވިޖެޔަންދުރަން އާއި އޮސްޓްރޭލިއާގެ ނިއު ސައުތު ވޭލްސްގެ ލޯ ސޮސައިޓީގެ ރައީސް ޑަގް ހަމްފްރޭސް އާއި، ޖަޕާނުގެ ބާ އެސޯސިއޭޝަންގެ މެންބަރު ޔަސުޝީ ހިގާޝިޒަވާ، މެލޭޝިއާގެ ހައި ކޯޓުގެ ކުރީގެ ފަނޑިޔާރު މުހައްމަދު އަރީފް އަދި ނިއު ސައުތު ވޭލްސްގެ ލޯ ސޮސައިޓީގެ މެންބަރު އަދި ލޯ އޭޝިއާގެ ސޮލިސިޓަ ކޭޓް ހިއުސަން އެވެ.

އިމިގްރޭޝަނުން އެބޭފުޅުން ރާއްޖެއަށް އެތެރެވުމަށް ހުއްދަ ނުދިނީ އެބޭފުޅުން ވަޑައިގެންނެވީ ޓޫރިސްޓް ވިސާގައި ކަމަށްބުނެއެވެ.

ލޯ އޭޝިއިން ރާއްޖެއަށް ވަޑައިގެންނެވި ވަފުދުގެ ބޭފުޅުން ގިނަ ފަރާތްތަކަކާއިއެކު ބައްދަލުވުންތައް ބޭއްވުމަށް އެޕޮއިންޓްމަންޓްތައް ހެދިއެވެ.