ތޫބާ މިނިވަންކުރުމަށް އަދާލަތު ޕާޓީގެ ނައިބު ރައީސް ގޮވާލައްވައިފި
އޭނާ ހައްޔަރުކުރީ ހޯމަ ދުވަހުގެ ރޭގެ މުޒާހަރާއިން
އަދާލަތު ޕާޓީގެ ޤައުމީ މަޖިލީހުގެ މެމްބަރު ތޫބާ ރަޝީދު
ފެބްރުއަރީ އެއްވަނަ ދުވަހު ދިވެހި ރާއްޖޭގެ ސުޕްރީމް ކޯޓުން އިއްވާފައިވާ ހުކުމް ތަންފީޒް ކުރުމަށް ދިވެހި ސަރުކާރަށް ގޮވާލުމުގެ ގޮތުން ސުލްހަވެރިކަމާއެކު މުޒާހަރާ ކުރަމުންދަނިކޮށް ފެބްރުއަރީ 26 ވަނަ ދުވަހުގެރޭ އަދާލަތު ޕާޓީގެ ޤައުމީ މަޖިލީހުގެ މެމްބަރު ތޫބާ ރަޝީދު ހައްޔަރުކޮށްފައިވާތީ، އޭނާ ވަގުތުން މިނިވަން ކުރުމަށް އަދާލަތު ޕާޓީގެ ނައިބު ރައީސް އަލީ ޒާހިރު ގޮވާލައްވައިފިއެވެ.
އަލީ ޒާހިރު ކުރެއްވި ޓުވީޓެއްގައި ވިދާޅުވީ ގާނޫނާއި ހިލާފަށް މީހުން ހިފާ ހައްޔަރުކުރުން ހުއްޓާލަން ޖެހޭ ކަމަށާއި އެ ޕާޓީގެ ހިތްވަރުގަދަ މެމްބަރު ދޫކޮށްލުމަށް ގޮވާލާ ކަމަށެވެ.
ތޫބާ ރަޝީދަކީ މިހާރު ހިނގަމުންދާ އިސްލާހީ ހަރަކާތުގައި ނުގުޑާފަދަ އަޒުމަކާއެކު އެންމެ ކުރީސަފުގައި މަސައްކަތްކުރައްވަމުން ގެންދަވާ ހީވާގި ބޭފުޅެއް ކަމަށް އެ ޕާޓީން ވަނީ ބުނެފައެވެ.
ތޫބާ ރަޝީދު ހައްޔަރުކުރުމަށް ފަހު މި ވަގުތު ބެހެއްޓިފައިވަނީ ދޫނިދޫ ޖަލުގައި ކަމަށް އަދާލަތު ޕާޓީން ބުނެއެވެ.
