ސަރުކާރުގެ މޫނުމަތި ރީތިކުރުމަށް މިފަހަރުވެސް ޚަރަދު ކުރަނީ އެމްއެމްޕީއާރުސީގެ ފައިސާ!
މިމަސައްކަތް ބެލާޑް ޕާޓްނަރސް އާ ހަވާލުކޮށްފައިވަނީ އެމްއެމްޕީއާރުސީން
ބެލާޑް ޕާޓްނަރސްގެ ރައީސް ބްރަޔަން ބެލާޑް
ރައީސް އަބްދުﷲ ޔާމީންގެ ސަރުކާރުގެ މޫނުމަތި ރީތި ކުރުމަށް ހަވާލުކޮށްފައިވާ އެމެރިކާގެ ލޮބީ ފަރމް, ބެލާޑް ޕާޓްނަރސް އަށް ޚަރަދު ކުރަނީ ރާއްޖޭގެ ފަތުރުވެރިކަން އިޝްތިހާރުކޮށް މާކެޓް ކުރުމަށް އުފައްދާފައިވާ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޮމްޕެނީ (އެމްއެމްޕީއާރުސީ) އިން ކަން ހާމަވެއްޖެ އެވެ.
އެމެރިކާގެ ފްލޮރިޑާ އަށް ނިސްބަތްވާ ލޮބީ ފަރމް އެއް ކަމަށްވާ ބެލާޑް ޕާޓްނަރސް އާއެކު ދިވެހި ސަރުކާރުން ހަދާފައިވާ އެއްބަސްވުމުގެ ކޮޕީ ވަނީ، އެމެރިކާގެ ފޮރިން އޭޖެންޓްސް ރެޖިސްޓްރޭޝަން އެކްޓްގެ ދަށުން ޖަސްޓިސް ޑިޕާޓްމަންޓްގެ ވެބްސައިޓްގައި ޝާއިއުކޮށްފައެވެ.
12 މަސް ދުވަހުގެ މުއްދަތަކަށް ދިވެހި ސަރުކާރުން ބެލާޑް ޕާޓްނަރސް އާ މިމަސައްކަތް ހަވާލުކޮށްފައިވަނީ މަހަކު ބައި ލައްކަ ޑޮލަރު (771،000 ރުފިޔާ) ގެ އަގަކަށެވެ.
ބެލާޑް ޕާޓްނަރސް އާ މިމަސައްކަތް ހަވާލުކޮށްފައިވަނީ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޮމްޕެނީ (އެމްއެމްޕީއާރުސީ) އިންނެވެ.
ފެބްރުއަރީ މަހުގެ 11 ވަނަ ދުވަހު އެކުލަވާލި މިއެއްބަސްވުމުގައި އެމްއެމްޕީއާރުސީގެ ފަރާތުން ސޮއި ކުރައްވާފައިވަނީ އެކުންފުނީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދެވެ. ބެލާޑް ޕާޓްނަރސްގެ ފަރާތުން ސޮއިކޮށްފައިވަނީ އެ ބެލާޑް ޕާޓްނަރސްގެ ރައީސް ބްރިއަން ބެލާޑެވެ.
މިއެއްބަސްވުމުގެ ދަށުން އެއް އަހަރު ދުވަހުގެ މުއްދަތަކަށް ކޮންމެ މަހަކު 50 ހާސް ޑޮލަރުގެ މަގުން، އަހަރަކު ހަ ލައްކަ ޑޮލަރު (9.25 މިލިއަން ދިވެހި ރުފިޔާ) ދިވެހި ސަރުކާރުން ޚަރަދު ކުރަންޖެހޭއިރު، އެފައިސާގެ އިތުރުން މިމަސައްކަތުގެ ތެރޭގައި ކުރަންޖެހޭ ދަތުރުތަކާއި، އެދަތުރުތަކާއި ގުޅުން ހުރި އެހެނިހެން ޚަރަދުތަކަށް ފައިސާ ދައްކާނީވެސް އެމްއެމްޕީއާރުސީ އިންނެވެ. ކޮންމެ މަހަކު ބިލް ކުރާ ގޮތަށް ހަވާލުކޮށްފައިވާ މިމަސައްކަތުގެ އަގަށްވާ ފައިސާ، ކޮންމެ މަހެއްގެ ފަނަރަ ވަނަ ދުވަހުގެ ކުރިން އެމްއެމްޕީއާރުސީ އިން ބެލާޑް ޕާޓްނަރސް އަށް ދައްކަންޖެހޭ ކަމަށް މިއެއްބަސްވުމުގައި ބަޔާންކޮށްފައިވެއެވެ.
ރާއްޖޭގެ ސިޔާސީ މަޝްރަޚް ހަލަބޮލިވެގެންދާ ކޮންމެ ދަނޑިވަޅެއްގައި ދިވެހި ސަރުކާރުގެ މޫނުމަތި ރީތި ކުރުމަށް ބޭރުގެ ޕީއާރް އަދި ލޮބީ އޭޖެންސީތަކަށް މީގެ ކުރިންވެސް ބޮޑެތި ޚަރަދުތަކެއް ކޮށްފައިވެއެވެ.
އެގޮތުން ރައީސް މުޙައްމަދު ނަޝީދުގެ މައްސަލާގައި އދ.ގެ ވޯކިންގ ގްރޫޕް އޮން އާބިޓަރީ ޑިޓެންޝަނަށް ޖަވާބުދާރީ ވުމަށް ޤާނޫނީ ލަފާ ހޯދުމަށް އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެއަރގެ އަނބިކަނބަލުން ޝެރީ ބްލެއަރގެ ލޯ ފާރމް، އޮމްނިއާ ސްޓްރެޓެޖީސް އާ ހަވާލުކޮށްފައިވެއެވެ. އޮމްނިއާ ސްޓްރެޓެޖީސް އާ އެމަސައްކަތް ހަވާލު ކުރުމަށްފަހު، މަސައްކަތުގެ އަގު ދައްކާފައިވަނީ އެމްއެމްޕީއާރުސީގެ ޚިޔާނާތުގެ މައްސަލާގައި ބޮޑެތި ތުހުމަތުތަކެއް ކުރެވިފައިވާ އެސްއޯއެފް ޕްރައިވެޓް ލިމިޓެޑްގެ އެކައުންޓުންނެވެ.
އެސްއޯއެފް އަކީ އެމްއެމްޕީއާރުސީ މެދުވެރިކޮށް ދައުލަތަށް ލިބެންޖެހޭ ގިނަ އަދަދެއްގެ ފައިސާ ޖަމާކޮށް، ދައުލަތާއި ސަރުކާރުގެ އިސް މަގާމުތަކުގައި ތިއްބެވި ބައެއް ފަރާތްތަކާއި، ސިޔާސީ ބައެއް ފަރާތްތަކާއި އަމިއްލަ ބައެއް ފަރުދުންގެ އެކައުންޓްތަކަށް ފައިސާ ފޮނުވުމުގެ މަސައްކަތް ހިންގާފައިވާ އަމިއްލަ ކުންފުންޏެކެވެ. އެމްއެމްޕީއާރުސީގެ ބޮޑު ޚިޔާނާތުން ހޯދާފައިވާ ފައިސާ، ކުރީގެ ނައިބު ރައީސް އަހުމަދު އަދީބާއި ގާތް ގުޅުމެއް އޮންނަ އެސްއޯއެފް އިން މެދުވެރިކޮށް ޖަމާކޮށްފައިވާ ފަރާތްތަކުގެ ތެރޭގައި ރައީސް އަބްދުﷲ ޔާމީން ހިމެނިވަޑައިގަންނަވައެވެ.
