ރިލްވާން ގެއްލުނު ރޭ ގަދަކަމުން ކާރަކަށް މީހަކު އަރުވައިގެން ދިޔަ ތަން ފެނިގެން ފުލުހުންނަށް ރިޕޯޓް ކުރި: ފުލުސް މީހެއް
ފުލުހުންނަށް ރިޕޯޓް ލިބުނީ ވެސް ރަތްކުލައިގެ ކާރެއްގައި ގެންދިޔަ ކަމަށް
ރިލްވާން ގެއްލުނު ރޭގެ ވީޑިއޯ ފުޓޭޖްތަކެއް -- ރާއްޖެއެމްވީ ފޮޓޯ
މިނިވަން ނިއުސްގެ ނޫސްވެރިޔާ އަހުމަދު ރިލްވާން އަބްދުﷲ ގަދަކަމުން ފޮރުވި ރޭ ހުޅުމާލޭގައި ކާރަކަށް ގަދަކަމުން މީހަކު އަރުވައިގެން ދިޔަ ކަމުގެ މައުލޫމާތު އާންމު މީހަކަށް ފެނިގެން އެވަގުތު ރިޕޯޓްކުރި ކަމަށް ފުލުހުންގެ އޮފިސަރަކު ކްރިމިނަލް ކޯޓުގައި ބުނެފިއެވެ.
ރިލްވާން ގަދަމުން ފޮރުވާފައިވާ ކަމަށް ބުނެ ދައުލަތުން ކޮށްފައިވާ ޓެރަރިޒަމްގެ ދައުވާއާ ގުޅިގެން ދެ މީހެއްގެ މައްޗަށް ހިންގާ ޝަރީއަތުގެ އަޑުއެހުމުގައި އާދިއްތަ ދުވަހު ހެކިބަސް ދިން އެކަކީ ރިލްވާން ވަގައް ނެގިއިރު ހުޅުމާލޭ ޕޮލިސް ސްޓޭޝަނުގައި މަސައްކަތްކުރާ ފުލުސް އޮފިސަރެއް ކަމަށްވާ ޔަމަން އަލީއެވެ. ރަތްކުލައިގެ ކާރަކަށް ގަދަކަމުން މީހަކު އަރުވައިގެން ދިޔަ ކަމުގެ މައުލޫމާތު2014 ވަނަ އަހަރުގެ އޯގަސްޓް މަހުގެ އަށް ވަނަ ދުވަހުގެ ރޭގެ ދަންވަރު އާންމު މީހަކު ގުޅާފައި ބުނި ކަމަށް އޭނާ ހެކިބަސް ދެމުން ވަނީ ބުނެފައެވެ. އަދި އެއާ އެކު އެ އެތަނަށް ދިއުމަށް ފުލުހުންގެ ދެ މީހަކަށް އޭނާ އެންގި ކަމަށާއި އަދި ރަތްކުލައިގެ ކާރެއް ފެނޭތޯ ބެލި ކަމަށް އޭނާ ބުންޏެވެ. ޔަމަން ބުނި ގޮތުގައި އެ މައުލޫމާތާ އެކު ވެސް ބެލީ ހުޅުމާލޭގައި ރަތްކުލައިގެ ހުރިހާ ކާރެއްގެ ނަމްބަރުތައް ނޯޓުކުރުމަށެވެ. އަދި ބުނީ ރަތްކުލައިގެ ގިނަ ކާރުތަކެއް ހުޅުމާލޭގެ އެކި ތަންތަނުން ފެނުނު ކަމަށާއި އެހެން ނަމަވެސް އެއިން އެއްޗެއް ބަލާ ޗެކްކޮށްފައިނުވާ ކަމަށެވެ.
ކާރަކަށް މީހަކު އަރުވައިގެން ގެންދަނިކޮށް ފެނުން ކަމަށް ފުލުހުންނަށް މައުލޫމާތު ދިން މީހާ ބުނާ ސަރަހައްދަކީ ރިލްވާން ދިރިއުޅޭ ފެލެޓް ކައިރި ކަމަށްވާ އިރު ހެކިބަސް ދިން ފުލުސް މީހާ ބުނީ އެތަނަށް ފުލުހުން ދިޔައިރު އެތަނުން ވަޅިއެއްވެސް ފެނިފައިވާ ކަމަށެވެ.
ރަތްކުލައިގެ ކާރުތަކެއް ފެނުން ނަމަވެސް އެ ކާރުތައް ޗެކް ނުކުރީ އެއީ އެތަނަށް ދިޔަ ފުލުހުންގެ އިހްތިސާސްގެ ތެރޭގައި ހިމެނޭ ކަމަކަށް ނުވާތީ ކަމަށް ބުނުމުން ގާޒީ ވަނީ އެކަން ނުކުރީ ކީއްވެތޯ އިތުރަށް ސާފުކޮށްފައެވެ. އެހެން ނަމަވެސް ފުލުސް މީހާ ހެކިބަސް ދެމުން އިތުރަށް ބުނީ އެއީ ކާރުތައް ތަޅުލާފައި ހުންނާނެތީ ޗެކް ނުކުރީ ކަމަށާއި އެކަމަކީ ތަހްގީގުކުރާ މީހުންގެ ޒިންމާއެއް ކަމަށެވެ.
ދައުވާ ލިބޭ ގ. ހިލްޓަން، އާލިފް ރައޫފާއި ގދ. ވާދޫ، ކަރަންކާގޭ، މުހައްމަދު ނޫރައްދީންގެ ވަކީލު ކުރި ސުވާލަކަށް ޖަވާބު ދެމުން ހެކިވެރިޔާ ބުނީ މައުލޫމާތު ދިން މީހާ ދީފައި ވަނީ ކާރަކަށް އަރުވައިގެން ގެންދިޔައީ އަންހެނެއް ކަމަށެވެ. އަދި އޭނާ ލައިގެން ހުރީ މަތިން ފެހިކުލައިގެ އަދި ތިރިން ރަތްކުލައިގެ އެއްޗެއް ކަމަށް ފުލުހުންނަށް ރިޕޯޓްކުރި މީހާ ބުނި ކަމަށް ވެސް ހެކިވެރިޔާ ބުންޏެވެ.
މިއަދު އިތުރަށް ހެކިބަސް ދިނީ ރިލްވާން ގޮވައިގެން ދިޔަ ކާރު ހުޅުމާލެއަށް ގެންދިޔަ ދޯނި ކަމަށް ބުނާ ދޯނީގެ ވެރިޔާ އަފީފު މުހައްމަދެވެ. ނަމަވެސް އޭނާ ބުނީ 2014 ވަނަ އަހަރުގެ އޯގަސްޓް މަހުގެ ކުރީ ކޮޅު އޭނާގެ ދޯނިން ކާރެއް ގެންދިޔަ ނަމަވެސް އެއީ ކޮން ކުލައެއްގެ ކާރެއް ކަން ބުނެދޭން ނޭނގޭ ކަމަށެވެ. ކާރެއް ގެންދިޔަ ކަން އެނގެނީ އެ ކާރު ގެންދިޔަ ލާރި އޭނާ އަށް ލިބުމުން ކަމަށެވެ. އަދި އެ ދޯނިން އޭގެ ކުރިން ވެސް އެކި ވެހިކަލްތައް އެކި ފަހަރުގެ މަތިން ހުޅުމާލެއަށް ގެންގޮސްފައިވާނެ ކަމަށް ވެސް ބުންޏެވެ.
ހެއްކެއްގެ ގޮތުގައި އޭނާ ދައުލަތުން ހުށަހެޅީ އޭނާގެ ދޯނިން އޯގަސްޓްމަހުގެ ކުރީ ކޮޅު ރަތްކުލައިގެ ކާރެއް ގެންގޮސްފައިވާކަން ސާބިތު ކުރުމަށް ކަމަށް ބުނެފައިވީ ނަމަވެސް އޭނާއަށް އެއީ ކޮންކުލައެއްގެ ކާރެއް ކަން ނޭނގޭ ކަމަށް ކޯޓުގައި ވެސް ބުނުމުން ދައުވާ ލިބޭ ވަކީލު ވަނީ އެކަން ފާހަގަކޮށްފައެވެ. ވަކީލު ވިދާޅުވީ ފުލުހުންނަށް ދީފައިވާ ބަޔާނުގައި ވެސް އެކަން ނޭނގޭ ކަމަށް ބުނެފައި ވަނިކޮށް ހެކީގެ ގޮތުގައި ހާޒިރުކުރުމުން އިތުރު ވަގުތުތަކެއް ދާ ކަމަށެވެ.
މި މައްސަލާގެ އަޑުއެހުމެއް މާދަމާއަށް ވެސް ވަނީ ތާވަލުކޮށްފައެވެ. އަދި މި ހަފްތާގައި ކޮންމެ ދުވަހަކު ވެސް އަޑުއެހުމެއް ބާއްވައިގެން މި މައްސަލަ އަވަހަށް ނިންމޭތޯ މަސައްކަތް ކުރައްވާނެ ކަމަށް މައްސަލަ ބައްލަވާ ގާޒީ އާދަމް އާރިފު ވަނީ ވިދާޅުވެފައެވެ.
ރިލްވާން ގެއްލުވާލާފައިވާ މައްސަލައިގައި ދައުލަތުން ކޮށްފައިވާ ދައުވާގައި ބުނެފައި ވަނީ، 2014 ވަނަ އަހަރުގެ އޯގަސްޓް މަހުގެ 8 ވަނަ ދުވަހުގެ ރޭ އަހުމަދު ރިލްވާން ދިރިއުޅޭ ފްލެޓް ކުރިމަތިން، ގަދަކަމުން ކާރަކަށް އަރުވައިގެން އޭނާ ފޮރުވާފައިވާ ކަމަށެވެ. މި ދައުވާގައި ހިމެނޭ ސ. ހުޅުދޫ އަތިރިއާގެ، މުހައްމަދު ސުއައިދު ރާއްޖެއިން ބޭރުގައި ހުރުމުން އޭނާގެ ބައި ކުރިއަކަށް ނުގެންދެއެވެ. އަދި ޝަރީއަތް ކުރެވޭ ދެ މީހުން ވެސް ތިބެނީ ދޫކޮށްލާފައެވެ.
