12 މެންބަރުންގެ ގޮނޑި ގެއްލުވާލައިފި ނަމަ އިތުރު ރައްޔިތުން ސަރުކާރާ ދެކޮޅަށް ތެދުވާނެ: މާރިއާ
23 ފެބުރުއަރީ 2018 | ހުކުރު 08:41ސުޕްރީމް ކޯޓުން އެ މެންބަރުންގެ ގޮނޑި ގެއްލުވާލާނެ ކަމަށް ވަނީ އަޑު ފެތުރިފަ
ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާއިގެ މެންބަރު އަލްއުސްތާޛާ މާރިއާ އަޙުމަދު ދީދީ
ސުޕްރީމް ކޯޓު މެދުވެރިކޮށް ރައްޔިތުންގެ މަޖިޅިހުގެ 12 މެންބަރުންގެ ގޮނޑި ގެއްލުވާލައިފިނަމަ، ރައީސުލްޖުމްހޫރިއްޔާ ޢަބްދުﷲ ޔާމީންގެ ސަރުކާރުގެ ބޭއިންސާފާއި އަނިޔާއާ ދެކޮޅަށް ތެދުވާ ރައްޔިތުން ގިނަވާނެ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާއިގެ މެންބަރު އަލްއުސްތާޛާ މާރިއާ އަޙުމަދު ދީދީ ވިދާޅުވެއްޖެއެވެ.
މާރިއާ ކުރެއްވި ޓްވީޓެއްގައި ވިދާޅުވީ، މި ފެބްރުއަރީ މަހުގެ 27 ވަނަ ދުވަހު ސުޕްރީމް ކޯޓުން ރައްޔިތުންގެ މަޖިލީހުގެ 12 މެންބަރެއްގެ ގޮނޑި ގެއްލުވާލާނެ ކަމަށް ރައީސް ޔާމީން، ޕީޕީއެމްގެ ޕާލިމެންޓްރީ ގްރޫޕްގެ ބޭފުޅުންގެ ގާތުގައި ވިދާޅުވި ކަމަށް އަޑުފެތުރެމުންދާ ކަމަށެވެ.
އަދި އޭގެ ނަތީޖާއެއްގެ ގޮތުން ރައްޔިތުންގެ ހިތްތަކަށް ބިރުވެރިކަން ވަންނާނެ ކަމަށް ރައީސް ޔާމީން ހީފުޅުކުރެއްވި ނަމަވެސް، އެކަން އެގޮތަށް ހިނގައިފިނަމަ، އެމަނިކުފާނުގެ ސަރުކާރުގެ ބޭއިންސާފާއި އަނިޔާވެރިކަމާއި ދެކޮޅަށް ނުކުންނާނެ މީހުން ވަނީ ގިނަ ކަމަށް މާރިއާ ވިދާޅުވިއެވެ.
މާރިއާ މިފަދައިން ވިދާޅުވެފައިވާއިރު، ބުރާސްފަތި ދުވަހު ރައީސް ޔާމީން ވަނީ ޕީޕީއެމްގެ ޕާލިމެންޓްރީ ގްރޫޕްގެ ބޭފުޅުންނާއި ބައްދަލުކުރައްވާފައެވެ. އަދި ހަމަ ބުރާސްފަތި ދުވަހު ސުޕްރީމް ކޯޓުން ވަނީ ސަރުކާރުން އެ 12 މެންބަރުންގެ މަޤާމާއި ގުޅޭގޮތުން ހުށަހަޅާފައިވާ މައްސަލައެއް، ފެބްރުއަރީ 27 ވަނަ ދުވަހަށް ތާވަލް ކޮށްފައެވެ.
