10 އަހަރު ކުރީގެ މައްސަލައެއްގައި އޭސީސީ އިން ރައީސް މައުމޫނާ ސުވާލުކުރަން އުޅެފި
22 ފެބުރުއަރީ 2018 | ބުރާސްފަތި 11:25ސުވާލުކުރުމަށް މަސައްކަތް ކޮށްފައިވަނީ ވަކީލެއްގެ ޣައިރު ހާޒިރުގައި
ކުރީގެ ރައީސް މައުމޫން ޢަބްދުލްޤައްޔޫމް
ރައީސް މައުމޫންގެ ވެރިކަމުގެ ފަހު ދައުރުގައި ހިނަގާފައިވާ ބައެއް ކަންކަމާ ގުޅޭ މައްސަލައެއްގައި އެންޓި ކޮރަޕްޝަން ކޮމިޝަނުން ކުރީގެ ރައީސް މައުމޫން ޢަބްދުލްޤައްޔޫމާ ސުވާލުކުރުމަށް މަސައްކަތް ކޮށްފައިވާ ކަމަށް ރައީސް މައުމޫންގެ ވަކީލު، ޙުސައިން ޝަމީމް ވިދާޅުވެއްޖެއެވެ.
ބުރާސްފަތި ދުވަހު ޝަމީމް ކުރެއްވި ޓްވީޓެއްގައި ރައީސް މައުމޫނާ ހަވާލާދެއްވައި ވިދާޅުވީ، 2007 ވަނަ އަހަރުގެ މައްސަލައަކާ ގުޅިގެން އޭސީސީ އިން ރައީސް މައުމޫނާ ސުވާލުކުރުމަށް މަސައްކަތް ކޮށްފައިވާ ކަމަށެވެ.
ޝަމީމް ވިދާޅުވީ، ވަކީލެއްގެ ހާޒިރުގައި މެނުވީ އެފަދައިން ސުވާލު ނުކުރެވޭނެ ކަމަށާއި، އެ ޙައްޤު ރައީސް މައުމޫނަށް ވެސް ލިބިވަޑައިގެންފައިވާ ކަމަށެވެ.
އެންޓި ކޮރަޕްޝަން ކޮމިޝަނުން ޖިނާއީ އިޖުރާޢަތުގެ ޤާނޫނު ނުކިޔާކަމާ މެދު ކަންބޮޑުވެވަޑައިގަންނަވާ ކަމަށް ވެސް ޝަމީމް ވަނީ ވިދާޅުވެފައެވެ.
ރައީސް މައުމޫނާ ސުވާލުކުރުމަށް އޭސީސީ އިން މަސައްކަތްކޮށްފައިވާ އިރު 2007 ވަނަ އަހަރު އޭރުގެ ރިޔާސީ ގަނޑުވަރު، ތީމުގޭގެ ބައެއް ޚަރަދުތަކާ ގުޅޭ މައްސަލައެއް މީގެ ކުރިން، 2016 ވަނަ އަހަރު ވެސް އޭސީސީ އިން ވަނީ ބަލާފައެވެ. އެ މައްސަލައިގައި ރައީސް މައުމޫންގެ އާއިލާގެ ބައެއް ބޭފުޅުންގެ ބަޔާން ވެސް ނަގާފައިވެއެވެ.
އެ މައްސަލައިގައި ރައީސް މައުމޫންގެ ބަޔާނެއް ނެގުމަށް އެމަނިކުފާނަށް ފަސޭހަ ވަގުތެއްގައި އެމަނިކުފާނުގެ އަރިހަށް އޭސީސީގެ ޓީމެއް ދިއުމަށް، އެދުމުން ރައީސް މައުމޫން އޭރު ވަނީ އެމަނިކުފާނަށް ފަސޭހަފުޅު ވަގުތެއް ވެސް އެ ކޮމިޝަނަށް އަންގާފައެވެ. އަދި އެމަނިކުފާނަކީ އޭރު އެ މައްސަލައިގައި ތުހުމަތު ކުރެވޭ ފަރާތެއް ނޫން ކަމަށް ބުނެ، އެމަނިކުފާނުގެ އޮފީހަށް ގޮސް އޭސީސީން ވަނީ އެމަނިކުފާނުގެ ބަޔާނެއް ނަގާވެސްފައެވެ.
މަޢުލޫމާތު ލިބޭ ގޮތުގައި ރައީސް މައުމޫނަކީ އެ މައްސަލައިގައި ތުހުމަތު ކުރެވޭ ފަރާތެއް ނޫން ކަމަށް އޭސީސީން އޭރު ބުނި ނަމަވެސް މަޢުލޫމާތު ލިބޭ ގޮތުގައި އޭސީސީން މިހާރު އެ މައްސަލަ ބަލަމުންދަނީ އެމަނިކުފާނަކީ ތުހުމަތު ކުރެވޭ ފަރާތެއް ކަމަށް ބަލައިގެންނެވެ.
ރައީސް މައުމޫން ހައްޔަރުކޮށްފައިވަނީ ރާއްޖޭގައި ކުއްލި ނުރައްކަލުގެ ހާލަތު އިޢުލާނުކުރުމަށް ފަހު، ފެބްރުއަރީ 5 ވަނަ ދުވަހުގެރޭ ސިފައިންނާއި ފުލުހުން ހިންގި އަމަލުތަކެއްގެ ތެރެއިންނެވެ.
