ރައީސް އަބްދުﷲ ޔާމީން އަބްދުލްގައްޔޫމް އިއުލާން ކުރެއްވި 15 ދުވަހުގެ ކުއްލި ނުރައްކަލުގެ ހާލަތު މިވަނީ ނިމިފައި ކަމަށާއި އަދި އިތުރު ކުރުމަށް ހުށަހެޅި 30 ދުވަހުގެ ކުއްލި ނުރައްކަލުގެ ހާލަތު ގުޅޭގޮތުން ރައްޔިތުންގެ މަޖިލީހުން ފާސްކުރިކުރުން ބާތިލް ކަމަށް ރާއްޖޭގެ މަޝްހޫރު ގިނަ ގާނޫނީ ވަކީލުން ވިދާޅުވެއްޖެ އެވެ.

ކުއްލި ނުރައްކަލުގެ ހާލަތާމެދު ގާނޫނީ ވަކީލުންތަކެއް މ. ނުކޫޒުގައި ބޭއްވި ނޫސްވެރިންގެ ބައްދަލުވުމުގައި ވަކީލުން ވިދާޅުވީ ސަރުކާރުން އިއުލާންކުރި ކުއްލި ނުރައްކަލުގެ ހާލަތެއްކަމަށް ބުނެ ގަރާރުގައި ބުނެފައިވާ ކަންކަމަކީ ކުއްލި ނުރައްކަލުގެ ހާލަތެއް އިއުލާންކުރަން ގާނޫނުއަސާސީ ދަށުން އިއުލާން ކުރެވޭނެ ކަމެއް ނޫން ކަމަށެވެ. އަދި ގާނޫނުއަސާސީގައި ބުނާ އަސާސީ ބައެއް ހައްގުތަކަކީ ކުއްލި ނުރައްކަލުގައި ވެސް ނުހިފެއްޓޭ އަސާސީ ހައްގުތަކެއް ކަމަށް ބުނެފައިވާއިރުވެސް އެފަދަ ބައެއް ހައްގުތަކާއި ރައްޔިތުންގެ މަޖިލީހާއި ސުޕްރީމްގެ ކޯޓުގެ ބާރުތައް ހުފެހެއްޓުމަކީ އެގަރާރު އުފެދުމުގައި ވެސް ބާތިލް ކަންކަން ކަމަށެވެ.

އެހެންނަަމަވެސް، އެ ކުއްލި ނުރައްކަލުގެ ގަރާރު އިއުލާން ކުރުމަށްފަހު ދެންވެސް ގާނޫނުގައި އަމަލުކުރަންޖެހޭ އިޖުރާއަތިތައް ފުރިހަމަ ކުރުމެއްނެތި، ރައްޔިތުންގެ މަޖިލީހުން އެ ގަރާރު ފާސްކުރި ކަމަށްބުނާ ބުނުމަކީ ވެސް ބާތިލް ކަންކަންކަމަށް ގާނޫނީ ވަކީލުން ވިދާޅުވި އެވެ.

އެގޮތުން ކުއްލި ނުރައްކަލުގެ ހާލަަތު އިއުލާން ކުރާތާ 48 ގަޑިއިރުގެ ތެރޭގައި މަޖިލީހަށް ހުށަހެޅުމާއި 14 ދުވަހުގެ ތެރޭގައި މަޖިލީހުން އެ ގަރާރަށް ގޮތެއް ނިންމާފައިނުވުމާއި ކުއްލި ނުރައްކަލުގެ ހާލަތު ނިމެން މަދު ގަޑިއިތުރުކޮޅަށްވެފައިވަނިކޮށް ރައްޔިތުންގެ މަޖިލީހުން ޖަލްސާއެއް ބާއްވާ ނިންމި ނިންމުންތަކަކީ ބާތިލް ނިންމުންތަކެއް ކަމަށް ގާނޫނީ ވަކީލުން ވިދާޅުވި އެވެ.

އެ ނިންމުން ނިންމި ޖަލްސާއަކީ ގާނޫނާ ހިލާފަށް ބޭއްވި ޖަލްސާއެއްކަމަށް ގާނޫނީ ވަކީލުން ވިދާޅުވާ މައިގަނޑު ސަބަބަކީ ކުއްލި ނުރައްކަލުގެ ހާލަތަކީ ރައްޔިތުންގެ އަސާސީ ގިނަ ހައްގުތަކެއް ހިފަހައްޓާފައިވާ ކުއްލި ނުރައްކަލުގެ ހާލަތެއް ކަމަށް ވުމުން އެއީ ރައްޔިތުން އެއަށް އަމަލު ކުރުން ލާޒިމް އެއްޗެއް ކަމަށްވާއިރު، އެފަދަ އެއްޗަކަށް މަޖިލީހުގައި ވޯޓަށް އަހާ ޖަލްސާގައި މަޖިލީހުގެ މެމްބަރުންގެ ދެބައިކުޅަ އެއްބަޔަށްވުރެ މަދުނޫން އަދަދަކަށް މެމްބަރުން ހާޒިރުވެ ތިބެންޖެހޭކަމަށް ގާނޫނުއަސާސީގެ 87 ވަނަ މާއްދާގެ (ށ)ގައި ބުނާ ބުނެފައިވަނިކޮށް، ގާނޫނުއަސާސީގެ އެ މާއްދާއާ ހިލާފަށް ޖަލްސާ ކުރިއަށް ގެންގޮސް ވޯޓަށް އަހާފައިވާތީ އެވެ. ރައްޔިތުންގެ މަޖިލީހުގެ ދެބައިކުޅަ އެއްބަޔަކީ 43 މެމްބަރުން ނެވެ. ނަމަވެސް އެ ވޯޓަށް އެ ޖަލްސާއަށް ހާޒިރުވެ ތިއްބެވީ 40 މެމްބަރުން ނެވެ. ފާސްކޮށްފައިވަނީ 38 މެމްބަރުންގެ އިއްތިފާގުންނެވެ.

މީގެއިތުރުން ގާނޫނީ ވަކީލުން ވިދާޅުވީ ކުއްލި ނުރައްކުގެ 15 ދުވަސް އިއުލާން ކުރުމަށްފަހު އޭގެ ދަށުން ހައްޔަރު ކޮށްފައިވާ ހުރިހާ ފަރާތްތަކެއް ވަގުތުން މިނިވަން ކުރަންޖެހޭ ކަމަށާއި ރައްޔިތުން އެއަށް އަމަލު ކުރަންޖެހޭ ކުއްލި ނުރައްކަލުގެ ގަރާރެއް ނެތް ކަމަށެވެ.

ގާނޫނީ ވަކީލުން ވިދާޅުވީ ސަރުކާރުން އިތުރު ކުރަން ހުށަހެޅި 30 ދުވަހުގެ ކުއްލި ނުރައްކަލުގެ ހާލަތު ފާސްކޮށް، ސުޕްރީމް ކޯޓުގެ އިސްތިޝާރީ ލަފައެއް ހޯދުމަށް ނިންމި ނަމަވެސް އެއީ ބާތިލް ނިންމުމަކަށްވާތީ، ކުއްލި ނުރައްކަލުގެ ހާލަތުގެ ދަށުން ހައްޔަރުކޮށްފައިވާ ހުރިހާ އެންމެން ވަގުތުން ވަގުތަށް ދޫކޮށްލުމަށް ދައުލަތުގެ ކަމާބެހޭ ހުރިހާ މުއައްސަސާތަކަށް ގޮވާލާ ކަމަށެވެ. އަދި ސުޕްރީމް ކޯޓުން ފެބްރިއަރީ މަހުގެ އެއްވަނަ ދުވަހު ނެރުނު އެ ކޯޓުގެ އަމުރު ތަންފީޒު ކުރުމަށްވެސް ދައުލަތުގެ ކަމާބެހޭ ހުރިހާ މުއައްސަސާތަކަށް ގޮވާލާ ކަމަށެވެ.

ކުއްލި ނުރައްކަލުގެ ހާލަތާ ގުޅިގެން ރާއްޖޭ ވަރަށް ގިނަ ގާނޫނީ ވަކީލުން ވަނީ ކަންބޮޑުވުން ފާޅުކުރައްވާފަ އެވެ. އަދި ކުއްލި ނުރައްކަލުގެ ހާލަތުގެ ގަރާރު ފާސްކުރުމަށް ބޭއްވި މަޖިލިސް ޖަލްސާ ދޫކުރައްވާ މަޖިލީހުގެ ކައުންސެލް ގެނެރަލް ފާތިމަތު ފިލްޒާ ވަނީ މަޖިލިސް ދޫކުރައްވާ ވަޑައިގަންނަވާފަ އެވެ. މައުލޫމާތު ލިބިފައިވާ ގޮތުން ފިލްޒާ މަޖިލިސް ދޫކުރައްވާ ނިކުމެވަޑައިގެންނެވީ ގާނޫނުއަސާސީއާ ހިލާފަށް މަޖިލިސް ކުރިއަށް ގެންދަވާތީ ކަމަށް ވިދާޅުވެއެވެ. ނަމަވެސް ފިލްޒާގެ ބަހެއް މިހާތަނަށް ވަނީ ލިބޭގޮތް ނުވެފަ އެވެ.

މީގެއިތުރުން ރާއްޖޭގެ ކުރީގެ ރައީސުންނާއި ރައްޔިތުންގެ މަޖިލީހުގެ ކުރީގެ ރައީސުންނާއި ފަނޑިޔާރުންނާއި ކުރީގެ ބަަންޑާރަ ނައިބުންނާއި ކުރީގެ ޕްރޮސެކިއުޓަރ ޖެނެރަލުންގެ އިތުރުން ބޭރުގެ ބައެއް ގައުމުތަކުންނާއި ބައިނަލްއަގްވާތީ ޖަމްއިއްޔާ ޔަމާއަތްތަކުން ވެސް ވަނީ ކަންބޮޑުވުން ފާޅުކުރައްވާފަ އެވެ. އަދި ސުޕްރީމް ކޯޓުން އެކެއް ފެބްރުއަރީގައި ނެރުނު އަމުރު ތަންފީޒު ކުރުމަށްވެސް އެ ފަރާތްތަކުން ވަނީ ގޮވާލައްވާފަ އެވެ.