ފުލުހެއްގެ ގައިގައި ޖެހިކަމުގެ ތުހުމަތުކޮށް، ފުލުހުން އެދުނީ ފޮޓޯއެއް ނެގުމަށް: ނާދިރާ
ފުލުހުންގެ ވާޖިބަށް ހުރަސްއެޅުމުގެ ތުހުމަތު ވެސް ނާދިރާގެ މައްޗަށް ކުރޭ
އާމިނަތު ނާދިރާ - އޭނާގެ މައްޗަށް ކުރަނީ މާރާމާރި ހިންގިކަމުގެ ތުހުމަތު
ފުލުހެއްގެ ގައިގައި ޖެހިކަމުގެ ތުހުމަތުކޮށް، ފުލުހުން އެދުނީ ފޮޓޯއެއް ނެގުމަށް ކަމަށް ރައީސް މައުމޫން އަބްދުއްޤައްޔޫމްގެ އަރިސް ބޭފުޅެއް ކަމަށްވާ އާމިނަތު ނާދިރާ ވިދާޅުވެއްޖެއެވެ.
ފުލުހުންގެ އިދާރާއަށް ހާޒިރުވެވަޑައިގެންނެވުމަށް ފަހު ނޫސްވެރިންނަށް މައުލޫމަތު ދެއްވަމުން ނާދިރާ ވިދާޅުވީ ފުލުހުން އެދުނީ ބަލަމުންދާ މައްސަލައަކާ ގުޅިގެން ވީޑިއޯ އެނަލައިސިސް ހެދުމަށް ފޮޓޯއެއް ނެގުމަށް ކަމަށެވެ. ނަމަވެސް އޭނާއަކީ ފުލުހުންގެ ބަންދުގައި ހުރި މީހަކަށް ނުވެ، ކޯޓު އަމުރެއް ނެތި ފޮޓޯއެއް ދިނުމަށް އިންކާރުކުރެއްވި ކަމަށް ނާދިރާ ވިދާޅުވިއެވެ.
"އަޅުގަނޑު ދެންނެވި ކޯޓު އަމުރެއްގެ ދަށުން ވަޑައިގަންނަވާށޭ. އޭރުން އެބޭފުޅުންނަށް އަޅުގަނޑުގެ ފޮޓޯ ނެގުމަށް ހުއްދަ ދޭނަމޭ"
ރައީސް މައުމޫންގެ ފަރާތްޕުޅުން އިދިކޮޅު ޕާޓީތަކުގެ މަސައްކަތުގައި އިސްދައުރެއް ވެސް އަދާކުރައްވާ ނާދިރާ ވިދާޅުވީ، އޭނާގެ މައްޗަށް ފުލުހުން ކުރާ ތުހުމަތަކީ ފުލުހުންގެ ވާޖިބަށް ހުރަސްއެޅުމުގެ ތުހުމަތާއި ފުލުހެއްގެ ގައިގައި ޖެހިކަމުގެ ތުހުމަތު ކަމަށެވެ. އެއީ މި މަހުގެ 4 ވަނަ ދުވަހުގެ ރޭ ބޭއްވި މުޒާހަރާއާ ގުޅިގެން ކުރާ ތުހުމަތެއް ކަމަށް ވެސް ނާދިރާ ވިދާޅުވިއެވެ.
