ގޮނޑި ގެއްލުނު ކަމަށް ބުނި 12 މެމްބަރުންނަށް ވެސް ވަނީ ޖަލްސާއަށް ދައުވަތު ފޮނުވާފައި
18 ފެބުރުއަރީ 2018 | އާދީއްތަ 08:58ކުރިން ގޮނޑި ގެއްލުނު ކަމަށްބުނި 12 މެމްބަރުންނަށް ހުރަހެއް ނެތް
މަޖިލީހަށް ވަދެވަދައިގެންނެވުމަށް ވަޑައިގެންނެވި މަޖިލިސް މެމްބަރުންތަކަކަށް އަނިޔާވެފައި: ސިފައިން ވަނީ މަޖިލިސް "ހިސޯރު" ކޮށްފައި
ރައްޔިތުންގެ މަޖިލީހުގެ ހާއްސަ ޖަލްސާއެއް ހޯމަ ދުވަހު ބޭއްވުމަށް ނިންމާ، އެ ޖަލްސާއަށް ގޮނޑި ގެއްލުނު ކަމަށްބުނި 12 މެމްބަރުންނަށް ވެސް ދައުވަތު ފޮނުވައިފި އެވެ.
ސަރުކާރު ހިންގާ ޕީޕީއެމުން ވަކިވުމުން، މަޖިލީހުގައި އެ މެމްބަރުން އަދާ ކުރައްވަމުންއައި ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމުމާއި ގުޅިގެން މަޖިލީހުންވެސް ވަނީ އެ 12 މެމްބަރުންނަކީ މެމްބަރުން ނޫންކަމަށް މީގެކުރިން ނިންމާފަ އެވެ. ނަމަވެސް މިމަހުގެ އެއްވަނަ ދުވަހު ސުޕްރީމް ކޯޓުން ނެރުނު އަމުރުގައި އެ 12 މެމްބަރުންގެ ގޮނޑި ނުގެއްލޭ ކަމަށާއި އެ މެމްބަރުން އަދާކުރަންޖެހޭ ގާނޫނީ ޒިންމާ އަދާކުރުމަށް އެއްވެސް ފަރާތަކުން ހުރަސް ނޭޅުމަށް ވަނީ އަމުރުކޮށްފަ އެވެ.
ސުޕްރީމް ކޯޓުގެ އެ އަމުރާއެކު ރައްޔިތުންގެ މަޖިލީހުގައި އޭރު ހުންނެވި އަމީން އާއްމު އަހުމަދު މުހައްމަދު ވިދާޅުވެފައިވަނީ އެ 12 ބޭފުޅުންނަކީ މަޖިލީހުގެ މެމްބަރުން ކަމަށާއި މަޖިލީހުގައި އެ މެމްބަރުން އަދާކުރަންޖެހޭ ގާނޫނީ ޒިންމާ އަދާކުރުމަށް އެއްވެސް ހުރަހެއް މިހާރު ނެތް ކަމަށެވެ.
ކުރީގެ އަމީން އާއްމު އެގޮތަށް ވިދާޅުވެ، މަޖިލީހުގެ މިއަހަރުގެ ފުރަތަމަ ޖަލްސާ މިމަހުގެ ފަސް ވަނަ ދުވަހު ބޭއްވުމަށް ނިންމާ އެޖަލްސާއަށް އެ މެމްބަރުންނަށް ދައުވަތު ވެސް ފޮނުވާފައި ވެއެވެ. ނަމަވެސް ސަލާމަތީ ސަބަބުތަކަކަށްޓަކައި ކަމަށްބުނެ މަޖިލީހުގެ އެ ޖަލްސާ ވަނީ ކެންސަލް ކޮށްފަ އެވެ. އަދި މިމަހުގެ ފަސް ވަަނަ ދުވަހުގެ ރޭ ސަރުކާރުން ވަނީ ކުއްލި ނުރައްކަލުގެ ހާލަތު އިއުލާން ކުރައްވާ، ރައްޔިތުންގެ މަޖިލީހާއި ސުޕްރީމް ކޯޓު ހުއްޓުމަކަށް ގެނެސް، ސަލާމަތީ ހިދްމަތްތަކުން ވަނީ އުއްތަމަ ފަނޑިޔާރު އަބްދުﷲ ސައީދު އާއި ސުޕްރީމް ކޯޓުގެ ފަނޑިޔާރު އަލީ ހަމީދު އާއި ކުރީގެ ރައީސް މައުމޫން އަބްދުލްގައްޔޫމް ހައްޔަރު ކުރައްވާފަ އެވެ.
ކުއްލި ނުރައްކަލުގެ ހާލަތު 15 ދުވަހުގެ މުއްދަތަށް އިއުލާން ކުރުމަށްފަހު 48 ގަޑިއިރުގެ ތެރޭގައި އެމައްސަލަ މަޖިލީހުގެ އިދާރާއަށް ހުށަހަޅަންޖެހޭއިރު ސަރުކާރުން އެކަންވެސް ކޮށްފައި ނުވާކަމަށް އިދިކޮޅު މެމްބަރުން ވަނީ ވިދާޅުވެފަ އެވެ.
ހޯމަ ދުވަހުގެ ޖަލްސާ ބާއްވަނީ ދައުރުން ބޭރުގައި ހާއްސަ ޖަލްސާއެއް ގޮތަށް ކަމަށް މަޖިލީހުގެ އިދާރާއިން ބުނާއިރު، މިހާތަނަށް ރިޔާސީ ބަޔާން އިއްވާ ޖަލްސާ ބޭއްވިފައި ނުވެއެވެ. އަދި މަޖިލިސް ވަނީ ސިފައިން "ހިސޯރު" ކޮށްފައި ކަމަށް މެމްބަރުން އަންނަނީ ބުނަމުންނެވެ.
މި ޖަލްސާ ބާއްވާއިރު، މަޖިލީހުގެ ރައީސް ކަމުގެ މަގާމުގައި ހުންނެވި ފުވައްމުލަކު ދެކުނު ދާއިރާގެ މެމްބަރު އަބްދުﷲ މަސީހު މުހައްމަދުގެ އިތުބާރު ނެތްކަމަށް 45 މެމްބަރެއް ސޮއި ކުރައްވުމަށްފަހު ވަނީ މަޖިލީހަށް ހުށަހަޅާފަ އެވެ.
މަޖިލީހުގެ މެޖޯރިޓީ މެމްބަރުން ސޮއި ކުރައްވާ މަސީހުގެ އިތުބާރު ނެތްކަމަށް މަޖިލީހަށް ހުށަހަޅާފައިވުމުން މަޖިލީހުގެ ރައީސް ކަމުގެ މަގާމާމެދު ވަނީ ސުވާލު އުފެދިފަ އެވެ. އެ މައްސަލައަށް ވޯޓަށް އެހުމެއްނެތި ގަދަބާރުން މަޖިލީހުގެ ޖަލްސާތައް މީގެކުރިން ބާއްވާފައިވާއިރު އިދިކޮޅު މެމްބަރުންނަށް، އެ މެމްބަރުންގެ ގާނޫނީ ޒިންމާ އަދާކުރުމަށް ބޮޑެތި ހުރަސްތައް ވަނީ ކުރިމަތި ވެފަ އެވެ.
ޝަރުއީ ހުކުމަކާއި ނުލައި މިވަގުތު ޖަލުގައި ބަންދުކޮށްފައިވާ އިދިކޮޅު މެމްބަރުން ހޯމަ ދުވަހު ބާއްވާ ޖަލްސާއަށް ހާޒިރު ކުރުމާމެދު ވަނީ ސުވާލު އުފެދިފަ އެވެ. މީގެކުރިން ޝަރުއީ ހުކުމެއް ނެތި ޖަލުގައި ބަންދުކޮށްފައިވާ ބައެއް މެމްބަރުން ޖަލްސާތަކަށާއި ކޮމެޓީގެ ބައްދަލުވުންތަކަށް ހާޒިރުކޮށްފައިވާއިރު، މަސީހުގެ އިތުބާރު ނެތްކަމުގެ މައްސަލަ ފެންމަތިވިފަހުން ޖަލުގައި ބަންދުގައި ތިއްބަވާ މެމްބަރުން މަޖިލީހަށް ހާޒިރު ކޮށްދެއްވާފައި ނުވެއެވެ. އެގޮތުން ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ހާޒިރު ކޮށްދެއްވުމެއްނެތި ޖަލްސާތަކެއް ބާއްވާފައި ވެއެވެ. ފާރިސްއަކީ ގުޅިފައިވާ ސިޔާސީ ޕާޓީތަކުގެ އިސްކޮށް ހަރަކާތްތެރިވެވަޑައިގަންނަވާ އެއް މެމްބަރެވެ.
ފާރިސްގެ އިތުރުން މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާނުއާއި ދަނގެތި ދާއިރާގެ މެމްބަރު އިލްހާމު އަހުމަދު މިވަގުތު ހުންނެވީ ޝަރުއީ ހުކުމެއްނެތި ޖަލު ބަންދެއްގަ އެވެ.
