ރައްޔިތުންގެ މަޖިލީހުގެ ހާއްސަ ޖަލްސާއެއް ހޯމަ ދުވަހު ބޭއްވުމަށް ނިންމައިފި އެވެ.
މަޖިލީހުގެ އިދާރާއިން ބުނީ މިޖަލްސާއަކީ މިއީ ދައުރުން ބޭރުގައި ބާއްވާ ހާއްސަ ޖަލްސާއެއް ކަމަށެވެ.
ޖަލްސާ ބޭއްވުމަށް ނިންމާފައި ވަނީ ހޯމަ ދުވަހުގެ ހެނދުނު 09:00 ގައި މަޖިލީހުގެ އިދާރާގަ އެވެ.
ހޯމަ ދުވަހު މަޖިލީހުގެ ޖަލްސާއެއް އޮންނާނެ ކަމަށް މަޖިލީހުގެ އިދާރާއިން ބުނި ނަމަވެސް އެޖެންޑާއެއް އާއްމުކޮށްފައި ނުވެއެވެ. ނަމަވެސް ފަހުން އަންގާނެ ކަމަށް މަޖިލީހުގެ އިދާރާއިން ބުނެއެވެ.
ރައްޔިތުންގެ މަޖިލިސް ވަނީ ސިފައިން "ހިސޯރުކޮށްފައި" އެވެ.
މިއަހަރަށް ރައްޔިތުންގެ މަޖިލިސް ހުޅުވަން ނިންމާފައި އޮތީ މި މަހުގެ 5 ގަ އެވެ. ދަރުބާރުގޭގައި ބޭއްވުމަށް ނިންމާފައި އޮތް މި ޖަލްސާ ކެންސަލްކުރީ ސަލާމަތީ ސަބަބުތަކަށްޓަކައި ކަމަށް، ފެބްރުއަރީ 3 ވަނަ ދުވަހު މަޖިލީހުން ނެރުނު އިއުލާނުގައި ބުނެފައިވެއެވެ.
މަޖިލީހުގެ ބަޔާނުގައި ބުނެފައި ވަނީ މިއަހަރުގެ ފުރަތަމަ ދައުރުގެ ފުރަތަމަ ޖަލްސާ، ސަލާމަތީ ސަބަބުތަކަށްޓަކައި އެ ދުވަހު ބޭއްވެން ނެތުމުން، ވީހާ ވެސް އަވަހަކަށް އެ ޖަލްސާ ބޭއްވުމަށް މަޖިލީހުގެ ރައީސް މަސައްކަތް ކުރަމުން ގެންދާ ކަމަށެވެ.
މަޖިލީހުގެ އިދާރާގެ ސީނިއާ އޮފިޝަލުން ގަބޫލުކުރައްވާ ގޮތުގައި ކުއްލި ނުރައްކަލުގެ ހާލަތު އިއުލާނުކޮށްފައި އޮތަސް، މަޖިލީހުގެ ޖަލްސާތައް ބާއްވަންޖެހެ އެވެ. އަދި ރިޔާސީ ބަޔާން ނީއްވި ނަމަވެސް، މަޖިލީހުގެ ގަވާއިދުގައި މަޖިލީހުގެ ދައުރު ކަނޑައަޅައި، ޖަލްސާތައް ފަށަންޖެހޭ ދުވަހާއި ނިންމަންޖެހޭ ދުވަސް ކަނޑައަޅާފައި އޮތުމުން ގާނޫނީ ގޮތުން މިހާރު މަޖިލިސް އޮތީ ހުޅުވިފައި ކަަމަށް އެބޭފުޅުން ގަބޫލުކުރައްވަ އެވެ.
ނަމަވެސް، އޭނާ ވިދާޅުވި ގޮތުގައި ޖަލްސާތައް ގަވާއިދާ އެއްގޮތަށް ނުފަށައި އޮތީ ސަރުކާރުގެ ނުފޫޒު އޮތުމުންނާއި، ޖަލްސާތައް ފަށަން މަޖިލީހުގެ ރައީސް ބޭނުންފުޅު ނުވާތީ ކަމަށެވެ.
މަޖިލީހުގެ ގަވާއިދުގެ 16 ވަނަ މާއްދާގައި ބުނެފައި ވަނީ މަޖިލީހުގެ ފުރަތަމަ ދައުރު ހިނގާނީ ފެބްރުއަރީ މަހުން ފެށިގެން އޭޕްރީލް މަހުގެ ނިޔަލަށެވެ. އަދި ކޮންމެ ދައުރެއްގެ ފުރަތަމަ ޖަލްސާ ބާއްވާނީ ފުރަތަމަ ހޯމަ ނުވަތަ ފުރަތަމަ ބުރާސްފަތި ދުވަހު އެވެ.
ގަވާއިދުގެ 25 ވަނަ މާއްދާގައި ބުނެފައި ވަނީ ކޮންމެ އަހަރަކުމެ ރައްޔިތުންގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ގައުމުގެ ހާލަތު ބަޔާންކޮށްދީ އަދި ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަންޖެހޭ ކަމަށް ރައީސުލްޖުމްހޫރިއްޔާ އަށް ފެންނަ ކަންތައްތަކުގެ މައްޗަށް އެކުލަވާލެވޭ ރިޔާސީ ބަޔާނެއް އިއްވަން ވާނެ އެވެ. ނަމަވެސް އެ ބަޔާން އިއްވާނެ ދުވަހެއް އަދި ނޭނގެ އެވެ.
