ރާއްޖޭގެ ސިޔާސީ މަސްރަހަށް ހައްލެއް ހޯދުމަށް ހުރިހާ ޕާޓީތައް ބައިވެރިވާ މަޝްވަރާތައް ފަށްޓަވައިދެއްވުމަށާއި، އެ މަޝްވަރާތަކުގައި މެދުވެރިއެއްގެ ދައުރު އަދާކޮށްދެއްވުމަށް އިދިކޮޅު އިއްތިހާދުން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސްގެ އަރިހުން އެދިއްޖެއެވެ.

އދ. ގެ ސެކްރެޓަރީ ޖެނެރަލްގެ އަރިހުން އިދިކޮޅު އިއްތިހާދުން މިކަމަށް އެދިފައި ވަނީ، ރާއްޖޭގެ މިހާރުގެ ހާލަތާ ގުޅޭ ގޮތުން ސެކްރެޓަރީ ޖެނެރަލް ގުޓަރޭސް، ފެބްރުއަރީ މަހުގެ 2 ވަނަ ދުވަހު ނެރުއްވާފައިވާ ބަޔާނުގައި ރާއްޖޭގެ ސިޔާސީ މަސްރަހަށް ހައްލެއް ހޯދުމަށް ހުރިހާ ޕާޓިތަކެއް ބައިވެރިވާ މަޝްވަރާތަކަށް މަގުފަހި ކޮށްދިނުމުގައި އެހީތެރިވުމަށް އދ. އިން ތައްޔާރަށް އޮތް ކަން ހާމަކުރައްވާފައި ވަނިކޮށެވެ.

އިދިކޮޅު އިއްތިހާދުން އދ. ގެ ސެކްރެޓަރީ ޖެނެރަލް އަށް މިހަފްތާގައި ފޮނުވި ސިޓީގައި ވަނީ، މަޝްވަރާގެ އުސޫލަށް އަބަދުވެސް މަރުހަބާ ކިޔާ ކަމަށާއި، އެހެންނަމަވެސް އިދިކޮޅު ފަރާތްތަކުގެ ކަންބޮޑުވުމަކީ ދިވެހި ސަރުކާރުގެ އަމަލުތައް ކުށްވެރިކޮށް ބައިނަލްއަޤްވާމީ މުޖުތަމައިން ދިވެހި ސަރުކާރަށް ގޮވާލާ ގޮވާލުންތަކަށް އިޖާބަދިނުމުގެ ބަދަލުގައި، އެފަދަ ގޮވާލުންތަކަށް ފިނިކަމެއް ހޯދުމުގެ ހަމައެކަނި ނިޔަތުގައި ސަރުކާރުން މަޝްވަރާތަކަށް ގޮވާލާފައިވުން ކަމަށެވެ. އަދި ސަރުކާރުން މަޝްވަރާތަކަށް ގޮވާލާފައި ވަނީ ރައީސުލްޖުމްހޫރިއްޔާ ދިވެހި ދައުލަތުގެ މައްޗަށް ޤާނޫނާއި ޚިލާފަށް އަތްގަދަ ކުރައްވައިގެން ކުރައްވާ މަސައްކަތްޕުޅުތަކަށް އިތުރު ވަގުތު ހޯދުމުގެ ހީލަތްތެރި ނިޔަތެއްގައި ކަމަށާއި، އެއީ ރައީސް ޔާމީން މީގެ ކުރިން ވެސް ބޭނުން ކުރައްވާފައިވާ އުކުޅެއް ކަން ފާހަގަކޮށް، އިދިކޮޅު އިއްތިހާދުގެ ކަންބޮޑުވުން އދ. ގެ ސެކްރެޓަރީ ޖެނެރަލާ ހިއްސާކުރައްވާފައިވެއެވެ.

މީގެ އިތުރުން ބައިނަލްއަޤްވާމީ ފަރާތްތަކުން މެދުވެރިއެއްގެ ދައުރު އަދާކޮށްގެން، ބައިނަލްއަޤްވާމީ މަންދޫބުންގެ އިތުބާރާއެކުގައި ކުރިއަށް ގެންދާ މަޝްވަރާތަކެއް މެނުވީ އިދިކޮޅު ފަރާތްތަކަށް ބަލައިގަންނަން އުނދަގޫވާނެ ކަމަށް އިދިކޮޅު އިއްތިހާދުން ފޮނުވި ސިޓީގައި ފާހަގަކޮށްފައިވެއެވެ.

މައުނަވީ މަޝްވަރާތަކެއް ކުރިއަށް ގެންދިއުމަށް ރައީސް ޔާމީންގެ ސަރުކާރުން ޑިމޮކްރަސީގެ ރޫހާއި، ޤާނޫނުގެ ވެރިކަން އަދި ޤާނޫނު އަސާސީއާ ޚިލާފަށް ހިންގާ ހުރިހާ އަމަލުތަކެއް ހުއްޓާލަންޖެހޭ ކަމަށް އިދިކޮޅު އިއްތިހާދުން ގަބޫލުކުރާ ކަމަށް އެސިޓީގައިވެއެވެ.

މީގެ އިތުރުން އިދިކޮޅު ފަރާތްތަކުން ވަނީ، މަޝްވަރާތަކަށް އެކަށޭނަ އަދި ބަލައިގަނެވޭނެ ފަދަ މާހައުލެއް ގާއިމް ކޮށްދިނުމަށް ސަރުކާރަށް ބާރުއެޅުމަށް ސެކްރެޓަރީ ޖެނެރަލްގެ ކިބައިން އެދިފައެވެ. އެގޮތުން، އެފަދަ މާހައުލެއް ގާއިމް ކުރުމަށް ދިވެހި ސަރުކާރުން ހަތަރު ކަމަކަށް އަމަލު ކުރަންޖެހޭނެ ކަމަށް އިދިކޮޅު ފަރާތްތަކުން ސިޓީގައި ފާހަގަކޮށްފައިވެއެވެ.

އެގޮތުން ހިމެނެނީ ފެބްރުއަރީ މަހުގެ 1 ވަނަ ދުވަހުގެރޭ ސުޕްރީމް ކޯޓުން ނެރުނު އަމުރު ފުރިހަމަ އަށް ތަންފީޒްކޮށް، ސިޔާސީ ކުށްވެރިން ވަގުތުން މިނިވަން ކުރުމަށާއި، ހައްޔަރު ކޮށްފައިވާ އުއްތަމަ ފަނޑިޔާރު އަބްދުﷲ ސަޢީދާއި ސުޕްރީމް ކޯޓުގެ ފަނޑިޔާރު އަލީ ހަމީދު ދޫކޮށްލުމަށާއި، ފުލުހުންގެ ބަންދުގައިވާ ކުރީގެ ރައީސް މައުމޫން އަބްދުލްޤައްޔޫމާއި، ދިއްގަރު ދާއިރާގެ މެމްބަރު އަހުމަދު ފާރިސް މައުމޫން އަދި މައްޗަންގޮޅީ ދެކުނު ދާއިރާގެ މެމްބަރު އަބްދުﷲ ސިނާނާއި، ދަނގެތީ ދާއިރާގެ މެމްބަރު އިލްހާމް އަހުމަދާއި ރައީސް މައުމޫންގެ ދަރިކަނބަލުން ޔުމްނާ މައުމޫންގެ ފިރިކަލުން މުޙައްމަދު ނަދީމާއި ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ދަރިކަލުން އިބްރާޙިމް ސިޔާދު ޤާސިމް އަދި އިދިކޮޅު ފަރާތްތަކާއި ދެކޮޅަށް ސަރުކާރުން ހިންގާ ކަންތައްތަކުގެ ތެރޭގައި ހައްޔަރުކޮށްފައިވާ ފަރާތްތައް ދޫކޮށްލުމުގެ އިތުރުން އަސްކަރިއްޔާގެ ހިޞާރުން ރައްޔިތުންގެ މަޖިލިސް ވީއްލައި، މަޖިލީހުގެ ޖަލްސާތައް، މަޖިލީހުގެ ފުރިހަމަ ބާރުތަކާ އެކު ފެށުމުގެ ފުރުޞަތު ފަހިކޮށްދިނުމެވެ.

މީގެ އިތުރުން ރާއްޖޭގެ ސިޔާސީ މަޝްރަހުގައި މިހާރު ހުރި މައްސަލަތަކަށް ޞުލްޙަވެރި ހައްލެއް ހޯދައިދިނުމަށް ކުރެވެން ހުރި ހުރިހާ މަސައްކަތެއް ކޮށްދިނުމަށާއި، ރާއްޖެއިން ބައިވެރިވެފައިވާ ބައިނަލްއަޤްވާމީ ޤާނޫނުތަކާއި މުއާހަދާތަކުގެ ދަށުން ރައީސް ޔާމީން ޖަވާބުދާރީ ކުރުވުމަށް އެޅެންހުރި ހުރިހާ ފިޔަވަޅެއް އެޅުމަށް ގުޅިފައިވާ އިދިކޮޅު އިއްތިހާދުން ބައިނަލްއަޤްވާމީ މުޖުތަމައުގެ ކިބައިން އެދިފައިވެއެވެ.

ރާއްޖޭގެ ސިޔާސީ މަސްރަހުގައި ނިއުޅެމުންދާ ކަންކަން އދ. އިން ގާތުން ބަލަމުންދާއިރު، ރާއްޖޭގެ ހާލަތާ ގުޅޭ ސިއްރު ބައްދަލުވުމެއް އދ. ގެ އެންމެ ބާރުގަދަ ގުނަން ކަމުގައިވާ ސަލާމަތީ މަޖިލީހުގައި ބާއްވާފައިވެއެވެ. މީގެ އިތުރުން، ރައީސް ޔާމީން އިއުލާން ކުރައްވާފައިވާ ކުއްލި ނުރައްކަލުގެ ހާލަތު އުވާލުމަށް އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް ދިވެހި ސަރުކާރަށް ގޮވާލައްވާފައިވެއެވެ.