އަދީބުގެ ބޭސްފަރުވާއަށް ރާއްޖެއިން ބޭރަށްދިއުމަށް ޑޮކްޓަރު ދީފައިވާ ލިޔުމެއް އާންމު ކޮށްފި
15 ފެބުރުއަރީ 2018 | ބުރާސްފަތި 10:55ރާއްޖެއިން ބޭރުން ގްލްކޯމާ ސްޕެޝަލިސްޓަކަށް ދެއްކުމަށް ވަނީ ލަފާ ދީފައި
ކުރީގެ ނައިބު ރައީސް އަހުމަދު އަދީބު
އެކި މައްސަލަތަކުގައި 33 އަހަރަށް ވުރެ ގިނަ ދުވަހަށް ޖަލަށް ލާފައިވާ ކުރީގެ ނައިބު ރައީސް އަހުމަދު އަދީބުގެ ބޭސްފަރުވާއަށް ރާއްޖެއިން ބޭރަށް ދާންޖެހޭކަމަށްބުނެ ޑޮކްޓަރު ދީފައިވާ ލިޔުމެއް އާންމު ކޮށްފިއެވެ.
އަދީބުގެ ގާނޫނީ ވަކީލުންނާއި އެމަނިކުފާނުގެ އަނބިކަނބަލުން މަރިޔަމް ނަޝްވާ ޓްވިޓާ މެދުވެރިކޮށް އާންމުކޮށްފައިވާ ލިޔުމުގައި ވަނީ, އަދީބުގެ ލޮލުގެ ހާލަތު ވަރަށް ބޮޑަށް ގޯސްވާތީ ރާއްޖެއިން ބޭރުން ފަރުވާ ހޯދުމަށް ޑޮކްޓަރު ލަފާ ދީފައެވެ. ޑރ.ސްރިނިވާސް ޝެޓީ ކަލްޕަޑީ ދީފައިވާ އެ ލިއުމުގައި ރާއްޖެއިން ބޭރަށް ގޮސް ގްލްކޯމާ ސްޕެޝަލިސްޓަކަށް ދައްކަން އަންގާފައިވެއެވެ.
ފެބްރުއަރީ 1 ގައި ސުޕްރީމް ކޯޓުން ނެރުނު އަމުރުގައި ދޫކޮށްލަން ބުނެފައިވާ 9 މީހުންގެ ތެރޭގައި އަދީބު ހިމެނެއެވެ. އެއަމުރާއި ގުޅިގެން ދޫނިދޫ ޑިޓެންޝަން ސެންޓަރުން މާފުށީ ޖަލަށް އަދީބު ބަދަލުކުރިކަން އާއިލާއަށް އެންގި ނަމަވެސް އޭގެ ފަހުން އަދީބުގެ ޚަބަރެއް ނުވާކަމަށް ބުނެ އަދީބުގެ ވަކީލުންގެ ފަރާތުން ވަނީ ބަޔާނެއް ނެރެފައެވެ. އެ ބަޔާން ނެރުމައި ގުޅިގެން، ވަކީލުންގެ ބައްދަލުވުމަކާއި އާއިލީ ބައްދަލުވުމެއް އަދީބަށް ހަމަޖައްސައިދިން ނަމަވެސް، ކަރެކްޝަންސް އިން ފަހުން ވަނީ އެ ދެ ބައްދަލުވުންވެސް ކެންސަލް ކޮށްފައެވެ. އަދީބުގެ ސިއްހީ ހާލުކޮޅު ވަރަށް ދެރަ ކަމަށާއި ޖަލު ގޮޅި ތެރެއަށް ދެފަހަރެއްގެމަތިން ހޭނެތިގެން ވެއްޓިފައިވާކަމުގެ މަޢުލޫމާތު ލިބިފައިވާ ކަމަށް މީގެ ދެދުވަސްކުރިން އަދީބުގެ ގާނޫނީ ވަކީލު މޫސާ ސިރާޖު ވަނީ ވިދާޅުވެފައެވެ. އާއިލީ ބައްދަލުވުން ކެންސަލް ކުރުމާއި ގުޅިގެން އަދީބުގެ އަނބިކަނބަލުން މަރިޔަމް ނަޝްވާ ވަނީ އަދީބަށް ސިއްޙީ ބޮޑެތި މައްސަލަތަކެއް ދިމާވެފައިވާ މި ދަނޑިވަޅުގައި އަދީބް ދެކެން ބޭނުންވާކަމަށް ވިދާޅުވެ، ކަންބޮޑުވުން ފާޅުކުރައްވާފައެވެ.
ވީ އެންމެ އަވަހަކަށް ލޮލުގެ އޮޕްރޭޝަނެއް ކުރުމަށް އަދީބަށް ޑޮކްޓަރުން ލަފާ ދެއްވާފައިވާއިރު، އަދީބުގެ އެތެރެހަށީގައި އުފެދިފައިވާ ސިސްޓުތައް ކެންސަރަށް ބަދަލުވެދާނެ ކަމުގެ ބިރު އޮތުމުން، އަދީބު ކެންސަރަށް ސްކްރީން ކުރުމަށްވެސް ޑޮކްޓަރުން ވަނީ ލަފާ ދެއްވާފައެވެ. މީގެ ދެ އަހަރުދުވަސް ކުރިން ދެއްވި އެ ލަފައާއި އެއްގޮތަށް އަދި މިހާތަނަށް އަދީބު ކެންސަރަށް ސްކްރީން ކުރުމުގެ ފުރުޞަތު ސަރުކާރުން ދީފައެއް ނުވެއެވެ.
