ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރީ ސިޔާސީ ބޭނުމެއްގައި، ބާރުގެ ބޭނުން ނަހަމަގޮތުގައި ހިފުމަށް: ކޯފީ އަނާން
ދިވެހިރާއްޖޭގެ ސުޕްރީމް ކޯޓުން ނެރުނު އަމުރަށް އިހުތިރާމް ނުކުރުމާއި ވަކި ވަކި ފަނޑިޔާރުންނަށް ބިރު ދެއްކުން ކުށްވެރިކުރަން
އދ. ގެ ކުރީގެ ސެކްރެޓަރީ ޖެނެރަލް ކޯފީ އަނާން - ރާއްޖޭގެ ސިޔާސީ ކަންކަމާއި ގުޅިގެން ކަންބޮޑުވުން ފާޅުކޮށް ބަޔާނެއް ނެރުއްވާފައިވޭ
ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރީ ސިޔާސީ ބޭނުމެއްގައި, ބާރުގެ ބޭނުން ނަހަމަގޮތުގައި ހިފުމަށް ކަމަށް އދ. ގެ ކުރީގެ ސެކްރެޓަރީ ޖެނެރަލް ކޯފީ އަނާން ވިދާޅުވެއްޖެއެވެ.
ހުކުރު ދުވަހު ކޯފީ އަނާން ނެރުއްވި ބަޔާނެއްގައި ވިދާޅުވީ އެކެއް ފެބުރުއަރީގެ އަމުރަށް ފަހު ރާއްޖޭގައި ހިނގައި ދިޔަ ކަންތައްތަކަކީ ރައީސުލް ޖުމްހޫރީއްޔާ އަބްދުﷲ ޔާމީން އަބްދުލް ގައްޔޫމް އާއި އެމަނިކުފާނުގެ ސަރުކާރުން ރާއްޖޭގެ މުއައްސާސާތަކަށް ދެއްވި ބީރައްޓެހި ހަމަލާއެއް ކަމަށެވެ. އަދި އެކަމާ ކަންބޮޑުވެލައްވާ ކަމަށްވެސް އަނާން ވިދާޅުވިއެވެ.
ދިވެހިރާއްޖޭގެ ސުޕްރީމް ކޯޓުން ނެރުނު އަމުރަށް އިހުތިރާމް ނުކުރުމާއި ވަކި ވަކި ފަނޑިޔާރުންނަށް ބިރު ދެއްކުން ކޯފީ އަނާން ކުށްވެރިކުރައްވާފައެވެ. އަދި ސިޔާސީ ކުށްވެރިން މިނިވަން ކުރަން ސުޕްރީމް ކޯޓުގެ ފަނޑިޔާރުންގެ އިއްތިފާގުން ފުރަތަމަ ނެރުނު އަމުރު ތަންފީޒު ކުރުމަށާއި ކުއްލި ނުރައްކަލުގެ ހާލަތު އުވާލަން ކޯފީ އަނާން ގޮވާލެއްވިއެވެ.
"ގާނޫނީ ހުކޫމަތަށް ރުޖޫއަވެ، ސުޕްރީމް ކޯޓުގެ އިއްތިފާގުން ފުރަތަމަ ނެރުނު އަމުރަށް ކިޔަމަންވުމަށާއި، ސިޔާސީ ހުރިހާ ހައްޔަރީން މިނިވަން ކުރުމަށާއި، ކުއްލި ނުރައްކަލުގެ ހާލަތު އުވާލުމަށް އަޅުގަނޑު ދިވެހި ސަރުކާރަށް ގޮވާލަން"
މީގެ އިތުރުން ރާއްޖޭގައި މިއަހަރު ބާއްވާ ރިޔާސީ އިންތިހާބަށްޓަކައި ހަރުދަނާ މިނިވަން މުއައްސަސާތައް ކޮންމެހެން މުހިއްމު ކަމަށާއި ރާއްޖޭގެ ކަންތަކުގައި ބައިނަލް އަގުވާމީ މުޖުތަމައު ހިމޭނުން ތިބެގެން ނުވާނެ ކަމަށް ބަޔާނުގައި އެމަނިކުފާނު ވިދާޅުވެފައިވެއެވެ.
މި އަހަރުގެ ފަހުކޮޅުގައި ބާއްވަން ތާވަލުކޮށްފައިވާ އިންތިހާބަކީ މިނިވަން އިންސާފުވެރި އިންތިހާބަކަށް ވާނެކަމުގެ ޔަގީންކަން ދިވެހި ރާއްޖޭގެ ރައްޔިތުންނަށް އަލުން ކަށަވަރުކޮށްދޭން ހުރިހާ ފިޔަވަޅެއް އަޅަން ޖެހޭ ކަމަށާއި ވަރުގަދަ މިނިވަން މުއައްސަސާތަކެއް ހުރުމަކީ އެކަމަށްޓަކައި ކޮންމެހެން ބޭނުން ކަމެއް ކަމަށް ކޯފީ އަނާން ވިދާޅުވިއެވެ. ސުޕްރީމް ކޯޓުގެ އަމުރަށް ތަބާނުވުމާއި ފަނޑިޔާރުން ބިރު ދެއްކުމުގެ އަމަލުތަކަކީ ގާނޫނީ ހުކޫމަތަށް ތަބާނުވުމާއި ޝަރުއީ ނިޒާމަށް އިހުތިރާމް ނުކުރުމުގެ އަމަލުތަކެއް ގޮތުގައި ކޯފީ އަނާން ވަނީ ސިފަކުރައްވާފައެވެ.
