ބަޑި ޖެހިޔަސް ރައީސް ޔާމީން އިސްތިއުފާއެއް ނުދެއްވާނެ: ނިހާން
ނުކައި ނުބޮއި ވެސް ކޮޅެއްގައި ޖައްސާނަން: ނިހާން
ނިހާން: ދައުލަތުގެ އެއްވެސް ބާރަކުން ޔާމީން އަޒުލު ނުކުރެވޭނެ ކަމަށް ވިދާޅުވި
ރައީސް އަބްދުﷲ ޔާމީންގެ ހަށިކޮޅަށް ބަޑި ޖެހި ކަމުގައިވިޔަސް، އެމަނިކުފާނު އިސްތިއުފާ ނުދެއްވާނެ ކަމަށް ޕީޕީއެމް ޕާލަމެންޓްރީ ގްރޫޕުގެ ލީޑަރު އަހުމަދު ނިހާން ހުސައިން މަނިކު ވިދާޅުވެއްޖެއެވެ.
ޕީޕީއެމްގެ ރުމާލު ދޭއް ޖަގަހައިގައި މިރޭ ބޭއްވި ޖަލްސާއެއްގައި ވާހަކަ ދައްކަވަމުން ނިހާން ވިދާޅުވީ ރައީސް ޔާމީނަކީ "ރޭރެއް ހެން ރޭރުވެގެން" އަމަލު ކުރައްވާނެ ބޭފުޅެއް ނޫން ކަަމަށެވެ. ރައީސް ޔާމީނަކީ ރައްޔިތުންގެ ހައްގުގައި ގުރުބާން ވާނެ ބޭފުޅެއް ކަމަށް ނިހާން ވިދާޅުވިއެވެ.
"...އިނގޭ ރޭރެއް ހެން ރޭރުވާނެ މީހެއް ނޫން ކަން ރައީސް ޔާމީނަކީ. އަޅުގަނޑު، އެއް ދުވަހު މި ސްޓޭޖުގައި ބުނެލިން، ރަނގަޅަށް ވަަޒަން ލައްވާފައި ހުރި އުއްޑަ ޖެއްސަސް ރައީސް ޔާމިން އިސްތިއުފާ ނުދެއްވާނެ. މި ގައުމުގެ ރައްޔިތުން އޭނާއާ ހަވާލު ކުރި ގާނޫނީ ހުވާ ކުރައްވައިގެން ހުރެ، ރައްޔިތުންގެ ހައްގުގައި ޖާނާ މާލުން އެމަނިކުފާނު ގުރުބާން ވާނެ،" ސްރީލަންކާގައި ހުންނެވުމަށް ފަހު، ރާއްޖެވަޑައިގެން ބޭއްވި ޖަގަހަ ޖަލްސާގައި ނިހާން ވިދާޅުވިއެވެ.
ސުޕްރީމް ކޯޓުން ނެރުނު އަމުރާއެކު ރާއްޖޭގެ ސިޔާސީ މަސްރަހަށް އައިސްފައިވާ ހަލަބޮލިކަމަށް އިޝާރާތް ކުރައްވައި ނިހާން ވިދާޅުވީ ރާއްޖެއަށް އައިސްފައިވާ ބަދަލުތަކަކީ ބޭރުގެ ނުފޫޒުން ފޯރާފައިވާ ކަންކަން ކަމަށެވެ.
"މިއުޅެނީއަކީ ރާއްޖޭގެ އެތެރޭގައި ކައްކާފައި އޮތް ބޯކިބާގަނޑެއް ނޫން. ވަރަށް ސާފުކޮށް އަޅުގަނޑު މި ދަންނަވަނީ. މިރާއްޖޭގެ އެތެރޭގައި ކެއްކި ބޯކިބާގަނޑެއް ނޫން. މީގަ އެބަހުރި ކެއުން ހަރާންވައްތަރު ވެސް މީގެ ތެރެއަށް އަޅާފައި. މި ބޯކިބަލަކީ ދިވެހި ބޯކިބަލެއް ނޫން،" މަޖިލީހުގެ މެޖޯރިޓީ ލީޑަރުކަން ގެއްލިފައިވާ ނިހާން ވިދާޅުވިއެވެ.
ނިހާން ވިދާޅުވީ އަވަށްޓެރި ގައުމުތަކުން ރާއްޖެއަށް ނޭރޭނެ ކަމަށާއި އެ ފުރުސަތު ނުދޭނެ ކަމަށެވެ.
އޭނާ ވިދާޅުވީ ރައީސުލްޖުމްހޫރިއްޔާގެ މަގާމުން ޔާމީން އަޒުލު ކުރުމުގެ އެއްވެސް މަސައްކަތެއް ދައުލަތުގެ ބާރަކުން ކުރާނަމަ، އެއީ ހަނގުރާމަ އިއުލާން ކުރުން ކަމަށާއި އެ ފުރުސަތު ނުދެއްވާނެ ކަމަށެވެ.
ނިހާން ވިދާޅުވީ "ނުކައި ނުބޮއި ވެސް" މިހާރު ދިމާވެފައިވާ ކަންތައްތައް ކޮޅެއްގައި ޖައްސާނެ ކަމަށެވެ.
