އޭއެފްސީ ކަޕްގެ ޕްރެލިމިނަރީ ބުރުގެ ދެވަނަ ލެގުގައި ޓީސީ ސްޕޯޓްސް ކްލަބާ ދެކޮޅަށް ނުކުންނަ މެޗުގެ ފެވަރިޓަކީ ސައިފް ސްޕޯޓިން ކްލަބް ނޫން ކަމަށް އެ ކްލަބްގެ ކޯޗު ރަޔާން ނޯތުމޯ ބުނެފިއެވެ.

މި ދެ ޓީމު ބަންގްލަދޭޝްގައި ކުޅުނު މެޗު 1-0 އިން ކާމިޔާބުކުރީ ޓީސީއެވެ. މި މެޗު ވެގެން ގޮސްފައި ވަނީ ޓީސީ އަދި ސައިފްގެ ވެސް ބައިނަލްއަގްވާމީ ފުރަތަމަ ތަޖުރިބާއަށެވެ. މި މެޗުގެ ދެވަނަ ލެގުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން އެ ޓީމުގެ ކޯޗު ބުނީ ރާއްޖޭގައި ކުޅޭ ދެވަނަ ލެގުގެ މެޗުގެ ފެވަރިޓަކީ އެ ޓީމު ނޫން ކަމަށެވެ.

ނޯތުމޯ ބުނީ މިވަގުތު އޭނާގެ ޓީމުގެ މައްޗަށް ޓީސީއަށް އެއް ލަނޑުގެ ލީޑެއް އެބައޮތް ކަމަށާއި އެހެންކަމުން އޭނާގެ ޓީމަކީ ފެވަރިޓެއްގެ ގޮތުގައި ބަލައިގަނެވެން ނެތް ކަމަށެވެ. އޭނާ ބުނީ އެކަން ބަދަލުކުރުމުގެ ހުރިހާ ވެސް ބާރެއް އޮތީ އަމިއްލަ އަތްމަތީގައި ކަމަށާއި ކުޅުންތެރިންގެ ފަރާތުން އޭނާ އެދޭ ކަންކަން އެ ކުޅުންތެރިންނަށް ފުރިހަމަ ކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.

މި މުބާރާތަށް ތައްޔާރުވުމުގެ ގޮތުން އެ ގައުމުގެ ޗިޓަގޮންގް އަބްހާނީގެ ގިނަ ކުޅުންތެރިންތަކެއް ލޯނު އެއްބަސްވުމެއްގެ ދަށުން ސައިފް ސްޕޯޓިން ކްލަބުން ވަނީ ގެނެސްފައެވެ. މިކަމާ ގުޅޭ ގޮތުން ވާހަކަ ދައްކަމުން ނޯތުމޯ ބުނީ އާ ކުޅުންތެރިންތަކަކާ އެކު ޓީމެއް އަލުން ބިނާކުރުން ވެގެންދިޔައީ ވަރަށް އުނދަގޫ ކަމަކަށް ކަމަށާއި ކުޅުންތެރިން ޓީމަށް ނަގަނީ އެ ކުޅުންތެރިންގެ ފަރާތުން މިހާރު ފެންނަ ކުޅުމަށް ބެލުމަށް ފަހު ކަމަށެވެ. ހަމައެހެންމެ އޭނާ ބުނީ ރާއްޖޭގައި ބަންގްލަދޭޝްއަށް ނިސްބަތްވާ ވަރަށް ގިނަ މީހުން ދިރިއުޅެމުން އަންނަ ކަމަށާއި އުއްމީދަކީ އެމީހުން އެ ޓީމަށް ސަޕޯޓުކުރަން އައުން ކަމަށެވެ.

މި ދެ ޓީމު ބައްދަލުކުރާ ދެވަނަ ލެގުގެ މެޗު އޮންނާނީ އަންގާރަ ދުވަހުގެ ރޭ 21:30 ގައެވެ.