އެމެރިކާ އިން އަނެއްކާ ވެސް ދަތިކުރުމުގެ ފިޔަވަޅު އެޅީ ކަންކަން ގޯސްކުރަން: އުތުރު ކޮރެއާ
27 ޖެނުއަރީ 2018 | ހޮނިހިރު 16:56އެމެރިކާ އިން ވަނީ މިދިޔަ ބުދަ ދުވަހު އުތުރު ކޮރެއާއާ ދެކޮޅަށް އާ ދަތިކުރުމުގެ ފިޔަވަޅުތައް އަޅާފައި
އުތުރު ކޮރެެއާ ދަނީ ތަކުރާރުކޮށް އަސްކަރީ ބާރު ދައްކާލުމުގެ ހަރަކާތްތަކެއް ހިންގަމުން | ރޮއިޓާސް
އެމެރިކާ އިން އުތުރު ކޮރެއާއާ ދެކޮޅަށް ބުދަ ދުވަހު އެޅި ދަތިކުރުމުގެ ފިޔަވަޅުތަކަކީ "ކަންކަން އިތުރަށް ގޯސްކުރަން އުޅޭ ކަމެއް ކަމަށް" ބުނެ އުތުރު ކޮރެއާ އިން އެމެރިކާ އަށް ވަރަށް ބޮޑަށް ފާޑުކިޔައިފިއެވެ.
އުތުުރު ކޮރެއާގެ ދައުލަތުގެ މީޑިއާ، "ކޮރެއަން ސެންޓްރަލް އެޖެންސީ" އިން ގެނެސްދިން ރިޕޯޓެއްގައި އުުތުރު ކޮރެއާގެ ފޮރިން މިނިސްޓްރީގެ އޮފިޝަލަކު ނަންހާމަނުކުރުމަށް އެދި ވިދާޅުވީ "ދެކޮރެއާ މެދުގައި ހިނގަމުންދާ މަޝްވަރާތަކަށް ވެސް އެމެރިކާ އިން އެޅި ދަތިކުރުމުގެ ފިޔަވަޅުތަކުގެ ސަބަބުން ގެއްލުން ވާނެ ކަމަށާއި އެމެރިކާގެ އަމަލަކީ ވަރަށް ނުބައި އަމަލެއް ކަމަށާއި އަދި ކަންކަން ވެގެންދާ ގޮތުން ހުރިހާ ކަމެއް ދާނީ ގޯހުން ގޯހަށް" ކަމަށެވެ.
އެމެރިކާ އިން އުތުރު ކޮރެއާއާ ދެކޮޅަށް އާ ދަތިކުރުމުގެ ފިޔަވަޅުތައް އެޅީ އުތުުރު ކޮރެއާ އިން ނިއުކްލިއާ ހަތިޔާރު ތަރައްގީ ކުރަމުންދާ މައްސަލައިގައެވެ. ބުދަ ދުވަހު އެމެރިކާ އިން އިއުލާން ކުރި ދަތިިކުރުމުގެ ފިޔަވަޅު އަޅާފައި ވަނީ ނުވަ މުއައްސަސާއަކަށާއި، 16 މީހަކަށާއި، އަދި އުތުރު ކޮރެއާގެ ހަ ބޯޓަކާ ދެކޮޅަށެވެ.
ބައިނަލްއަގްވާމީ ދުނިޔެ އިން ތަކުރާރުކޮށް އުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. މިހާތަނަށް އދ. އާއި އެމެރިކާ އިން ވެސް ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އެހެން ނަމަވެސް އުތުރު ކޮރެއާގެ އަމަލުތަކަކަށް ބަދަލެއް ނާދެއެވެ.
