ކާޖޮލް އީލާގެ ޝޫޓިން ފަށައިފި

ބޮލީވުޑްގެ ތަރި ކާޖޮލް ދޭވްގަން އީލާގެ ޝޫޓިން ފަށައިފިއެވެ.

ޔަޝް ރާޖް ސްޓޫޑިއޯއިން ގެނެސްދޭ މި ފިލްމުގެ ޕްރޮޑިއުސަރަކީ ކާޖޮލްގެ ފިރިމީހާ އަޖޭ ދޭވްގަންއެވެ. ކާޖޮލްގެ އިންސްޓަރގްރާމުގެ ސްޓޯރީއަށް ލާފައިވާ ފޮޓޯއެއްގައި ބުނެފައިވަނީ "އަޖޭ ދޭވްގަން ފިލްމްސް އީލާ ޑޭ 1 "ކަމަށެވެ.

ކާޖޮލް އެންމެ ފަހުން ފެނިގެން ގޮސްފައިވަނީ ވީއައިޕީ2 އެވެ. އެއީ ތަމަޅަ ފިލްމެކެވެ. އީލާ ވެގެން ދާނީ 2015 ވަނަ އަހަރުގައ ނިކުތް ދިވާލޭ އަށް ފަހު ކާޖޮލް ފެނިގެންދާނެ ފުރަތަމަ ހިންދީ ފިލްމަށެވެ.

ކާޖޮލް އެލާއިން ފެންނާނީ ލަވަ ކިޔުންތެރިއެއްގެ ރޯލުންނެވެ. މިފިލްމަކީ އެކަނިވެރި މައެއްގެ ދިރިއުޅުން ދައްކުވައިދޭ ފިލްމެކެވެ.

މަޖުބޫރުން ކުރާ ކައިވެންޏަށް ދަރިއަކު ލިބި އެކައިވެނި ރޫޅެއެވެ. އަދި އެކަނިވެރި މައެއްގެ ގޮތުގައި ދަރިފުޅު ބޮޑުކުރުމަށް އޭނާ މަސައްކަތް ފަށައެވެ. އަދި އޭނާއަށް ލިބިފައިވާ ލަވަކިޔުމުގެ ހުނަރު ތަރައްގީކޮށް ހުވަފެން ކާމިޔާބު ކުރުމަށް މަސައްކަތް ކުރެއެވެ.

އެލާ އަކީ ގުޖްރާތީ ފިލްމެއް ކަމަށްވާ "ބެޓާ ކާޑްގޯ" އަސްލަކަށް ބަލައިގެން އުފައްދާ ފިލްމެކެވެ.

އެލާ ޑައިރެކްޓް ކުރާނީ ޕްރަދީޕް ސަރްކާރްއެވެ.