އެމެރިކާގެ މަޝްހޫރު ފިލްމީ އަދި ޓީވީ ތަރި ޖެނިފަރ އެނިސްޓަންގެ 50 ވަނަ އުފަން ދުވަސް ހޯމަ ދުވަހު ފާހަގަކޮށްފައިވާއިރު، ޕާޓީއަށް އޭނާގެ ކުރީގެ ފިރިމީހާ ބްރެޑް ޕިޓް ދިއުމުން ދެ މީހުންގެ ފޭނުންތަކުގެ ހިތްތެޅެން ފަށައިފިއެވެ.
ހޮލީވުޑްގެ މަޝްހޫރު ހާޓްތްރޮބާއި 'ފްރެންޑްސް' ޝޯވއިން މަޝްހޫރުވި "އެމެރިކާސް ސްވީޓްހާޓް" ކައިވެނި ކުރީ 2000 ވަނަ އަހަރެވެ. އަދި މި ދެ މީހުން ހޮލީވުޑްގެ "އިޓް ކަޕްލް" އަށް ވެ، އެ މީހުން އަޅާ ހުރިހާ ފިޔަވަޅެއް ޕަޕަރާޒީން ނަގަން ފެށިއެވެ. ނަމަވެސް، 2005 ވަނަ އަހަރު ދެ މީހުންގެ ކައިވެނި ރޫޅިގެން ދިޔައީ ބްރެޑްގެ "މިސްޓަރ އެންޑް މިސިސް ސްމިތް" ފިލްމަށް ފަހުއެވެ. މި ފިލްމްގެ މައި ރޯލްގައި ފެންނަނީ ބްރެޑް ޕިޓާއި މަޝްހޫރު ތަރި އެންޖެލީނާ ޖޯލީއެވެ. ފިލްމްގެ ޝޫޓިންގގެ ތެރޭގައި ޖެނިފަރ އާއި ބްރެޑްގެ ކައިވެނީގައި މައްސަލަތަކެއް އުޅޭ ވާހަކަ ފެތުރެން ފެށިއެވެ. އަދި އެއީ އެންޖެލީނާގެ ސަބަބުން ކަމަށް ރިޕޯޓްތައް ފެތުރުނު ނަމަވެސް، ދެ މީހުން ވެސް އެ ވާހަކަތެއް ދޮގުކުރިއެވެ.
ޖެނިފަރ އާއި ބްރެޑް 2005 ވަނަ އަހަރުގެ ޖެނުއަރީ މަހު ވަކިވާން ނިންމިއިރު، އެ އަހަރުގެ އޭޕްރިލް މަހު އެންޖެލީނާގެ ދަރިފުޅު މެޑޮކްސްއާ އެކު އެންޖެލީނާ އާއި ބްރެޑް، ކެންޔާ އަށް ދަތުރުކުރިއެވެ.
އެހާ ހިސާބުން "ޓީމް އެނިސްޓަން" އާއި "ޓީމް ޖޯލީ" އެފެދުނެވެ. އަދި ދެ ތަރިންގެ ފޭނުން "އުމުރަށް" ޓީމެއް ނެގިއެވެ.
ދިހަ އަހަރަށް ވުރެ ގިނަ ދުވަސް އެކުގައި އުޅުމަށް ފަހު އެންޖެލީނާ އާއި ބްރެޑް ވަރިވެފައި ވަނީ 2016 ވަނަ އަހަރެވެ. ޖެނިފަރ ވެސް އެހެން މީހުންނާ ރަށްޓެހިވެފައިވާއިރު، އޭނާ އާއި ފިރިމީހާ، ފިލްމީތަރި ޖަސްޓިން ތަރޯ 2018 ވަނަ އަހަރު ވަރިވިއެވެ.
ދެ މީހުން ވެސް އަނެއްކާ ސިންގަލް ވުމަށްފަހު ބްރެޑް ޖެނިފަރއަށް ގުޅާ ކުރިން ކަންތައް ކުރެވުނު ގޮތާ މެދު މައާފަށް އެދިފައިވާ ކަމަށް ރިޕޯޓްތައް ބުނެއެވެ. ނަމަވެސް މި ކަމާ ގުޅޭ އެއްވެސް ވާހަކައެއް ދެ ތަރިން ދައްކާފައެއް ނުވެއެވެ.
އެހެންކަމުން، ޖެނިފަރގެ އުފަން ދުވަހުގެ ޕާޓީއަށް ބްރެޑް ދިއުމުން ފޭނުން ދިޔައީ ސިއްސައިގެންނެވެ. ވެސްޓް ހޮލީވުޑްގައި ހުންނަ ސަންސެޓް ޓަވަރގައި އޮތް މި ޕާޓީއަށް ބްރެޑް ގޮސްފައި ވަނީ ވަރުގަދަ ސެކިއުރިޓީއަކާއެކު އެވެ. އަދި ޕާޓީ ތެރޭ ސޯޝަލް މީޑިއާ ބޭނުން ނުކުރުމަށް ޖެނިފަރވަނީ އެދިފައެވެ. އެހެންކަމުން ބްރެޑްގެ ސާފު ފޮޓޯއެއް ލިބިފައެއް ނުވެއެވެ.
ޖެނިފަރގެ 50 ވަނަ އުފަން ދުވަހުގެ ހަފްލާއަށް ބްރެޑް ދިއުމުން ދެ މީހުން އަނެއްކާ އެކުގައި ފެންނާނެކަމަށް ފޭނުންދަނީ އުންމީދު ކުރަމުންނެވެ.
މި ހަފްލާއަށް ދިޔަ އެހެން ތަރިންގެ ތެރޭގައި 'ފްރެންޑްސް'ގައި ޖެނިފަގެ ކޯ-ސްޓާރުން ކަމަށްވާ ކޯޓްނީ ކޮކްސް އާއި ލީސާ ކުޑްރޯ، ރީސް ވިދަރސްޕޫން، އެލެން ޑިޖެނެރަސް، ޕޯޝާ ރޮސީ، ބާބަރާ ސްޓްރައިސެންޑް، ޑެމީ މުއަރ، ލޯރާ ޑަރން، ރޮބަޓް ޑައުނީ ޖޫނިއަރ، ކޭޓް ހަޑްސަން އަދި ބްރެޑްގެ ކުރީގެ ލޯބިވެރިއެއްކަމަށްވާ ގްވިނެތު ޕަލްޓްރޯ ހިމެނެއެވެ. މީގެ އިތުރުން، ބްރެޑްގެ ވެސް ގާތް އެކުވެރިއެއް ކަމަށްވާ ޖޯޖް ކްލޫނީ އާއި އޭނާގެ އަނބިމީހާ އަމާލް ވެސް މި ހަފްލާގައި ބައިވެރިވިއެވެ.
ބައެއް ރިޕޯޓްތަކުން ބުނާ ގޮތުގައި، ޕާޓީގައި ބްރެޑް ގިނަ ވަގުތު ހޭދަ ކުރީ ޖޯޖް އާއި އަމާލްއާ އެކުގައެވެ.
ބްރެޑް ޖެނިފަރގެ ޕާޓީއަށް ގޮސްފައިވާއިރު، އޭނާގެ ކުރީގެ ފިރިމީހާ ޖަސްޓިން ވަނީ އޭނާގެ އިންސްޓަގްރާމް މެދުވެރިކޮށް ދުވަހުގެ ތަހުނިޔާ ފޮނުވާފައެވެ.
