އަމީތާބް ބަލިވުމުގެ ސަބަބުން އާދިއްތަ ދުވަހު ފޭނުންނާ ބައްދަލުކުރުން ކެންސަލް!
ރިޕޯޓްތައް ބުނާ ގޮތުން އަމީތާބަށް ވަނީ ހެޕަޓައިޓިސް ބީ ޖެހިފައި
އަމީތާބް ބައްޗަން
އެކްޓަރ އަމީތާބް ބައްޗަން ބަލިވުމުގެ ސަބަބުން އަންނަ އާދިއްތަ ދުވަހު ފޭނުންނާ ބައްދަލުކުރުން ކެންސަލްކޮށްފިއެވެ.
އުމުރުން 76 އަހަރުގެ އަމީތާބުގެ ޖުހޫގައި ހުންނަ ގެ "ޖަލްސާ" ގައި ހުރެ ގޭގެ ބޭރުގައި އެއްވެ ތިބޭ ފޭނުންނާއި ބައްދަލުކުރާތާ 36 އަހަރު ވަނީ ވެފައެވެ. އަމީތާބާ ބައްދަލު ކުރުމަށް ކޮންމެ އާދިއްތަ ދުވަހަކު އިންޑިއާގެ އެކި ކަންކޮޅުތަކުން އެތައް ސަތޭކަ ބަޔަކު އެ ގޭ ދޮށަށް އެއްވެއެވެ.
އަމީތާބް އޭނާގެ އާއިލާއާ އެކު ގޭގައި ހުރެ ފޭނުންނަށް ވޭވްކޮށް ނަގާފައިވާ ފޮޓޯތައް ވަނީ ހިއްސާކޮށްފައެވެ.
ރިޕޯޓްތައް ބުނާ ގޮތުން އަމީތާބަށް ވަނީ ހެޕަޓައިޓިސް ބީ ޖެހިފައެވެ.
ބަލިވުމުގެ ސަބަބުން އާދިއްތަ ދުވަހު ބައިވެރި ވެވެން ނެތް ކަމަށާއި ނަމަވެސް ފޭނުން ކަންބޮޑު ނުވުމަށް އަމީތާބް ވަނީ އެދިފައެވެ.
އަމީތާބް އެންމެ ފަހުން ފެނިގެން ގޮސްފައި ވަނީ "ބަދްލާ" އިންނެވެ. އޭނާ މިވަގުތު ދަނީ އަންނަން އޮތް ފިލްމް "ބަރްމަސްތްރާ" އަދި "ތެރާ ޔާރު ހޫނ މައިން" ގެ މަސައްކަތް ކުރަމުންނެވެ.
