ގޮދަން ފުށުން ހަދާ ރޮށިން ސަބްސިޑީ ކަނޑާލައިފި

ގޮދަން ފުށުން ހަދާ ރޮށްޓަށް އުރުދުން ސަރުކާރުން ދެމުން އައި ސަބްސިޑީ ކަނޑާލައިފިއެވެ.

އުރުދުންގެ އާއްމު ކެއުމުގައި ބޭނުންކުރާ މިބާވަތުގެ ރޮށިން ސަބްސިޑީ ކަނޑާލާފައިމިވަނީ ބައިނަލްއަޤްވާމީ މާލީ އިދާރާ އައި.އެމް.އެފްގެ ލަފާގެ މަތިން އެޤައުމުން އަޅަމުންދާ އިޤްތިޞާދީ އިސްލާހީ ފިޔަވަޅުތަކެއްގެ ތެރެއިންނެވެ.

މިއީ ފާއިތުވި ވިއްސަކަށް އަހަރުތެރޭ މި ސަބްސިޑީއަށް ބަދަލެއް އަންނަ ފުރަތަމަ ފަހަރެވެ. 0.25 ދީނާރަށް ލިބުނު ގޮދަން ފުށުން ހަދާ ޕިޓާ ރޮއްޓެއްގެ އަގު މިހާރު ވަނީ 60 އިންސައްތަ އުފުލި، 0.40 ދީނާރަށް އަރާފައެވެ. މިއީ ގާތްގަނޑަކަށް 20 އެމެރިކާ ސެންޓުގެ އަގު ބޮޑުވުމެކެވެ.

ޕާނާއި ރޮށީގެ އެހެން ބާވަތްތަކުގެ އަގަކަށް ބަދަލެއް ނާދެއެވެ.

އުރުދުންގެ ނޫސްތައް ބުނާ ގޮތުން ސަބްސިޑީގެ އުޞޫލުތަކަށް މިއައި ބަދަލާއިއެކު އުރުދުންގެ ސަރުކާރަށް އަހަރަކު 70 މިލިއަން އެމެރިކާ ޑޮލަރު ސަލާމަތް ކުރެވޭނެއެވެ.

ސަބްސިޑީ ކަނޑާލި ނަމަވެސް ފަޤީރުންނަށް އެހީވާނެ އައު ނިޒާމެއް ސަރުކާރުން ވަނީ ޤާއިމްކޮށްފައެވެ. އެގޮތުން ފަޤީރުންނަށް ސީދާ ފައިސާގެ އެހީދޭން ނިންމާފައިވާއިރު، ސަބްސިޑީ ހައްޤުވާހާ ފަޤީރު ސިވިލް ސަރވިސްގެ މުވައްޒަފުންގެ މުސާރައަށް އެބައި އިތުރު ކުރެވޭނެއެވެ. އަދި ސިވިލް ސަރވިސްގައި މަސައްކަތް ނުކުރާ މީހުންނަށް ވެސް އެކަމަށް ޚާއްސަކޮށް ހަދާ ވެބްސައިޓްގައި ރަޖިސްޓްރީ ވެގެން ފައިސާ ލިބޭނެ އިންތިޒާމު ވަނީ ހަމަޖެހިފައެވެ. އަދި ބޭންކް އެކައުންޓެއް ނެތް ފަޤީރުންނަށް ވެސް ބޭންކްތައް މެދުވެރިކޮށް އެމީހުންނަށް ދޭ ފައިސާގެ އެހީ ނެގޭނެ އިންތިޒާމު އުރުދުން ސަރުކާރުން ދަނީ ހަމަޖައްސަމުންނެވެ.

ހޮނިހިރު ވިލޭރޭ މެންދަމުން ފެށިގެން އަގަށް ބަދަލު އަންނައިރު، މިއަހަރު ތެރޭ ގޮދަން ފުށުން ހަދާ ރޮށީގެ ބާވަތްތަކުގެ އަގު މިހާރު ކަނޑައަޅާފައިވާ އަގުތަކަށް ވުރެ އަގު ބޮޑު ނުކުރެވޭނެ ކަމަށް އުރުދުން ސަރުކާރުން ވަނީ ބުނެފައެވެ. އުރުދުންގައި މިއަހަރުގެ ނިޔަލަށް ބޭނުން ކުރާނެ ގޮދަށް ފުށުގެ ސްޓޮކެއް އެބަހުއްޓެވެ.

ސަބްސިޑީ ކަނޑާލާނެކަން އުރުދުން ސަރުކާރުން އިއުލާން ކޮށްފައިވަނީ އައި.އެމް.އެފްގެ ލަފަޔާއިއެކު އުރުދުންގެ ދަރަނި ކުޑަކޮށް، އިޤްތިޞާދު ހަމަޔަކަށް އެޅުވުމަށް މަސައްކަތްތަކެއް ކުރާނެކަން ސަރުކާރުން އިއުލާންކުރިތާ ހަފްތާއެއްހާ ދުވަސްފަހުންނެވެ.

މީގެ ކުރިން 1996ވަނަ އަހަރު ވެސް އައި.އެމް.އެފްގެ ލަފާގެ މަތިން މިފަދަ ފިޔަވަޅުތަކެއް އުރުދުން އިން އެޅިއެވެ. އެފަހަރު ވެސް ތަކެތީގެ އަގު ބޮޑުވެ، އެކަމުގެ ސަބަބުން މަދަނީ ހަމަނުޖެހުންތަކެއް އެޤައުމުގައި ހިނގިއެވެ.