ފާރިސް މިނިވަންވުމަކީ ހެޔޮ ޚަބަރެއް: އިނގިރޭސި ސަފީރު
25 ޖެނުއަރީ 2018 | ބުރާސްފަތި 16:51ސިޔާސީ ލީޑަރުންނަށް އިންތިޚާބުގައި ވާދަނުކުރެވޭ ހުކުމްތަކާއި ކުރިމަތިލާން ޖެހިފައިވޭ
ފާރިސް މިނިވަންވުމަށްފަހު މިއަދު އާއިލާގެ ބޭފުޅުންނާއި ސަޕޯޓަރުންނާއިއެކު ކްރިމިނަލް ކޯޓު ސަރަހައްދުގައި
ދިއްގަރު ދާއިރާގެ މެމްބަރު ފާރިސް މައުމޫން މިނިވަންވުމަކީ ހެޔޮ ޚަބަރެއް ކަމަށް އިނގިރޭސިވިލާތުން ރާއްޖެއަށް ކަނޑައަޅާފައިވާ ސަފީރު ޖޭމްސް ޑޯރިސް ވިދާޅުވެއްޖެއެވެ.
ކޯޓުން ފާރިސް ދޫކޮށްލުމާއި ގުޅިގެން ބުރާސްފަތި ދުވަހު ކުރެއްވި ޓްވީޓެއްގައި ސަފީރު ޑޯރިސް ވިދާޅުވީ އެހެން ސިޔާސީ ލީޑަރުންނަށް އިންތިޚާބުގައި ވާދަނުކުރެވޭ ހުކުމްތަކާއި ކުރިމަތިލާން ޖެހިފައިވާކަމަށެވެ. އޭގެ ތެރޭގައި ބަންދުގައި ހުންނަވާތާ 1000 ދުވަސްވެފައިވާ ޝައިޚް ޢިމްރާން ޢަބްދުﷲގެ ނަންފުޅު ޖޭމްސް ޑޯރިސް ވިދާޅުވިއެވެ.
ޑޯރިސް ވިދާޅުވީ ޑިމޮކްރަސީގައި މީހުންނަށް 'ޗޮއިސް' އޮންނަން ޖެހޭކަމަށާއި، ބޭނުން ވެރިޔަކު ހޮވުމުގެ މިނިވަންކަން ދިވެހިންނަށް ހައްޤުކަމަށެވެ.
އިނގިރޭސި ސަފީރު ކުރެއްވި ޓްވީޓް އެމެރިކާ ސަފީރު އަތުލް ކެޝަޕްވެސް ވަނީ ރީޓްވީޓްކުރައްވާފައެވެ.
ހަ މަސްދުވަހަށް ވުރެ ގިނަ ދުވަހު ހުކުމަކާއި ނުލައި ފާރިސް ޖަލުގައި ހުންނެވިއިރު، އެމަނިކުފާނު ދޫކޮށްލުމަށް ބައިނަލްއަޤްވާމީ މުޖްތަމައުންނާއި އިންސާނީ ހައްޤުތަކަށް މަސައްކަތްކުރާ ޖަމާޢަތްތަކުން ދިޔައީ ގޮވާލަމުންނެވެ. ފާރިސް ދޫކޮށްލާފައިވަނީ ކްރިމިނަލް ކޯޓުންނެވެ. އެމަނިކުފާނުގެ މައްޗަށް ކުރެވުނު ރިޝްވަތުގެ ތުހުމަތުގެ މައްސަލައިގެ ޝަރީޢަތް ނިމެންދެން ބަންދުގައި ބެހެއްޓުމަށް މިދިޔަ އަހަރު ކްރިމިނަލް ކޯޓުން ކުރި ޙުކުމް އިސްތިއުނާފުކުރުމަށް ހައި ކޯޓަށްވެސް ފާރިސްގެ ފަރާތްޕުޅުން ހުށަހެޅުއްވިއެވެ. އެހެން ނަމަވެސް ހައިކޯޓުގައި އެމައްސަލަ ވަނީ ހުއްޓިފައެވެ.
