އޮސްޓްރޭލިއަން އޯޕަން: ސެމީގެ މެޗުތައް ކަށަވަރުވެއްޖެ

މެލްބަންގައި މިހާރު ކުރިޔަށްދާ އޮސްޓްރޭލިއަން އޯޕަންގެ އަންހެން ސިންގަލްސް އިވެންޓްގެ ސެމީ ފައިނަލުގެ މެޗުތައް ކަށަވަރުވެއްޖެއެވެ.

މިއަހަރުގެ މުބާރާތުގެ ސެމީ ފައިނަލްއިން ޖާގަ ހޯދީ ޑެންމާކްގެ ކެރޮލައިން ވޮޒްނިއާކީ އާއި ރޯމޭނިއާގެ ސައިމޯނާ ހޭލެޕް އަދި ޖަރުމަނުގެ އެންޖެލިކް ކާބާގެ އިތުރުން ބެލްޖިއަމްގެ އެލީސް މާޓެންސްއެވެ.

މި މުބާރާތުގެ ދެވަނައަށް ސީޑު ކުރެވިފައިވާ ވޮޒްނިއާކީ ސެމީއަށް ދަތުރުކުރީ ދެ ސެޓު އެއް ސެޓުން ސްޕެއިންގެ ކާލާ ސުއަރޭޒް ނަވާރޯ ބަލިކޮށްގެންނެވެ. މި މެޗުގެ ފުރަތަމަ ސެޓު 6-0 އިން ވޮޒްނިއާކީ ގެންދިޔައިރު ނަވާރޯ ވަނީ ދެވަނަ ސެޓު 7-6 އިން ގެންގޮސް މެޗުގެ ނަތީޖާ ހަމަހަމަކޮށްފައެވެ. އެހެން ނަމަވެސް މެޗުގެ ނަތީޖާ ނެރުމަށް ކުޅުނު ތިން ވަނަ ސެޓު 6-2 އިން ގެންގޮސް ވޮޒްނިއާކީ ވަނީ ސެމީގެ ޖާގައެއް ކަށަވަރުކޮށްފައެވެ.

މެޗުން މޮޅުވުމަށް ފަހު ވާހަކަ ދައްކަމުން ވޮޒްނިއަކީ ބުނީ ސެމީގައި މާޓެންސްއާ ދެކޮޅަށް ކުޅެން ޖެހޭ މެޗަކީ ވަރަށް އުނދަގޫ މެޗެއް ކަމަށާއި މިއަހަރުގެ ތެރޭގައި އޭނާގެ ފަރާތުން ފެންނަމުން އަންނަނީ ތަފާތު މޮޅު ކުޅުމެއް ކަމަށެވެ. އޭނާ ބުނީ މިއަހަރު ބަލިނުވާ ކުޅުންތެރިޔަކާ ދެކޮޅަށް ކުޅެން ޖެހޭ މެޗު ވެގެންދާނީ ވަރަށް ހާއްސަ މެޗަކަށް ކަމަށެވެ.

ސެމީގައި ވޮޒްނިއާކީ ނުކުންނަން ޖެހޭނީ ބެލްޖިއަމްގެ އެލީސް މާޓެންސްއާ ދެކޮޅަށެވެ. އޭނާ ސެމީއަށް ދަތުރުކުރީ ކުއާޓާ ފައިނަލުގައި ހަތަރުވަނަ އަށް ސީޑުކުރެވިފައިވާ ޔޫކްރެއިންގެ އެލީނާ ސްވިޓޮލީނާ ސީދާ ދެ ސެޓުން ބަލިކޮށްގެންނެވެ. މި މެޗުގެ ސެޓުތައް މާޓެންސް ގެންދިޔައީ 6-4 އަދި 6-0 އިންނެވެ.

މި މުބާރާތުގެ އެއް ވަނައަށް ސީޑު ކުރެވިފައިވާ ރޯމޭނިއާގެ ސައިމޯނާ ހޭލެޕް ސެމީގެ ޖާގައެއް ކަށަވަރުކުރީ ކުއާޓާ ފައިނަލުގައި ސީދާ ދެ ސެޓުން ޗެކް ރިޕަބްލިކްގެ ކެރޮލައިން ޕްލިސްކޯވާ ބަލިކޮށްގެންނެވެ. މި މެޗުގެ ސެޓުތައް ހޭލެޕް ގެންދިޔައީ 6-3 އަދި 6-2 އިންނެވެ. ސެމީގައި އޭނާ ނުކުންނަން ޖެހޭނީ 21 ވަނައަށް ސީޑު ކުރެވިފައިވާ ޖަރުމަނުގެ އެންޖެލިކް ކާބާއާ ދެކޮޅަށެވެ.

މި މެޗުން މޮޅުވުމަށް ފަހު ވާހަކަ ދައްކަމުން ހޭލެޕް ބުނީ މެޗުގެ ފެށުން އެހާ ރަނގަޅު ނޫން ކަމަށާއި އެހެން ނަމަވެސް މެޗުގެ ވަކި ހިސާބަކުން ރަނގަޅު ކުޅުމެއް ދެއްކުނު ކަމަށެވެ. އޭނާ ބުނީ ސެމީގައި ކާބާއާ ދެކޮޅަށް ކުޅޭ މެޗު ވެގެންދާނީ ތަފާތު ޗެލެންޖަކަށް ކަމަށާއި އެ މެޗަށް ވަރަށް ރަނގަޅަށް ތައްޔާރުވާނެ ކަމަށެވެ. މެޗުގެ ނަތީޖާއަށް ނުވިސްނާނެ ކަމަށާއި ވިސްނާނީ އެންމެ ރަނގަޅު ކުޅުން ދެއްކުމަށް ކަމަށް ހޭލެޕް ބުނެފައި ވެއެވެ. އޭނާ ވެގެން ގޮސްފައި ވަނީ އޮސްޓްރޭލިއަން އޯޕަންގެ ސެމީ އިން ޖާގަ ހޯދި ރޯމޭނިއާއަށް ނިސްބަތްވާ ފުރަތަމަ ކުޅުންތެރިޔާއަށެވެ.

މި މުބާރާތުގެ ސެމީ ފައިނަލް އިން ކާބާ ޖާގަ ހޯދީ 17 ވަނައަށް ސީޑު ކުރެވިފައިވާ އެމެރިކާގެ މެޑިސަން ކީސް ސީދާ ދެ ސެޓުން ބަލިކޮށްގެންނެވެ. މި މެޗުގެ ސެޓުތައް އޭނާ ގެންދިޔައީ 6-1 އަދި 6-2 އިންނެވެ. އޭނާއަކީ މި މުބާރާތް 2016 ވަނަ އަހަރު ކާމިޔާބުކުރި ކުޅުންތެރިޔާއެވެ.