މޯލްސްޑިވްސް ހައްޖު ކޯޕަރޭޝަނާއި މޯލްޑިވްސް ޕޯރޓްސް ލިމިޑެޓް (އެމްޕީއެލް)، ސްޓޭޓް ޓްރޭޑިންގ އޮގަނައިޒޭޝަން (އެސްޓީއޯ) އަދި މޯލްޑިވްސް އެއާރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ބޯޑުތަކުގައި ހުސްވެފައިވާ މަގާމުތަކަށް މެމްބަރުން އައްޔަން ކުރައްވައިފިއެވެ. 

ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުގެ ރައީސް މުހައްމަދު ނިޒާރު ވިދާޅުވީ ހައްޖު ކޯޕަރޭޝަންގެ ބޯޑަށް އައްޔަން ކުރައްވާފައި ވަނީ އެ ބޯޑުގެ މެނޭޖިންގ ޑިރެކްޓަރުގެ މަގާމަށް ގ. ހުދުރުވާ، އިދްރީސް އިސްމާއީލް އާއި އެބޯޑުގެ ޑިރެކްޓަރުގެ މަގާމަށް ސ. ފޭދޫ ދިއްގާގަސްދޮށުގެ ހުސައިން ސައީދު މުހައްމަދު ކަމަށެވެ.

މީގެ އިތުރުން އެމްޕީއެލްގެ ބޯޑު މެމްބަރު ކަމަށް ގދ. ތިނަދޫ މުސްތަރީގޭ، އާއިޝަތު ރާޔަން ޝަރީފް އައްޔަން ކުރައްވާފައިވާއިރު، އެސްޓީއޯގެ ބޯޑު މެމްބަރު ކަމަށް ހ. ތަރަފު، މަރިޔަމް ޒާހިޔާ އަދި އެއާރޕޯޓް ކޮމްޕެނީގެ ބޯޑު މެމްބަރު ކަމަށް ޅ. ނައިފަރު އަޅިވިލާގެ، އަހުމަދު ޝަރީފް އަބްދުއްރަހްމާން ޔޫސުފް އައްޔަން ކުރައްވާފައި ވެއެވެ.

ހައްޖު ކޯޕަރޭޝަންގެ މެނޭޖިންގ ޑިރެކްޓަރުގެ މަގާމުގައި ކުރިން ހުންނެވި ޔާމީން އިދްރީސް އާއި ޑިރެކްޓަރުގެ މަގާމުގައި ހުންނެވި ފަރުހާދު ދާއޫދު އެމަގާމުން ވަކިކުރައްވާފައި މިމަހުގެ 18 ވަނަ ދުވަހުއެވެ.

ސަރުކާރު ހިއްސާވާ ކުންފުނިތަކުގެ ބޯޑުތަކަށް ބަދަލުތަކެއް އަންނަމުންދާ މިދަނޑިވަޅުގައި މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރުޑީސީ) އުވާލަން އުޅޭކަމުގެ ވާހަކަތަކެއް ވެސް ދަނީ ފެތުރެމުންނެވެ.