އެޓްލެޓިކޯ މެޑްރިޑްއަށް ކުޅެމުން އަންނަ ފްރާންސްގެ ފޯވާޑް އެންޓޮއިން ގްރީޒްމަންއާއެކު އެއްބަސްވުމަކަށް އާދެވިފައި ނުވާ ކަމަށް ބާސެލޯނާއިން ބުނެފިއެވެ.

ސްޕެއިންގެ ބައެއް ނޫސްތަކުން ވަނީ އޭނާ ބާސާއަށް ބަދަލުވުމަށް އެ ޓީމާއެކު އެއްބަސްވުމަކަށް އައިސްފައިވާ ކަމަށް ބުނެ ހަބަރު ފަތުރާފައެވެ. އެގޮތުން ބައެއް ރިޕޯޓުތަކުގައި ވާގޮތުން އާޑާ ޓުރާން އެ ޓީމު ދޫކޮށްލުމާއެކު ހުސްވެފައިވާ ހަތް ނަމްބަރު ޖާޒީ އެ ޓީމާއި އަލަށް ގުޅުނު ފިލިޕޭ ކުޓީނިއޯއަށް ދީފައި ނުވަނީ ގްރީޒްމަންއަށް އެ ނަމްބަރު ދިނުމުގެ ގޮތުން ކަމަށެވެ.

އެހެން ނަމަވެސް ބާސާގެ ރަސްމީ ވެބްސައިޓް މެދުވެރިކޮށް އެ ޓީމުން ވަނީ އޭނާ އާއެކު އެއްވެސް ޒާތެއްގެ އެއްބަސްވުމަކަށް އައިސްފައި ނުވާނެ ކަމަށް ބުނެ އެ ހަބަރުތައް ދޮގުކޮށްފައެވެ. މި ބަޔާނުގައި ވަނީ އެޓްލެޓިކޯ މެޑްރިޑްއަށް އެ ޓީމުން ފުރިހަމަޔަށް އިހުތިރާމުކުރާ ކަމަށާއި އަދި މިފަދަ ރިޕޯޓުތައް ފެތުރުމަކީ ވަރަށް ދެރަކަމެއްގެ ގޮތުގައި އެ ޓީމުން ވަނީ ސިފަކޮށްފައެވެ.

އެޓްލެޓިކޯއާ އެކު ގްރީޒްމަން ހަދާފައިވާ ކޮންޓްރެކްޓްގެ މުއްދަތު ހަމަވަނީ 2022 ވަނަ އަހަރު ކަމަށްވާއިރު އޭނާގެ ރިލީޒް ފީއެއްގެ ގޮތުގައި ކޮންޓްރެކްޓްގައި ކަނޑައަޅާފައި ވަނީ 200 މިލިއަން ޔޫރޯއެވެ. އެހެން ނަމަވެސް އަންނަ އަހަރުގެ ޖުލައި މަހަށް ފަހު މި އަދަދު 100 މިލިއަން ޔޫރޯއަށް ދަށްވެގެން ދާނެއެވެ.

މިދިޔަ ޑިސެމްބަރު މަހުގެ ތެރޭގައި އެޓްލެޓިކޯ އިން ވަނީ އެ ކްލަބުގެ ހުއްދަ ހޯދުމަކާއި ނުލައި އެ ކްލަބުގެ ވާދަވެރި ބާސެލޯނާއިން ގްރީޒްމަންއާ މަޝްވަރާކުރި ކަމަށް ބުނެ އެ މައްސަލަ ފީފާއަށް ހުށަހަޅާފައެވެ. ބާސާގެ ޑިރެކްޓަރު ވެސް ވަނީ މިފަދަ ކަމެއް ހިނގާފައިވާ ކަމުގެ އިޝާރާތެއް ދީފައެވެ. ފީފާއިން ވެސް ވަނީ އެޓްލެޓިކޯއިން މިފަދަ މައްސަލައެއް ހުށަހެޅިކަން ކަށަވަރު ކޮށްދީފައެވެ.

އެޓްލެޓިކޯ މެޑްރިޑުގައި ހުރެ މުބާރާތްތައް ކާމިޔާބު ނުކުރެވޭތީ ގްރީޒްމަން ހިތްހަމަނުޖެހުން ފާޅުކޮށްފައިވެއެވެ. ބާސާގެ އިތުރުން އިނގިރޭސިވިލާތުގެ މެންޗެސްޓާ ޔުނައިޓެޑުން ވެސް އަންނަނީ އުމުރުން 26 އަހަރުގެ ފޯވާޑުގެ ސޮއި ހޯދުމުގެ މަސައްކަތް ކުރަމުންނެވެ. މިކަމާއި ގުޅިގެން އެ ޓީމުން ބުނެފައިވަނީ ގްރީޒްމަންގެ އަގަކީ 200 މިލިއަން ޔޫރޯ ކަމަށެވެ.

އެޓްލެޓިކޯގެ ކޯޗު ވެސް ވަނީ އޭނާ އެހެން ކްލަބަކަށް ބަދަލުވާން ބޭނުންވާ ނަމަ އެކަމަށް ހުރަސް ނާޅާނެ ކަމަށް ބުނެފައެވެ. އެހެން ނަމަވެސް އެ ކްލަބުގެ ޗީފް އެގްޒެކްޓިވް ވިދާޅުވީ ފިނި މޫސުމުގެ ޓްރާންސްފާގައި ވިޔަސް ނުވަތަ ހޫނު މޫސުމުގެ ޓްރާންސްފާގައި ވެސް އޭނާ އެހެން ކްލަބަކަށް ވިއްކާލުމުގެ ހިޔާލެއް ނެތް ކަމަށާއި އޭނާއަކީ ކްލަބަށް ވަރަށް މުހިންމު ކުޅުންތެރިޔެއް ކަމަށެވެ. އަދި އޭނާއާ އެކު އެ ކްލަބަށް ވެސް ކާމިޔާބު ހޯދިފައިވާ ކަމަށާއި އުއްމީދަކީ އޭނާއާ އެކު އަދިވެސް އިތުރު ކާމިޔާބު ހޯދުން ކަމަށް މިގުއެލް ވިދާޅުވިއެވެ.

ފްރާންސްގެ ގައުމީ ޓީމުގައި ވެސް މުހިންމު ދައުރެއް އަދާކުރަމުން އަންނަ ފޯވާޑް ރެއާލް ސޮސިއެޑާޑް ދޫކޮށް އެޓްލެޓިކޯއަށް ބަދަލުވެފައި ވަނީ 2014 ވަނަ އަހަރުއެވެ. އޭނާ ވަނީ މިހާތަނަށް އެ ޓީމަށް ކުޅުނު182  މެޗުގައި 91 ލަނޑު ޖަހަދީފައެވެ.