މިހާރު ދުނިޔޭގައި ހުރި އެންމެ މޮޅު ކުޅުންތެރިޔަކީ ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ނޫން ކަމަށާއި އެ ކުޅުންތެރިޔަކީ ބާސެލޯނާއަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީ ކަމަށް ބްރެޒިލްގެ ލެޖެންޑް ޕެލޭ ބުނެފިއެވެ.

ތިން ފަހަރެއްގެ މަތިން ބްރެޒިލްއާ އެކު ވޯލްޑް ކަޕް ކާމިޔާބުކޮށްފައިވާ ޕެލޭ ފާހަގަކުރެވިފައި ވަނީ ދުނިޔޭގެ ތާރީހުގައި ވެސް އުފެދުނު އެންމެ މޮޅު ކުޅުންތެރިންގެ ތެރޭގައި ގުނާލެވޭ ކުޅުންތެރިއެއްގެ ގޮތުގައެވެ. ޕެލޭއާ އެކު މެސީ އަދި ރޮނާލްޑޯއަކީ ވެސް މި ލިސްޓުގައި ހިމެނޭ ކުޅުންތެރިން ކަމަށް ގިނަ ބަޔަކު ގަބޫލުކުރާ އިރު ވޭތުވެދިޔަ 10 އަހަރުގެ ތެރޭގައި ފީފާ އިން ދިން އެންމެ މޮޅު ކުޅުންތެރިޔާގެ އެވޯޑު ލިބިފައި ވަނީ މި ދެ ކުޅުންތެރިންގެ ތެރެއިން ކޮންމެ ވެސް އެއް ކުޅުންތެރިޔަކަށެވެ. އެގޮތުން ކޮންމެ ކުޅުންތެރިޔަކު ވެސް ވަނީ ފަސް ފަހަރު އެ އެވޯޑު ހޯދާފައެވެ.

މި ދެ ކުޅުންތެރިންގެ ތެރެއިން އެންމެ މޮޅު ކުޅުންތެރިޔަކީ ކާކުތޯއާ މެދު ބަހުސް އުފެދިފައިވާތާ އެތަކެއް އަހަރުތަކެއް ވަނީ ވެފައެވެ. ޕެލޭ ވެސް ވަނީ މި ބަހުސްގައި އޭނާގެ ހިޔާލު ހުށަހަޅާފައެވެ.

ޓީވީ ޗެނަލަކާ ވާހަކަ ދައްކަމުން ޕެލޭ ބުނީ މިހާރު ދުނިޔޭގައި ފާހަގަކޮށްލެވޭ ތަފާތު ކުޅުންތެރިންގެ ތެރޭގައި ތިބީ އެންމެ ދެ ކުޅުންތެރިން ކަމަށާއި އެއީ ދެރަވާން ޖެހޭ ކަމެއް ކަމަށެވެ. އޭނާ ބުނީ މީގެ ކުރިން ޔޯހާން ކްރަޔަފް އާއި ޑިއޭގޯ މެރަޑޯނާ، ޒިކޯ އަދި އޭނާއަކީ ވެސް އެ ލިސްޓްގައި ގުނާ ކުޅުންތެރިން ކަމަށެވެ. އޭރު އެންމެ މޮޅު ކުޅުންތެރިންގެ ގޮތުގައި ގުނާލެވޭ ގިނަ ކުޅުންތެރިން ތިބިކަން ފާހަގަކުރަމުން ޕެލޭ ބުނީ ދެން އެންމެ އަވަހަށް ލިސްޓަށް އިތުރުވާނީ ނޭމާ ކަމަށެވެ.

ޕެލޭ ބުނީ މިހާރު ދުނިޔޭގައި ހުރި އެންމެ މޮޅު ކުޅުންތެރިޔަކީ މެސީ ކަމަށާއި ވޭތުވެދިޔަ 10 އަހަރު ވެސް އެކަން އޮތީ އެހެން ކަމަށެވެ. އޭނާ ބުނީ ރޮނާލްޑޯއަކީ ލަނޑުޖަހަން މޮޅު ކުޅުންތެރިޔެއް ކަމަށާއި އެހެން ނަމަވެސް މެސީއަކީ ހުރިހާ ގޮތަކުން ވެސް ފުރިހަމަ ކުޅުންތެރިޔެއް ކަމަށެވެ. އޭނާ ބުނީ މެސީއަކީ ލަނޑު ޖެހުމުގެ އިތުރަށް ޓީމުގެ ގޮވައިގެން ކުރިޔަށްދާ ކުޅުންތެރިޔެއް ކަމަށާއި އެހެންކަމުން އޭނާ ޓީމެއް ހަދާ ނަމަ ރޮނާލްޑޯގެ ކުރިން އެ ޓީމަކަށް މެސީ ނަގާނެ ކަމަށް ޕެލޭ ބުނެފައިވެއެވެ.

ރޮނާލްޑޯ އާއި މެސީއާ ދެމެދު އުފެދިފައިވާ ވާދަވެރިކަމާއި އެއްވަރަށް މެރަޑޯނާ އަދި ޕެލޭއާ ދެމެދު ވެސް ވަނީ ވާދަވެރިކަން އުފެދިފައެވެ. ޕެލޭ އަދި މެރަޑޯނާ ވެސް ބުނަމުން އަންނަނީ އެ ކުޅުންތެރިންނަކީ ދުނިޔޭގެ ތާރީހުގައި ވެސް އުފެދުނު އެންމެ މޮޅު ކުޅުންތެރިން ކަމަށެވެ. އަދި ވަރަށް ގިނައިން މި ދެ ލެޖެންޑުން ބަހުގެ ހޫނު ހަމަލާ ބަދަލުކުރާ މަންޒަރު ފެނެއެވެ.