އުތުރު ކޮރެއާ އާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ދެކޮޅަށް ރަޝިއާ އިން ދަނީ މަސައްކަތް ކުރަމުން: ރައީސް ޓްރަމްޕް
18 ޖެނުއަރީ 2018 | ބުރާސްފަތި 15:00ރައީސް ޓްރަމްޕް ވިދާޅުވީ އުތުރު ކޮރެއާ އިން އެމެރިކާ އާ ހަމައަށް ފޯރާވަރުގެ ބެލިސްޓިކް މިސައިލް ޓެސްޓްތައް ތަރައްގީ ކުރުމުގައި ދުވަހެއް ދުވަހަކަށް ކުރިހޯދަމުންދާ ކަމަށް
ރައީސް ޓްރަމްޕް | ގެޓީ އިމޭޖަސް
އުތުރު ކޮރެއާ އާ ދެކޮޅަށް ބައިނަލްއަގްވާމީ މުޖުތަމައު އިން އަޅާފައިވާ ދަތިކުރުމުގެ ފިޔަވަޅުތަކުން ސަލާމަތްވުމަށް އެގައުމަށް ރަޝިއާ އިން ވާގިވެރިވަމުންދާ ކަމަށް އެމެރިކާގެ ރައީސް ތުހުމަތު ކުރައްވައިފިއެވެ.
ވައިޓް ހައުސްގެ އޯވަލް އޮފީހުގައި ބުދަ ދުވަހު ރޮއިޓާސް އަށް ރައީސް ޓްރަމްޕް ވިދާޅުވީ އުތުރު ކޮރެއާ އިން އެމެރިކާ އާ ހަމައަށް ފޯރާވަރުގެ ބެލިސްޓިކް މިސައިލް ޓެސްޓްތައް ތަރައްގީ ކުރުމުގައި ދުވަހެއް ދުވަހަކަށް ކުރިހޯދަމުންދާ ކަމަށެވެ. އަދި އުތުރު ކޮރެއާގެ އަމަލުތަކާ ގުޅިގެން ބައިނަލްއަގްވާމީ މުޖުތަމައު އިން އެގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ އެއްކޮޅަށް ޗައިނާ އިން މަސައްކަތް ކުރަމުންދާ ކަމަށާއި އެގޮތުން ޗައިނާ އިން އުތުރު ކޮރެއާ އަށް ފޯރުކޮށްދޭ ތެލާއި ބޯޓުދެލި މަދުކުރުމަށް މަސައްކަތް ކުރަމުންދާ ކަމަށެވެ. އެހެންނަމަަވެސް އުތުރު ކޮރެއާ އާ ދެކޮޅަށް ޗައިނާ އަށް މިހާރަށްވުރެވެސް ބޮޑަށް މަސައްކަތް ކުރެވޭނެ ކަމަށް ރައީސް ޓްރަމްޕް ވިދާޅުވިއެވެ.
ރައީސް ޓްރަމްޕް ވިދާޅުވިީ އުތުރު ކޮރެއާ މައްސަލާގައި ރަޝިއާ އިން އެއްެވެސް މިންވަރަކަށް އެހީތެރިވަމުން ނުދާ ކަމަށާއި ރަޝިއާ އިން ކޮށްދޭހާ ވެސް ކަމަަކީ "ޗައިނާ އިން ދޭ އެއްބާރުލުން ފަނޑުކޮށްލުން ކަމަށެވެ." ރައީސް ޓްރަމްޕް އިތުރަށް ވިދާޅުވީ ރަޝިއާ ގެ ރައީސް ވްލަޑީމިއާ ޕޫޓިން އުުތުރު ކޮރެއާ މައްސަލާގައި "އުތުރު ކޮރެއާ އާ އެއްކޮޅަށް ގަސްތުގައި މަސައްކަތް ކުރައްވާ ކަމަށް ބެލެވޭ ކަމަށެވެ.
އުތުރު ކޮރެއާ މައްސަލާގައި "ސާފު ލޮލަކާއި އެކީ" އުތުރު ކޮރެއާއާ އެކު މަތީ ފެންވަރުގެ މަޝްވަރާތައް ކުރިއަށް ގެންދާނެ ކަމަށް ދާދިފަހުން ދެކުނު ކޮރެއާ އިން ވަނީ ބުނެފައެވެ. ދެކުނު ކޮރެއާ އިން މިހެން ބުނި އިރު ބައިނަލްއަގްވާމީ މުޖުތަމައު އިން ބުނަމުން ދަނީ އުތުރު ކޮރެއާ އިން މަޝްވަރާއަކަށް އިޚްލާސްތެރި ހިތެއް ނެތް ކަމަށާއި އެގައުމުން ބޭނުން ވަނީ ނިއުކްލިއާ ޕްރޮގްރާމް ހިންގުމަށް ފުރުސަތު ހޯދުމަށް ވަގުތު ދުއްވާލުމަށް ކަމަށެވެ.
އަންނަ މަހު ދެކުނު ކޮރެއާގައި ބާއްވާ ވިންޓާ އޮލިމްޕިކްސްގައި އުތުރު ކޮރެއާ އާއި ދެކުނު ކޮރެއާ އިން އެއްބައެއްގެ ގޮތުގައި އެއް ދިދައެއްގައި މާޗް ކުރުމަށް ވަނީ ނިންމާފައެވެ. ވިންޓާ އޮލިމްޕިކްސް ބާއްވަނީ ފެބްރުއަރީ މަހުގެ 9 އިން 25 އަށް ދެކުނު ކޮރެއާގެ ޕިޔޮންޔަންގައެވެ.
އިނަލްއަގްވާމީ ދުނިޔެއިން ތަކުރާރުކޮށް އުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. މިހާތަނަށް އދ. އާއި އެމެރިކާ އިން ވެސް ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އެހެން ނަމަވެސް އުތުރު ކޮރެއާގެ އަމަލުތަކަކަށް ބަދަލެއް ނާދެއެވެ.
