އިނގިރޭސި އެފްއޭ ކަޕްގައި ޕެނަލްޓީ ޖަހައިގެން ނޯވިޗް ސިޓީ ބަލިކޮށް ޗެލްސީ އިން ހަތަރު ވަނަ ބުރުގެ ޖާގައެއް ކަށަވަރުކޮށްފިއެވެ.

މި ދެ ޓީމު ބައްދަލުކުރި ފުރަތަމަ ލެގުގެ މެޗު 0-0 އިން އެއްވަރުވި އިރު ދެވަނަ ލެގު ވެސް ނިމުނީ 1-1 އިން އެއްވަރުވެގެންނެވެ. އެހެން ނަމަވެސް ޗެލްސީ ހަތަރު ވަނަ ބުރަށް ކޮލިފައިވީ ޕެނަލްޓީގައި 5-3 އިން ކުރި ހޯދައިގެންނެވެ. ޗެލްސީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެ ޓީމުން ވަނީ ލަނޑު ޖެހުމަށް ގިނަ ފުރުސަތުތަކެއް ތަނަވަސްކޮށްފައެވެ.

އަމިއްލަ ދަނޑު ކަމަށްވާ ސްޓެމްފޯޑް ބްރިޖްގައި ކުޅުނު މި މެޗުގައި ޗެލްސީގެ ފަރާތުން ރަނގަޅު ކުޅުމެއް ފެނިގެންދިޔައިރު އެ ޓީމުން ވަނީ ފުރަތަމަ ހާފުގައި ގިނަ ވަގުތު ބޯޅަ ގެންގުޅެ ނޯވިޗްގެ ހާފަށް ބާރުބޮޑުކޮށްފައެވެ. ހަމައެހެންމެ ނޯވިޗް އިން ވެސް ވަނީ ލަނޑު ކައުންޓާގައި ލަނޑު ޖެހުމަށް ރަނގަޅު ފުރުސަތުތަކެއް ތަނަވަސްކޮށްފައެވެ. ފުރަތަމަ ހާފުގައި ދެ ޓީމުން ކުރެ ޓީމަކަށް ލަނޑެއް ޖެހިފައެއް ނުވެއެވެ.

ދެވަނަ ހާފުގައި ދެ ޓީމުގެ ފަރާތުން ވެސް ފޯރިގަދަ ކުޅުމެއް ފެނިގެންދިޔައިރު މެޗުގެ ފުރަތަމަ ލަނޑު ޖަހާ ލީޑު ނެގީ ޗެލްސީ އިންނެވެ. މެޗުގެ 55 ވަނަ މިނެޓުގައި ކެނެޑީ ނަގައިދިން ހުރަހެއް ގޯލުގެ ތެރެއަށް ފޮނުވާލައިގެން ޗެލްސީއަށް ލީޑު ނަގައިދިނީ މިޗީ ބަޓްޝުއާއީއެވެ. މި ލަނޑަށް ފަހު ނޯވިޗް އިން އެ ޓީމުގެ ކުޅުން ރަނގަޅުކުރިއިރު އެ ޓީމުން ވަނީ ލަނޑު ޖެހުމަށް ނުރައްކާތެރި ފުރުސަތުތަކެއް ތަނަވަސްކޮށްފައެވެ. ނޯވިޗްއަށް މެޗުގެ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައި ނަތީޖާ ހަމަހަމަކޮށްދިނީ ޖަމާލް ލުއިސްއެވެ.

ފުރިހަމަ ވަގުތު ހަމަވިއިރު ވެސް ދެ ޓީމު އެއްވަރުވެ އޮތުމާ ގުޅިގެން ކުޅުނު 15 މިނެޓުގެ ދެ ހާފުގައި ދެ ޓީމުގެ ފަރާތުން ވެސް ވަރުބަލިކަން ވަރަށް ބޮޑަށް ފެނިފައިވެއެވެ. އިތުރު ވަގުތުގެ ދެވަނަ ހާފުގައި ޗެލްސީގެ ދެ ކުޅުންތެރިޔަކަށް ރަތް ކާޑު ދައްކާފައިވެއެވެ. އެއީ އަލްވާރޯ މޮރާޓާ އަދި ޕެޑްރޯ ރޮޑްރިގޭޒްއެވެ.

ނަތީޖާ ނެރުމަށް ޖެހި ޕެނަލްޓީގައި ޗެލްސީއިން ޕެނަލްޓީ ޖެހި ހުރިހާ ކުޅުންތެރިން ޕެނަލްޓީތައް ކާމިޔާބުކުރިއެވެ. އެއީ ވިލިއަން، ޑޭވިޑް ލުއިޒް، ސެޒާ އަޒްޕްލިކުއެޓާ، އެންގޯލޯ ކަންޓޭގެ އިތުރުން އެޑެން ހަޒާޑްއެވެ. ނޯވިޗްއިން ޕެނަލްޓީ ޖެހި ކުޅުންތެރިންގެ ތެރެއިން ޖޭމްސް މެޑިސަން އާއި މާރިއޯ ވްރަނިސިޗް އަދި ޖޯޝް މާފީ އެ ކުޅުންތެރިން ޖެހި ޕެނަލްޓީ ކާމިޔާބުކުރިއިރު ނެލްސަން އޮލިވޭރާ ޖެހި ޕެނަލްޓީ ޗެލްސީގެ ކީޕަރު ދިފާއުކުރިއެވެ.

ވިގަން އެތުލެޓިކް ވެސް ވަނީ 3-0 އިން ބޯންމައުތު ބަލިކޮށް ހަތަރުވަނަ ބުރަށް ދަތުރުކޮށްފައެވެ. ހަމައެހެންމެ ސްވަންސީ ސިޓީ ވެސް ވަނީ 2-1 އިން ވޮލްވަހެމްޕްޓަން ވޮންޑަރަރސް ބަލިކޮށް ހަތަރުވަނަ ބުރުގެ ޖާގައެއް ހޯދާފައެވެ. މި މެޗުގައި ސްވަންސީގެ ލަނޑުތައް ވިލްފްރީޑް ބޮނީ އާއި ޖޯޑަން އަޔޫ ޖަހައިދިންއިރު ވޮލްވްސް ލަނޑު ޖަހައިދިނީ ޑިއޯގޯ ޖޯޓާއެވެ.

ހަތަރު ވަނަ ބުރުގައި ޗެލްސީ ކުޅެން ޖެހޭނީ ނިއުކާސަލް ޔުނައިޓެޑާއި ދެކޮޅަށެވެ.