ގާސިމްގެ ރިސޯޓްތަކަށް ފުލުހުން އެރިނަމަވެސް ތިޔަ ގެއްލުން ދެވެނީ މުޅި ރާއްޖޭގެ ފަތުރުވެރިކަމަށް: ރައީސް ނަޝީދު

ޖުމްހޫރީ ޕާޓީގެ ލީޑަރު އަދި މަޝްހޫރު ވިޔަފާރި ވެރިޔާ ގާސިމް އިބްރާހީމްގެ ރިސޯޓުތަކަށް ފުލުހުން އަރުވައިގެން މިސަރުކާރުން ކުރަމުންދާ ކަންކަންމުން ގެއްލުންވާނީ ހަމައެކަނި ގާސިމްއަށް ނޫން ކަމަށާއި އެއީ މުޅި ދިވެހިރާއްޖޭގެ ފަތުރުވެރިކަމުގެ ސިނާއަތަށް ދެވޭ ގެއްލުމެއް ކަމަށް ކުރީގެ ރައީސް އަދި އިދިކޮޅު އެމްޑީޕީގެ ލީޑަރު މުހައްމަދު ނަޝީދު ވިދާޅުވެއްޖެ އެވެ.

ރައީސް ނަޝީދު ބުރާސްފަތި ދުވަހު ކުރެއްވި ޓްވީޓެއްގައި ވިދާޅުވީ ބަނގުރާ ހުރިކަމަށް ބުނެ، ސިޔާސީ ބޭނުމަށް ރިސޯޓްތަކަށް ފުލުހުން ފޮނުވައިގެން ފަތުރުވެރިން ބިރު ގެންނެވުމުން ގެއްލުން އެ ދެވެނީ މުޅި ފަތުރުވެރިކަމުގެ ސިނާއަތަށް ކަމަށެވެ. އަދި މިކަން ކުށްވެރި ކުރައްވާ ކަމަށްވެސް ރައީސް ނަޝީދު ވިދާޅުވި އެވެ.

މިމައްސަލައާ ގުޅިގެން ފުލުހުންގެ މީޑިއާ އޮފިޝަލް ވިދާޅުވެފައި ވަނީ މޯލްޑިވްސް ކަސްޓަމްސް ސާރވިސް އިން ކުރިއަށް ގެންދާ އޮޕަރޭޝަނަކަށް ފުލުހުން އެހީތެރިކަން ދެމުންދާ ކަމަށެވެ.