ރާއްޖޭގައި 127 ރިސޯޓް އޮންނައިރު ވަކި މީހެއްގެ ރިސޯޓްތައް ޗެކްކުރުމަކީ ކޮންކަހަލަ ކަމެއް: ރައީސް މައުމޫން
ދެން ވެސް ބުނާނެ ހުރިހާ ކަމެއް ކުރަނީ އިންސާފުންނޭ
ރައީސް މައުމޫން
ރާއްޖޭގައި 127 ރިސޯޓް އޮންނައިރު ވަކި މީހެއްގެ ރިސޯޓްތަކަކަށް ކުއްލިއަކަށް އަރައި ޗެކްކުރުމަކީ ކޮންކަހަލަ އިންސާފެއްތޯ ކުރީގެ ރައީސް މައުމޫން އަބްދުލްގައްޔޫމް ސުވާލު ކުރައްވައިފިއެވެ.
ރައީސް މައުމޫން މިހެން ވިދާޅުވެފައި މިވަނީ އިދިކޮޅު ހަތަރު ލީޑަރުންގެ ތެރޭގައި ހިމެނިވަޑައިގަންނަވާ ޖުމްހޫރީ ޕާޓީގެ ލީޑަރ ޤާސިމް އިބްރާހީމްގެ ފަސް ރިސޯޓަކަށް ކަސްޓަމާއި މީރާ އަދި ފުލުހުން އަރައި ކުއްލި ގޮތަކަށް ޗެކްކުރަން ފެށުމާ ގުޅިގެންނެވެ.
ރައީސް މައުމޫން ކުރެއްވި ޓްވީޓެއްގައި ވިދާޅުވީ ރާއްޖޭގައި 127 ޓުއަރިސްޓް ރިސޯޓް، 14 ޓުއަރިސްޓް ހޮޓެލް، 450 ޓުއަރިސްޓް ގެސްޓް ހައުސް އަދި 130 ޓުއަރިސްޓް ސަފާރީ އުޅަނދު އޮތްއިރު އެންމެ މީހެއްގެ ފަސް ރިސޯޓް ކުއްލިއަކަށް ފުލުހުންނާއި ކަސްޓަމްސް މީހުން ގޮސް ޗެކްކުރުމަކީ ކޮންކަހަލަ ކަމެއްތޯއެވެ. އަދި "ދެން ވެސް ހުރިހާ ކަމެއް ކުރަނީ އިންސާފުން ކަމަށް ބުނާނެ" ކަމަށް ރައީސް މައުމޫން ވަނީ ވިދާޅުވެފައެވެ.
ކޯޓު އަމުރެއްގެ ދަށުން ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ހުރިހާ ރިސޯޓްތަކެއް ފުލުހުން ވަނީ ބުދަ ދުވަހުގެރޭ ބަލާ ފާސް ކުރަން ފަށާފައެވެ.
ރާއްޖެއެމްވީއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ކަސްޓަމްސް އިން ކުރިއަށް ގެންދާ އޮޕަރޭޝަނަކަށް ފުލުހުން އެހީތެރިކަން ދެމުންދާ ކަމަށެވެ.
ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ކޯޓު އަމުރަކާ އެކު ފުލުހުން ފާސްކުރަނީ ޕެރަޑައިސް އާއި ސަން އައިލެންޑާއި ހޮލިޑޭ އައިލެންޑްގެ އިތުރުން ފަން އައިލެންޑް ރިސޯޓެވެ. މިއީ ގާސިމް އިބްރާހިމްގެ ތިން ރިސޯޓެއެވެ.
މައުލޫމާތު ލިބިފައިވާ ގޮތުގައި ފުލުހުންނާ އެކު ކަސްޓަމްސް އާއި މީރާގެ މުވައްޒިފުން އެ ރިސޯޓްތަކުގައި ދަނީ ހަރަކާތެރިވަމުންނެވެ.
