ސައުދީ އަރަބިއާ އިން ހޯދަމުން ދިޔަ ޓެރަރިސްޓް، ޢަބްދުﷲ ބިން މިރްޒާ އަލް ޤަލާފް މަރާލައިފިއެވެ.
އަލް ޤަލާފް ހޯދައި، އޭނާ މަރާލާފައި ވަނީ ސައުދީގެ ސަލާމަތީ ބާރުތަކުން އެ ޤައުމުގެ ޤާތިފްގެ އަވާމިޔާ އަވަށުގައި ހިންގި އޮޕަރޭޝަނެއްގައެވެ.
ސައުދީގެ އޮފިޝަލަކާ ހަވާލާދީ ސައުދީގެ ނޫސްތަކުގައި ބުނެފައި ވަނީ، ޤަލާފް ހޯދިފައި ވަނީ އަވާމިޔާގައި ހިންގާ ޓެރަރިސްޓް ހަރަކާތްތައް މޮނީޓަރ ކުރުމަށް ހިންގި ޖާސޫސީ މަސައްކަތްތަކެއްގެ ތެރެއިން ކަމަށާއި، ޤަލާފް މަރާލެވިފައި ވަނީ ހޯމަ ދުވަހުގެރޭ ކަމަށެވެ.
ސައުދީން ބުނީ، ޤަލާފްއަކީ ޓެރަރިސްޓް ގިނަ ހަމަލާތަކެއްގައި ބައިވެރިވެފައިވާ ފަރާތެއް ކަމަށާއި، އޭނާ ފިލައިގެން އުޅުނީ އަވާމިޔާ އާއި ޤުދައިޙްގެ ދެމެދުގައިވާ ސަރަޙައްދެއްގައި ކަމަށެވެ.
ސަލާމަތީ ބާރުތަކުގެ ފަރާތްތަކަށް ޤަލާފް ފެނުނު އިރު އޭނާ އިނނީ ރިހި ކުލައިގެ ހިއުންޑާއި ސޮނާޓާ ކާރެއްގައި ކަމަށާއި، އެ ކާރުގެ ނަންބަރު ޕްލޭޓަކީ ވަގު ނަންބަރު ޕްލޭޓެއް ކަމަށް އެފަރާތްތަކުން ބުނެފައިވެއެވެ. އަދި ސަލާމަތީ ބާރުތަކާއި ހަވާލުވުމަށް ޤަލާފްއަށް އެންގުމުން، އޭނާ ސަލާމަތީ ބާރުތަކުގެ ސިފައިނަށް ބަޑިން ހަމަލާ ދޭން ފެށި ކަމަށް ވެސް އެފަރާތްތަކުން ވަނީ ބުނެފައެވެ. ޤަލާފް މަރާލާފައި ވަނީ ސިފައިން ދިން ރައްދު ހަމަލާގައެވެ.
މި ކުރިމަތިލުމުގައި ޤަލާފް ނޫން މީހަކަށް އެއްވެސް ގެއްލުމެއް ލިބިފައެއް ނުވެއެވެ.
