ބޮޑު ސިންގާ އަލިމަހެއް ލެސޯތޯ އިން ހޯދައިފި

910 ކެރަޓް ހުރި ބޮޑު ސިންގާ އަލި މަހެއް އެފްރިކާގެ ބައްރަށް ނިސްބަތްވާ ކުޑަ ގައުމެއް ކަމަށްވާ ލެސޯތޯ އިން ހޯދައިފި އެވެ.

މިއީ މިހާތަނަށް ދުނިޔެއިން ފެނުނު އެންމެ ބޮޑު އެއް އަލިމަހެވެ. ރެކޯޑް ތަކަށް ބަލާއިރު މިއީ މިހާތަނަށް ދުނިޔެއިން ފެނުނު 5 ވަނަ އަށް އެންމެ ބޮޑު އަލިމަހެވެ.

ބިއްލޫރިހާ އަލި މި އަލިމަސް ފެނުނީ ލެސޯތޯގެ ލެޓްސެންގް މައިން އިން ކަމަށް ރިޕޯޓުތަކުގައި ވެއެވެ. މި މައިން އަކީ ލެސޯތޯ ސަރުކާރާއި ޖެމް ޑައިމަންޑްސް ނަމަކަށް ކިޔާ އަމިއްލަ ކުންފުންޏަކާ ގުޅިގެން ހިންގާ މައިން އެކެވެ.

ޖެމް ޑައިމަންޑްސްގެ ސީއީއޯ ކްލިފޯޑް އެލްފިކް ހޯމަ ދުވަހު ނެރުނު ބަޔާނެއްގައި ބުނެފައިވަނީ މި އަލިމަހަކީ އާދަޔާ ޚިލާފް ރަނގަޅު ކޮލިޓީ އެއްގެ އަލިމަހެއް ކަމަށެވެ. ބަޔާނުގައި ބުނެފައިވަނީ މި އަލިމަހުގެ ކުލަ ކަމަށް ކަނޑައަޅާފައިވަނީ "ޑީ" ކަމަށެވެ. މިއީ އެންމެ މަތީ ފެންވަރުގެ އަލިމަހަށް ދޭ ކުލައިގެ ދަރަޖަ ކަމަށް ވެއެވެ.

މިހާތަނަށް ދުނިޔެއިން ފެނުނު އެންމެ ބޮޑު އަލިމަހަށް ދީފައިވާ ނަމަކީ ކުލިނަން ޑައިމަންޑް އެވެ. އެއީ 3106.75 ކެރަޓް ހުރި ދެކުނު އެފްރިކާގެ ކުލިނަން އިން 1905 ވަނަ އަހަރު ހޯދި އަލިމަހެކެވެ. މި އަލިމަހުގެ ބައިތައް އިނގިރޭސި ރަސްކަމުގެ ތާޖުގައި ވަނީ ބޭނުން ކޮށްފައެވެ.

2006 ވަނަ އަހަރު 603 ކެރަޓް ހުރި ލެސޯތޯ ޕްރޮމިސް ގެ ނަން ދެވުނު އަލިމަސް ވެސް ފެނިފައިވަނީ މިހާރު ފެނިގެން އުޅޭ 910 ކެރަޓް ގެ އަލިމަސް ފެނުނު މައިން އިން ކަމަށް ޚަބަރުތައް ބުނެއެވެ. ލެސޯތޯ ޕްރޮމިސް ބެލްޖިއަމް ގައި ނީލަން ކިޔާ 2006 ވަނަ އަހަރު ވިއްކާލީ 12.4 މިލިއަން ޑޮލަރަށެވެ.