ބީއެމްއެލްއިން ކުރާ ދައުވާއަކާ ގުޅިގެން މީހަކު ބަންދުކޮށްގެން ކޯޓަށް ހާޒިރު ކުރަނީ

ބޭންކް އޮފް މޯލްޑިވްސް (ބީއެމްއެލް) އިން ކުރާ ދައުވާއަކާ ގުޅިގެން މީހަކު ބަންދުގައި ބަހައްޓައިގެން ކޯޓަށް ހާޒިރު ކުރުމަށްޓަކައި ފުލުހުން މީހަކު ހޯދަން ފަށައިފިއެވެ.

ފުލުހުން ބުނީ ސިވިލް ކޯޓަށް ހުށަހެޅިފައިވާ މައްސަލައަކާ ގުޅިގެން އެކޯޓަށް ހާޟިރުކުރަން ބޭނުންވެ، ހާޟިރުކުރެވިފައިނުވާ މީހަކު ބަންދުގައި ބަހައްޓައިގެން ކޯޓަށް ހާޟިރުކޮށްދިނުމަށް ފުލުހުންގެ މައްޗަށް އަމުރުކުރުމާ ގުޅިގެން އެމީހާ ހޯދުމުގެ މަސައްކަތް ފުލުހުން ދަނީ ކުރަމުން ކަމަށެވެ. އަދި މި އަމުރާ ގުޅިގެން ހޯދަމުންދަނީ ށ. ފުނަދޫ، ގަހާ، އަޙްމަދު މުޙައްމަދު (34އ.) ކަމަށް ވެސް ފުލުހުން ބުންޏެވެ.

އަޙްމަދު މުޙައްމަދު ހޯދަމުންދަނީ، ބޭންކް އޮފް މޯލްޑިވްސް ޕ.ލ.ކ އިން ދައުވާކުރާ ޙުކުމް ތަންފީޛުކުރުމުގެ މައްސަލައަކާ ގުޅިގެން ކޯޓަށް ހާޟިރުކުރަން ބޭނުންވެ، ހާޟިރުކުރެވިފައި ނުވާތީ ބަންދުގައި ބަހައްޓައިގެން ޖަނަވަރީ 16 ވަނަ ދުވަހުގެ 09:00 އަށް ކޯޓަށް ހާޟިރުކުރުމަށް ފުލުހުންގެ މައްޗަށް ނެރެފައިވާ އަމުރަކާ ގުޅިގެންނެވެ.

ފުލުހުން ބުނީ އަޙްމަދު މުޙައްމަދާ ބެހޭ އެއްވެސް މަޢުލޫމާތެއް ލިބިފައިވާ ފަރާތެއް ވާނަމަ ޕޮލިސް ކަސްޓޯޑިއަލް ޑިޕާޓްމަންޓްގެ ނަމްބަރު 9991442 އަށް ގުޅައި ހިއްސާކުރުން އެދޭ ކަމަށެވެ.