ހދ. ހަނިމާދޫގައި ޑެންގީ ހުން ޖެހޭ މީހުން އިތުރުވާ ކަމަށް އެރަށު ކައުންސިލުން ބުނެފިއެވެ.
އެރަށު ކައުންސިލްގެ ރައީސް އަބްދުއްސަލާމް އަލީ ރާއްޖެއެމްވީއަށް ވިދާޅުވީ އެރަށުގައި ޑެންގީ ހުން ޖެހޭ މީހުންގެ އަދަދު އިތުރު ވަމުންދާ ކަމަށާއި އެކަން ހެލްތުމިނިސްޓްރީގެ ސަމާލުކަމަށް ގެނެސްފައިވާ ކަމަށެވެ. ނަމަވެސް ޑެންގީ ހުން ޖެހިފައިވަނީ ކިތައް މީހުންކަމެއް އަދި ދަންނަވަން އުނދަގޫކަމަށް އޭނާ ވިދާޅުވިއެވެ. މިކަމުގެ މައުލޫމާތު ހޯދާލުމަށް އެރަށުގެ ސިއްހީމަރުކަޒަށް ގުޅާލުމުން އެކަމުގެ މައުލޫމާތު ދެވޭނީ އެޓޯލްސް ސާވިސްއަށް ކަމަށް ބުނެފައިވެއެވެ. އެހެންނަމަވެސް އެޓޯލްސް ސާވިސްއަށް ގުޅާލުމުން ފޯނަށް ޖަވާބު ނުދޭތީ މައުލޫމާތު ސާފުވާގޮތް ވަނީ ނުވެފައެވެ.
ރާއްޖެއެމްވީއަށް އެނގިފައިވާގޮތުގައި ހަނިމާދޫ ސިއްހީ މަރުކަޒުގެ އެނދުތައް ފުރިފައިވުމުން ބަލި މީހުން އެޑްމިޓްކޮށްގެން ފަރ އެއަތޮޅު ހޮސްޕިޓަލް ކަމަށްވާ ކުޅުދުއްފުށީ ހޮސްޕިޓަލުން ވެސް ދަނީ ހަނިމާދޫގެ ބައެއް މީހުންނަށް ފަރުވާ ދެމުންނެވެ.
ޑެންގީ ހުމަކީ އީޑީސް މަދިރީގެ ސަބަބުން ޖެހޭ ބައްޔެކެވެ.
ޑެންގީ ހުން ފެތުރިދާނެކަމުގެ ބިރު އޮތުމާ އެކު، ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފައި ވަނީ މިދިޔަ ބުރާސްފަތި ދުވަހުގައެވެ.
ހެލްތު ޕްރޮޓެކްޝަން އެޖެންސީން ބުނީ، މަދިރި އާލަވުން މަދުކުރުމާއި، ޑެންގީ ބައްޔަށް ރައްޔިތުން ހޭލުންތެރިކުމުގެ މަސައްކަތްތައް ފަށާފައި ވާކަމަށެވެ. އަދި ޑެންގީ ބަލި ދެނެގަތުމާއި ނިޒާމު އިތުރަށް ހަރުދަނާ ކުރުމުގެ މަސައްކަތްތައް ވެސް ކުރިއަށް ގެންދަމުން އަންނަ ކަމަށެވެ. އެގޮތުން ޑެންގީ އިތުރުވަމުންދާ މިންވަރު މޮނިޓަރކޮށް، ޑެންގީ ފެތުރޭ ރަށްރަށުގައި ބަލި ކޮންޓްރޯލް ކުރުމަށް އެހީތެރިކަން ފޯރުކޮށްދެމުންގެންދާނެ ކަމަށް އެޖެންސީން ވަނީ ބުނެފައެވެ.
