ސަރުކާރުން އިންތިޚާބުތަކާއި ބެހޭ ޤާނޫނުތަކަށް އިސްލާޙު ގެންނަން އުޅެނީ ރިޔާސީ އިންތިޚާބުގައި އީ-ވޯޓިންއާއި ދިމާއަށް ގެންދިޔުމަށް ކަމަށާއި، އެހެން ނަަމަވެސް ރައްޔިތުންގެ މަޖިލިސް ތެރެއިން އެކަން ނުކުރެވޭނެ ކަމަށް ކެންދޫ ދާއިރާގެ މެމްބަރު ޢަލީ ޙުސައިން ވިދާޅުވެއްޖެއެވެ.

ގުޅިފައިވާ ޕާޓީތަކުގެ ފަރާތުން އާދިއްތަ ދުވަހު މ. ކުނޫޒުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އަލީ ވިދާޅުވީ ރައްޔިތުންގެ އެމައްޗަށް ޢަމަލުކުރުން ލާޒިމް ޤާނޫނެއް ފާސްކުރެވޭނީ މަޖިލީހުގެ ދެބައިކުޅަ އެއްބައި މެމްބަރުންގެ ވޯޓާއިއެކުކަން ފާހަގަކުރައްވަމުން އަލީ ވިދާޅުވީ، ދެބައިކުޅަ އެއްބައި މެމްބަރުން ކަމަށްވާ 43 މެމްބަރުން ހަމަކުރުމަކީ މިހާރު ސަރުކާރަށް ކުރެވޭނެ ކަމެއް ނޫން ކަމަށެވެ. ރައްޔިތުންގެ މަޖިލީހުގައި ސަރުކާރު ހިންގާ ޕާޓީއަށް ކުރިން ސުޕަ މެޖޯރިޓީ ލިބިފައި އޮތް ނަމަވެސް، މިހާރު ސަރުކާރަށް ވަނީ މަޖިލީހުގައި ސިމްޕަލް މެޖޯރިޓީ ވެސް ގެއްލިފައެވެ. 

ޤާނޫނު އަސާސީއާއި ޤާނޫނުތަކަށް އިސްލާޙު ގެންނާނެ ކަމަށް ބަންޑާރަ ނައިބު ވިދާޅުވުމާއި ގުޅިގެން އަލީ ވިދާޅުވީ މަޖިލީހުގެ މެޖޯރިޓީ މިވަގުތު އޮތީ އިދިކޮޅު ފަރާތްތަކަށް ކަމަށާއި، ސަރުކާރަށް މެޖޯރިޓީ ގެއްލިފައި ވާކަމަށެވެ. އަދި ސަރުކާރުން ބޭނުންވާ އިސްލާޙުތައް ޤާނޫނުތަކަށް ނުގެނެވޭނެތީ، ސުޕްރީމް ކޯޓު މެދުވެރިކޮށް، މަޖިލީހުގެ އަޣުލަބިއްޔަތު ނެތިވެސް ސަރުކާރުން ބޭނުންވާ ގޮތަށް ކަންކަން ކުރެވޭނެ މަގު މަޖިލިސް ތެރެއިން ފަހިކުރުމަށް ސަރުކާރުން މަސައްކަތް ކުރާކަމަށް އަލީ ތުހުމަތުކުރިއެވެ. 

އަލީ ހުސައިން ވިދާޅުވީ އިންތިޚާބާއި ބެހޭ ޤާނޫނުތަކަށާއި، އިންތިޚާބުގެ ކަންކަން ހިންގާ ގޮތަށް އިސްލާޙު ގެންނަން 2013 ވަނަ އަހަރުގެ ރިޔާސީ އިންތިޚާބާއި 2014ވަނަ އަހަރުގެ އާއްމު އިންތިޚާބަށް ފަހު ވިލާތުގެ އިއްތިޙާދުން ގިނަ ކަންކަން ހުށަހެޅި ކަމަށެވެ. އެހެން ނަމަވެސް، މިދިޔަ ހަފްތާގައި އީޔޫގެ ވަފުދު އަނެއްކާވެސް ރާއްޖެއަށް ޒިޔާރަތް ކުރިއިރު، އެބޭފުޅުން އިސްލާހުކުރަން ހުށަހެޅި އެއްވެސް ކަމެއް އިސްލާހު ކޮށްފައިނުވާކަން އަލީ ފާހަގަކުރެއްވިއެވެ.

މަޖިލިސް ތެރެއިން ސަރުކާރުން ބޭނުންވާ ކަންކަން ކުރަން ސުޕްރީމް ކޯޓު ބޭނުން ކުރުމަށް ސަރުކާރުން މަސައްކަތް ކުރާ ކަމަށް އިދިކޮޅު ފަރާތްތަކުން ތުހުމަތު ކުރަމުންދާއިރު، އަލީ ހުސައިން ވިދާޅުވީ ސުޕްރީމް ކޯޓަށް ހުށަހަޅާފައިވާ މަޖިލިސް މެމްބަރުންގެ ގޮނޑީގެ މައްސަލަ އިންސާފުވެރިކޮށް ވީހާވެސް އަވަހަށް ނިންމައިދިނުމަށް އެދޭކަމަށެވެ. އާދިއްތަ ދުވަހުވެސް، ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމުމުން އެމައްސަލަ ސުޕްރީމް ކޯޓަށް ހުށަހަޅާފައިވާ ބައެއް މެމްބަރުން ވަޑައިގެން ސުޕްރީމް ކޯޓުގެ ފަނޑިޔާރުންނާއި ބައްދަލުކުރުމަށް މަސައްކަތް ކުރެއްވިއެވެ. އެކަމާއި ބެހޭ މައުލޫމާތު ދެއްވަމުން އަލީ ހުސައިން ވިދާޅުވީ ސުޕްރީމް ކޯޓުން އެ މެމްބަރުންނަށް ބޭނުންތެރި އެއްވެސް މައުލޫމާތެއް ނުލިބުނު ކަމަށެވެ.

މަޖިލިސް މެމްބަރުންގެ ގޮނޑީގެ މައްސަލައިގައި ސުޕްރީމް ކޯޓުން ނެރުނު އަމުރަކީ އެމައްސަލައިގައި ސާފު ހުކުމެއް ނޫން ކަމަށް ބުނަމުންދާއިރު، އިދިކޮޅު ފަރާތްތަކުން ބުނާ ގޮތުގައި އިލެކްޝަންސް ކޮމިޝަނުން ބައި އިލެކްޝަން ނުބާއްވައިގެން އުޅެނީ މެމްބަރުންގެ ގޮނޑި ހުސްވެއްޖެ ކަމަށް އިލެކްޝަންސް ކޮމިޝަންގެ މެމްބަރުންނަށް ވެސް އެނގޭތީ ކަމަށެވެ. އަލީ ހުސައިން ވެސް ވިދާޅުވީ މަޖިލީހުގެ މެމްބަރެއްގެ ގޮނޑި ގެއްލިއްޖެނަމަ ބައި އިލެކްޝަން ބާއްވަން ޖެހޭ 60 ދުވަހުގެ މުއްދަތު ހަމަވެފައިވާއިރު، އަދިވެސް ބައި އިލެކްޝަން ނުބާއްވައިގެން އުޅެނީ ގޮނޑި ހަޤީގަތުގައި ގެއްލިފައި ނުވާތީ ކަމަށެވެ.