ބަނޑަށް ދަރި މަރުވި މައްސަލާގައި ނައިފަރު ހޮސްޕިޓަލް ހިމޭނުން، މިނިސްޓްރީން ވެސް ހަނު!
13 ޖެނުއަރީ 2018 | ހޮނިހިރު 19:52ހެލްތު މިނިސްޓަރު ވެސް ޖަވާބެއް ނުދެއްވި
ޒައީމާ (މ) އޭނާގެ ފިރިމީހާ އާއި އާއިލާގެ މެމްބަރުންނާ އެކު އައިޖީއެމްއެޗުގައި ހިނގާފައި ދަނީ
ނައިފަރު ހޮސްޕިޓަލްގެ އިހުމާލުން މާބަނޑު މީހެއްގެ ބަނޑަށް ދަރިފުޅު މަރުވި މައްސަލާގައި އެ ހޮސްޕިޓަލުން ވާހަކަ ދައްކަން ދެކޮޅުހެދިއިރު، ހެލްތު މިނިސްޓްރީން ވެސް އެ މައްސަލާގައި މީޑިއާއަށް އެއްޗެކޭ ނުބުންޏެވެ.
ނައިފަރުގައި ހުންނަ ޅ. އަތޮޅު ހޮސްޕިޓަލުން ފަރުވާ ހޯދި ނ. ހެނބަދޫ ޒައީމާ އިސްމާއިލުގެ ބަނޑަށް ދަރިފުޅު މަރުވިކަން އެނގުނީ ކުއްލި ގޮތަކަށް ބުރާސްފަތި ދުވަހު އެ އަންހެން މީހާ މާލެ ގެނެސް އައިޖީއެމްއެޗަށް ދެއްކުމުންނެވެ. އައިޖީއެމްއެޗުން ފަރުވާ ހޯދަމުންދާ ޒައީމާގެ ބަނޑުން އަދިވެސް ދަރިފުޅު ނުނަގައެވެ. ސިޒޭރިއަން ހަދައިގެން ޒައީމާގެ ބަނޑުން ދަރިފުޅު ނަގަން އައިޖީއެމްއެޗުން ހޮނިހިރު ދުވަހު ނިންމި ނަމަވެސް، އާދީއްތަ ދުވަހަށް އެކަން ވަނީ ފަސްކޮށްފައެވެ.
ޒައީމާގެ ފިރިމީހާ ޅ. ނައިފަރު، އަޒުމް، މުހައްމަދު އަހުމަދު "ރާއްޖެއެމްވީ"އަށް ބުނީ ދަރިފުޅު ބަނޑަށް މަރުވެފައިވާތާ ހަފްތާއަކަށް ވުރެ ގިނަ ދުވަސްވެފައިވާ ކަމަށް އަންދާޒާ ކުރެވޭ ކަމަށެވެ.
ޒައިމާގެ ފިރިމީހާ މުހައްމަދު: އެ ދެމަފިރިންގެ ހަތަރު ވަނަ ދަރިފުޅު މަރުވާން ދިމާވީ ހޮސްޕިޓަލުގެ އިހްމާލުން ކަމަށް ތުހުމަތު ކުރި-- ފޮޓޯ/ މުހައްމަދު ސާޖިދު
އެކަމާ ގުޅޭ ގޮތުން ނައިފަރު ހޮސްޕިޓަލްގެ އިސްވެރިންނަށް "ރާއްޖެއެމްވީ" ގުޅުމުން ވިދާޅުވީ އެކަމާ ގުޅޭ ގޮތުން އެ ހޮސްޕިޓަލުން ބަހެއް ބުނާނީ ހެލްތު މިނިސްޓްރީގެ ލަފާގެ މަތިން ކަމަށެވެ. އެ ހޮސްޕިޓަލްގެ ސީނިއާ އެޑްމިނިސްޓްރޭޓިވް އޮފިސަރު އުމަރު އިބްރާހިމް "ރާއްޖެއެމްވީ"އަށް ހޮނިހިރު ދުވަހު ވިދާޅުވީ ކުއްޖާ މަރުވި މައްސަލާގައި އެ ހޮސްޕިޓަލުގައި ބައްދަލުވުމެއް ބޭއްވި ކަމަށާއި އެކަމާ ގުޅޭ މައުލޫމާތު ހެލްތު މިނިސްޓްރީން ދޭނެ ކަމަށެވެ.
އެކަމާ ގުޅޭ ގޮތުން ހެލްތު މިނިސްޓްރީން މީޑިއާއަށް މައުލުމާތު ދެއްވާ އޮފިޝަލުންނަށް ގުޅާލުމުން ވަކިއެއްޗެއް ވިދާޅެއްނުވިއެވެ.
ހެލްތު މިނިސްޓަރު އަބްދުﷲ ނާޒިމް އިބްރާހިމަށް ގުޅައި، މެސެޖު ކުރުމުން ވެސް އެމަނިކުފާނު ވެސް ޖަވާބެއް ނުދެއްވިއެވެ.
ހަކުރު ބައްޔަށް ފަރުވާ ހޯދަމުންދާ ޒައީމާގެ ފިރިމީހާ މުހައްމަދު ބުނީ އޭނާގެ އަންހެނުން ދިޔައީ ޑޮކްޓަރުން ދައްކައި ފަރުވާ ހޯދަމުން ކަމަށެވެ. އެއްވެސް މައްސަލައެއް އުޅޭ ކަމަށް ނައިފަރު ހޮސްޕިޓަލުން ބުނެފައިނުވާ ކަމަށް އޭނާ ބުންޏެވެ. ދަރިފުޅުގެ ހަރަކާތް ހުއްޓި، ވިންދު ނުޖަހާތީ މިދިޔަ އާދީއްތަ ދުވަހު ޑޮކްޓަރަށް ދެއްކުމުން ހޮސްޕިޓަލުގެ ޑޮކްޓަރުން ބުނި ކަމަށް މުހައްމަދު ބުނީ ދެމައިންގެ ހާލުވެސް ރަނގަޅު ކަމަށެވެ. ނަމަވެސް ހަމަ އެ ދުވަހު އެމެޖެންސީގައި މާލެ ދިއުމަށް ޑޮކްޓަރުން އެދުނު ކަމަށާއި ހޮސްޕިޓަލުން އާސަންދަ ހަމަޖައްސައި ނުދިނުމުން މާލެ އައީ އަމިއްލަ ހަރަދުގައި ކަމަށް މުހައްމަދު ބުންޏެވެ.
އޭނާ ދަރިފުޅު މަރުވި މައްސަލާގައި ދެން ފާހަގަ ކުރެވޭ އަނެއް މައްސަލައަކީ ޖައީމާގެ ޑައިބެޓިކް ލެވެލް ދަށްކުރުމަށް އޭޑީކޭ ހޮސްޕިޓަލުން ދިން އިންޖެކްޝަނެއް ނައިފަރު ހޮސްޕިޓަލުން ނުޖެހި މައްސަލައެވެ. އެ އިންޖެކްޝަން ޖެހުމަށް އެ ހޮސްޕިޓަލުން ދެކޮޅު ހެދީ އެއީ ކޯއްޗެއްކަން އެ ހޮސްޕިޓަލުގެ ޑޮކްޓަރުންނާއި ނަރުހުންނަށް ނޭނގޭތީ ކަމަށް މުހައްމަދު ބުންޏެވެ.
