ފިޔާ ލިބުމަށް ދަތިވެ އަގު އުފުލެން ފަށައިފި

އިންޑިއާއިން ފިޔާ ލިބުމުގައި ދަތިތަކެއް ކުރިމަތިވެފައިވާ ކަމަށާއި އެހެންވެ ފިޔާގެ އަގު ބޮޑުވެދާނެ ކަމަށް ބައެއް ވިޔަފާރިވެރިން ބުނެފި އެވެ.

ރާއްޖެއެމްވީއަށް ވާހަކަ ދެއްކި ބައެއް ވިޔަފާރިވެރިން ބުނި ގޮތުގައި އިންޑިއާގެ ސަޕްލަޔަރުންނަށް ވެސް ފިޔައި ލިބުމުގައި ދަތިތަކެއް ކުރިމަތިވެފައިވާ ކަމަށެވެ. އިންޑިއާގެ ސަޕްލަޔަރުންނަށް ފިޔައި ލިބުމުގައި ދަތިތައް ކުރިމަތިވެފައި ވަނީ ފިޔާ އުފައްދާ މިންވަރު ދައްވަމުންދާތީ އެވެ.

އިންޑިއާ އިން ރާއްޖެއަށް ފިޔާ ގެނައުމުގެ ދަތިކަން ކުރިމަތިވެފައިވާތާ ދެ ހަފްތާ އަށްވުރެން ގިނަ ދުވަސްވެދާނެ ކަމަށްވެސް ބައެއް ވިޔަފާރިވެރިން ބުންޏެވެ. ރާއްޖޭގެ ބާޒާރުގައި ފިޔާ ކިލޯއެއްގެ އަގު ކުރިން 15 ރުފިޔާ އާއި 20 ރުފިޔާ އާއި ދެމެދުގެ އަގަކަށް އުޅުނު ނަމަވެސް މިހާރު ލިބެނީ ކިލޯއެއް 25 ރުފިޔާ އާއި 35 ރުފިޔާގެ ދެމެދުގެ އަގެއްގަ އެވެ.