ޔާމީން ހުރީކީ އިންތިޚާބަކުން ވެރިކަން ބަދަލުކުރަން ޖާގަދޭކަށް ނޫން، ވެރިކަން ބަދަލުވުން ގާތީ ރައްޔިތުންގެ ބާރުން ހަޑިގޮތަކަށް: މަހްލޫފް
11 ޖެނުއަރީ 2018 | ބުރާސްފަތި 18:45ފަހު ވަގުތާ ޖެހެންދެން އިންތިޚާބެއް ހޯދަން މަސައްކަތް ކުރާނަން
މަހްލޫފް މީޑިޔާތަކަށް މައުލޫމާތު ދެއްވަނީ: ރައީސް ޔާމީނަށް ވަރަށް ބޮޑަށް ފާޑު ވިދާޅުވޭ
ރައީސް ޔާމީން ހުންނެވީކީ އިންސާފްވެރި އިންތިޚާބަކުން ވެރިކަން ބަދަލުކުރަން ޖާގަދޭން ނޫން ކަމަށާއި މިވެރިކަން ބަދަލުވުން އެންމެ ގާތީ ރައްޔިތުންގެ ބާރުން ހަޑިގޮތަކަށް ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހުމަދު މަހްލޫފް ވިދާޅުވެއްޖެއެވެ.
މި އަހަރުގެ ރިޔާސީ އިންތިހާބުގެ ކުރިން އިންތިހާބާ ބެހޭ ގާނޫނުތަކަށް ބަދަލުތަކެއް ގެންނަން ނިންމާފައިވާ ކަމަށް ބަންޑާރަނައިބު މުހައްމަދު އަނިލް ވިދާޅުވެފައި ވަނިކޮށް ކުރެއްވި ޓްވީޓެއްގައެވެ.
ދައުލަތުގެ މީޑިޔާ ޕީއެސްއެމްގައި ވާހަކަ ދައްކަވަމުން އަނިލް ވިދާޅުވީ ރައްޔިތުންގެ މަޖިލީހުގެ ގާނޫނާއި އާންމު އިންތިހާބާ ބެހޭ ގާނޫނާއި ރިޔާސީ އިންތިހާބުގެ ގާނޫނަށް ބަދަލު ގެންނާނެ ކަމަށެވެ. އަދި އިންތިހާބުތަކާ ބެހޭ ގާނޫނަށް ގެންނަ ބަދަލުތައް ހިމަނައިގެން ބިލް މިހާރު ތައްޔާރުކޮށްފައިވާ ކަމަށާއި މި އަހަރު މަޖިލީހުގެ ފުރަތަމަ ދައުރުގައި ބިލް މަޖިލީހަށް ފޮނުވާނެ ކަމަށެވެ.
