ޓެރަރިޒަމްގެ ތުހުމަތުގައި ހައްޔަރުކުރާ މީހަކާ ޤާނޫނީ ވަކީލަކު ނެތި ސުވާލު ނުކުރެވޭ ގޮތަށް ކަނޑައަޅައިފި
11 ޖެނުއަރީ 2018 | ބުރާސްފަތި 13:44ވަކީލަކު ހަމަޖައްސަން 6 ގަޑިއިރު ދޭން ޖެހޭ
ފުލުހުން މީހަކު ހަޔޔަރުކޮށްގެން ގެންދަނީ: ޓެރަރިޒަމްގެ ތުހުމަތުގައި ހައްޔަރު ކުރެވޭ މީހުންނަށް ވަކީލުންގެ ފުރުސަތު ދޭން ޖެހޭ
ޓެރަރިޒަމްގެ ކުށުގެ ތުހުމަތުގައި ހައްޔަރު ކުރެވޭ މީހަކަށް ޤާނޫނީ ވަކީލަކު އައްޔަން ކުރުމަށް ހަ ގަޑިއިރު ދިނުމަށާއި އެ ހަ ގަޑިއިރު ތެރޭގައި ފުލުހުންނަށް އެމީހަކާ ސުވާލު ނުކުރެވޭނެ ކަމަށް ކަނޑައަޅައި، ޓެރަރިޒަމުގެ ކުށުގެ ތުހުމަތުގައި ފުލުހުންގެ ބެލުމުގެ ދަށުގައިވާ މީހުން ޤާނޫނީ ވަކީލެއްގެ އެހީތެރިކަން ހޯދުމުގެ ގަވާއިދު އެކުލަވާލައި ގެޒެޓް ކޮށްފިއެވެ.
ސަރުކާރުގެ ގެޒެޓްގައި ބުރާސްފަތި ދުވަހު ގެޒެޓް ކޮށްފައިވާ ޤަވާއިދުގައި ބުނެފައިވާ ގޮތުގައި ޓެރަރިޒަމް މަނާކުރުމުގެ ޤާނޫނުގައި ބަޔާންކުރާ ކުށެއްގެ ތުހުމަތުގައި ހައްޔަރުކުރެވޭ މީހާ ހައްޔަރުކުރެވޭއިރު ފުލުހުން އެމީހަކަށް ދޭ ޤާނޫނީ އިންޒާރުގައި އެ މީހަކާ ސުވާލުކުރެވޭ ވަގުތު ޤާނޫނީ ވަކީލަކު އެ މީހަކާ އެކުގައި ހުރުމުގެ ފުރުސަތު އޮތްކަން ބުނެދޭން ވާނެއެވެ. އަދި ފުލުހުން ހައްޔަރުކޮށްފައި ހުރި މީހަކާ ސުވާލުކުރާއިރު އޭނާގެ ޤާނޫނީ ވަކީލު އޭނާއާ އެކުގައި ހުރުމަށް އެ މީހާ އެދިއްޖެ ނަމަ، އެފުރުސަތު ހޯދައިދިނުމަކީ ފުލުހުންގެ މައްޗަށް ލާޒިމް ކަމެކެވެ.
މީގެ އިތުރުން އެމީހަކު ޤާނޫނީ ވަކީލެއް ހަމަޖެއްސުމަށް ހަ ގަޑިއިރުގެ މުހުލަތެއް ދޭންވާނެ ކަމަށާއި އެ ހަ ގަޑިއިރުގެ ތެރޭގައި ފުލުހުންނަށް ކުށުގެ ތުހުމަތުގައިވާ މީހާއާ އެއްވެސް ސުވާލެއް ނުކުރެވޭނެ ކަމަށް ވެސް ޤަވާއިދުގައި ވަނީ ބުނެފައެވެ. އަދި އެވަގުތު ފާއިތުވާއިރު، އެކަށީގެންވާ ސަބަބަކާ ނުލައި ޤާނޫނީ ވަކީލު ހާޒިރުވެފައި ނުވާ ނަމަ، ކުށުގެ ތުހުމަތުގައިވާ މީހާއާ ސުވާލުކުރުން ފުލުހުންނަށް ކުރިއަށް ގެންދެވިދާނެ ކަމަށް ވެސް ޤަވާއިދުގައި ވަނީ ބުނެފައެވެ.
ޤަވާއިދުގައި ވަނީ ވަކީލަށް ހާޒިރު ނުވެވުނު އެކަށީގެންވާ ސަބަބު ކަމުގައި ބަލާނެ ތިން ގޮތެއް ވެސް ހިމަނާފައެވެ. އެއީ ޤާނޫނީ ވަކީލު ހަމަޖެއްސިއިރު އެވަކީލު ރަށުގައި ނެތުމާއި ކުށުގެ ތުހުމަތުގައިވާ މީހާ ޤާނޫނީ ވަކީލަށް އިންޒާރުދީ ބިރުދެއްކުން އަދި ޤާނޫނީ ވަކީލަށް ކުށުގެ ތުހުމަތުގައިވާ މީހާއަށް އޮތް އިތުބާރު ގެއްލުމެވެ.
ޤަވާއިދުގައި ބުނެފައިވާ ގޮތުގައި ކުށުގެ ތުހުމަތުކުރެވޭ ފަރާތަކީ ޤާނޫނީ ވަކީލެއްގެ އެހީތެރިކަން ހޯދޭ ފަދަ މާލީ ތަނަވަސްކަން ނެތް ފަރާތެއްނަމަ، ޤާނޫން އަސާސީގެ 53 ވަނަ މާއްދާގެ (ށ) ގެ ދަށުން އެފަރާތަކަށް ދައުލަތުން ޤާނޫނީ ވަކީލަކު އައްޔަން ކޮށްދޭން ޖެހޭނެ ކަމަށެވެ.
ފުލުހުން ތަންފީޒްކުރާ މިޤަވާއިދުގެ ދަށުން އައްޔަން ކުރެވޭ ޤާނޫނީ ވަކީލާއި ކުށުގެ ތުހުމަތުގައިވާ ފަރާތާ ބައްދަލުކުރާ ވަގުތު އެ ދެ މީހުން ފެންނަ ހިސާބުގައި، ފުލުހުންގެ އޮފިސަރަކު ހުންނަން ޖެހޭނެ ކަމަށް ވެސް ޤަވާއިދުގައި ވަނީ ބުނެފައެވެ.
