ދައުލަތުގެ އެކިއެކި މަގާމުތަކުގައި ތިއްބަވާ ވެރިން ގާނޫނީ ޒިންމާ އަދާކުރުމަކީި އެ ބޭފުޅުންގެ "ހެޔޮފުޅު" ކަމުން ވާކަމެއް ނޫން ކަމަށާއި ގާނޫނީ ޒިންމާ އަދާކުރުމަކީ އެ ބޭފުޅުންގެ މައްޗަށް ކުރުން ލާޒިމް ކަމެއް ކަމަށް ކުރީގެ ޑެޕިއުޓީ ޕްރޮސެކިއުޓަރ ޖެނެރަލް އަދި މަޝްހޫރު ގާނޫނީ ވަކީލު ހުސައިން ޝަމީމު ވިދާޅުވެއްޖެ އެވެ.
ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން ޝަމީމު ވިދާޅުވީ ރައްޔިތުންގެ މަޖިލީހުން ފާސްކޮށް، ތަސްދީގު ކޮށްފައިވާ ގާނޫނެއް ތަންފީޒު ކުރުމާއި ނުކުރުމަކީ ރައީސުލްޖުމްހޫރިއްޔާއަށް ވިޔަސް، އުއްތަމަ ފަނޑިޔާރަށް ވިޔަސް އަދި އިލެކްޝަންސް ކޮމިޝަނަށް ވިޔަސް އެފަރާތެއްގެ އިހުތިޔާރަށް ދޫކޮށްލާފައިވާ ކަމެއް ނޫން ކަމަށެވެ.
"ގާނޫނެއް ރައްޔިތުންގެ މަޖިލީހުން ފާސްކުރަނީ ތަންފީޒު ކުރަންވެގެން. ދެން އެހިސާބުން ރައީސުލްޖުމްހޫރިއްޔާއަކަށް ވެސް، އުއްތަމަ ފަނޑިޔާރަކަށް ވެސް އަދި އިލެކްޝަންސް ކޮމިޝަނަށް ލިބިގެންވާ އިހުތިޔާރެއް ނޯންނާނެ ގާނޫނު ތަންފީޒު ނުކުރުމަށް،" ޝަމީމު ވިދާޅުވި އެވެ.
ޝަމީމު ވިދާޅުވީ ގާނޫނު ނަގަހައްޓަންޖެހޭ މުއައްސަސާތަކުން ގާނޫނުތައް ތަންފީޒު ކުރަމުން ނުދާ ކަމަށެވެ. އެގޮތުން ޖިނާއީ އަދުލްގެ ނިޒާމު މައި ތަނބު ކަމަށްވާ ޕްރޮސެކިއުޓަރ ޖެނަރަލްގެ އޮފިސް ހިނގަމުންދަނީ ރައީސް އޮފީހުގެ ސެކްޝަނެއްގެ ގޮތުގައި ކަމަށާއި ސުޕްރީމް ކޯޓުން ވެސް ގާނޫނު ތަންފީޒު ކުރަމުންނުދާ މައްސަލާގައި ކަންބޮޑުވެގެން އުޅޭތަނެއް ނުފެންނަ ކަމަށް ވެސް ޝަމީމު ވިދާޅުވި އެވެ.
ސަމީމު ވިދާޅުވީ ރާއްޖޭގައި ޕްރޮފެޝަނެއްގެ ގޮތުގައި މަސައްކަތް ކުރައްވާ ގާނޫނީ ވަކީލުންގެ ތެރެއިން 56 ގާނޫނީ ވަކީލަކު އެކަންކަމާމެދު ހުރި ކަންބޮޑުވުންތައް ލިޔުމަކުން ސުޕްރީމް ކޯޓަށް ހުށަހެޅުމުން އެ ކޯޓުން އެ ލިޔުން ބަލައި ނުގަންނަން ނިންމި ނިންމުމުން ވެސް އެކަން އެނގިގެންދާ ކަމަށާއި އަދި އެ ގާނޫނީ ވަކީލުންގެ ހުރި ކަންބޮޑުވުންތަކާމެދު ރާއްޖޭގައި މަސައްކަތް ކުރައްވާ އެއްވެސް ގާނޫނީ ވަކީލަކު ދެބަސްވެފައި ނުވާތީ ގާނޫނު ތަންފީޒު ކުރުމުގެ ޒިންމާ އޮތް ފަރާތްތަކުން ޒިންމާ އަދާ ކުރަމުން ނުދާކަން ހާމަވާ ކަމަށެވެ.
"ގާނޫނު ތަންފީޒުކުރާ ފަރާތްތަކުން ގާނޫނަށް ބޯ ނުލަނބާ މިންވަރު އަޅުގަނޑުމެންނަށް މިއެނގެނީ އެކަމުގައި ހަރަކާތްތެރިވާ ގާނޫނީ ވަކީލުންގެ ޝަކުވާ އިންތިހާއަށް ބޮޑުވުމުން. ކޮންމެ ދުވަހަކު މިކަހަލަ ކަންތައްތަކާ ދިމާވާ ވަކީލުންގެ ވާހަކަ މިދައްކަނީ. އަޅުގަނޑުމެންނަށް މިކަމުގައި ކަންބޮޑުވުން ހުރި މިންވަރު އެހާ މައްޗަށް ހުރީމާ އަދި އާއްމު ރައްޔިތުންނަށް އެކަން އިހުސާސްވާލެއް މާބޮޑުވާނެ. ރާއްޖޭގެ އަދުލްއިންސާފުގެ ކަންކަން ގޮސްފައިވާ ހިސާބަށް ބަލާއިރު، އިންސާފު ހޯދަން ދާނެ ތަނެއް ނެތް،" ޝަމީމު ވިދާޅުވި އެވެ.
ޝަމީމު ވިދާޅުވަނީ ސުޕްރީމް ކޯޓަށް ހުށަހަޅާ ސިޓީތަކަށް ޖަވާބު ނުދެއްވާތީ އެކަމާ ވަރަށް ބޮޑަށް ކަންބޮޑުވެ ވަޑައިގެން ވާހަކަ ދައްކަވާފަ އެވެ. އެގޮތުން ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫން ޝަރުއީ ކޯޓެއްގެ ހުކުމަކާ ނުލައި ޖަލުގައި ހުންނަވާތާ ފަސް މަސް ދުވަހަށް ވުރެ ގިނަ ދުވަސްވެފައިވާއިރު، ފާރިސްގެ ގާނޫނީ ވަކީލުން ޝަރުއީ ކޯޓުތަކަށާޢި ސުޕްރީމް ކޯޓަށް ހުށަހަޅުއްވާ ސިޓީތަކަށް ޖަވާބު ދެއްވާފައި ނުވުމަކީ ކަންބޮޑުވެވަޑައިގަންނަވާ ކަމެއް ކަމަށެވެ.
"ފާރިސް މައުމޫންގެ ގާނޫނީ ވަކީލު، ފާރިސް މައްސަލާގައި ޝަކުވާތައް ކްރިމިނަލް ކޯޓަށް ހުށަހަޅުއްވާ، އެ ކޯޓުން އެކަން ބަލާ ނުދީގެން ހައިކޯޓަށް ހުށަހަޅުއްވާ، ހައިކޯޓުން ބަލާ ނުދީގެން ސުޕްރީމް ކޯޓަށް ހުށަހަޅުއްވާ، އެ ޕްރޮސެސް އެއްކޮށް ފުރިހަމަ ކުރެއްވީމަވެސް ހަމަ އަޅާލާނެ މީހަކުވެސް ނުވި، މިއީ މިކަންކަން އޮތް ހިސާބަކީ،" ޝަމީމު ވިދާޅުވި އެވެ.
