ވެންގާ އަށް ތިން މެޗުގެ ސަސްޕެންޝަނެއް

އިނގިރޭސިވިލާތުގެ ފުޓްބޯޅަ އެސޯސިއޭޝަނުން އާސެނަލްގެ ކޯޗު އާސެން ވެންގާ ތިން މެޗަށް ސަސްޕެންޑް ކޮށްފިއެވެ.

ވެންގާއަށް ތިން މެޗުގެ ސަސްޕެންޝަނެއް އައިސްފައި މިވަނީ ޕްރިމިއާ ލީގުގައި ވެސްޓް ބްރޮމްއާ ދެކޮޅަށް އާސެނަލް ކުޅުނު މެޗުގައި ރެފްރީގެ ނިންމުންތަކާ ދެކޮޅު ހެދުމުގެ ގޮތުން ރެފްރީއާ ޒުވާބު ކުރުމުންނެވެ.

މި މެޗުގެ ފަހު ވަގުތު ވެސްޓް ބްރޮމްއިން ޖެހި ލަނޑާއެކު އާސެނަލްއަށް ތިން ޕޮއިންޓް ގެއްލިގެންދިޔައެވެ. 1-1 ގެ ނަތީޖާއަކުން އެއްވަރުވެގެން ނިމުނު މި މެޗުގައި ވެސްޓް ބްރޮމްއިން ލަނޑު ޖެހީ މެޗުގެ އެންމެ ފަހު ވަގުތުކޮޅުގެ ތެރޭގައި އެ ޓީމަށް ލިބުނު ޕެނަލްޓީއާއެކުއެވެ. މި ނިންމުމާއި ދެކޮޅު ހެދުމުގެ ގޮތުން ވެންގާ ވަނީ މި މެޗުގައި ރެފްރީކަން ކުރި މައިކް ޑީންއާ ޒުވާބުކޮށްފައެވެ. އަދި މެޗު ނިންމާލުމަށް ފަހު ރެފްރީން ތިބޭ ޗޭންޖިން ރޫމްއަށް ވެސް އޭނާ ވަދެފައިވެއެވެ.

މިކަމާއި ގުޅިގެން އިނގިރޭސި އެފްއޭއިން ނެރުނު ބަޔާނެއްގައި ވަނީ ރެފްރީންގެ ނިންމުންތަކާއި ދެކޮޅު ހަދައި ޒުވާބުކުރުމުގެ ތެރޭގައި ވެންގާ ބޭނުން ކުރި ބަސްމަގާއި އޭނާ ކަންކަންކުރި ގޮތުގެ ސަބަބުން ރެފްރީންގެ ނިންމުންތަކާއި މެދު މީހުންގެ މެދުގައި ސުވާލު އުފޭ ގޮތް ވެފައިވާ ކަމަށެވެ. އަދި އޭނާ 40000 ޕައުންޑްއިން ޖޫރިމަނާކޮށް ތިން މެޗަށް އޭނާ ސަސްޕެންޑް ކުރަން ނިންމާފައިވާ ކަމަށް މި ބަޔާނުގައިވެއެވެ.

މިކަމާއި ގުޅިގެން ވާހަކަ ދައްކަމުން ވެންގާ ބުނެފައިވަނީ އޭނާ އެކަމާއި ބެހޭގޮތުން އެއްވެސް ވާހަކައެއް ދައްކަން ބޭނުންނުވާ ކަމަށާއި އޭނާ އެ ދުވަހު އަމަލު ކުރި ގޮތާއި މެދު އެއްވެސް ވަރަކަށް ދެރަ ނުވާ ކަމަށެވެ. ހަމައެހެންމެ މިއީ ވާހަކަ ދައްކަން ޖެހޭ މުހިންމު މައުޟޫއެއް ކަމަށާއި އޭނާ ބޭނުންވަނީ ބޮޑެތި މެޗުތަކުގައި ގާބިލް ޕްރޮފެޝަނަލް ރެފްރީން ތިބެން ކަމަށް ވެސް ވެންގާ ހާމަކުރިއެވެ.

މި ސަސްޕެންޝަނުގެ ސަބަބުން ވެންގާއަށް އެންމެ ފުރަތަމަ ގެއްލޭނީ އިނގިރޭސި އެފްއޭ ކަޕްގައި ޖެނުއަރީ މަހުގެ ހަތްވަނަ ދުވަހު ނޮޓިންގްހަމް ފޮރެސްޓާ ދެކޮޅަށް އާސެނަލް ކުޅޭ މެޗެވެ. އަދި އޭގެ ފަހުން ޖެނުއަރީ މަހުގެ 10 ވަނަ ދުވަހު އިނގިރޭސި ލީގު ކަޕްގައި ޗެލްސީއާ ދެކޮޅަށް ކުޅޭ މެޗުގައާއި އަދި ޕްރިމިއާ ލީގުގައި މި މަހުގެ 14 ވަނަ ދުވަހު ކުޅޭ މެޗުގައި ވެސް އޭނާއަށް އާސެނަލްގެ ބެންޗުގައި ނުހުރެވޭނެއެވެ.

ވެންގާއަކީ އާންމު ގޮތެއްގައި ރެފްރީންގެ ނިންމުންތަކާއި ދެކޮޅު ހަދާ ކޯޗެއްގެ ގޮތުގައި ފާހަގަކުރެވިފައިވާ ކޯޗެކެވެ. މިކަމުގެ ސަބަބުން އޭނާއަށް ވަރަށް ގިނައިން އެކިވަރުގެ އަދަބު ވެސް ލިބިފައި އެބަހުއްޓެވެ.