އިރާނުގެ ދާހިލީ ކަންކަމާ އެމެރިކާ އިން ބެހެމުންދާ ކަމަށް ބުނެ އިރާނުން އެމެރިކާ އަށް ވަރަށް ބޮޑަށް ފާޑުކިޔައިފިއެވެ.

އިރާނުން އދ އަށް ކަނޑައަޅުވާފައިވާ މަންދޫބު ޣުލަމާލީ ޚުޝްރޫ އދ އަށް ފޮނުއްވި ސިޓީއެއްގައި ވިދާޅުވީ "އެމެރިކާ ގެ ލީޑާޝިޕުން ތާކުންތާކު ނުޖެހޭ ޓްވީޓްތަކެއް ކުރަމުންދާ ކަމަށާއި، އެ ޓްވީޓުތަކުގައި ގޮވާލަނީ އިރާނުގެ ރައްޔިތުން ގައުމު ހުއްޓުމަކަށް އަންނަ އަމަލުތަކުގައި ބައިވެރިވުމަށް ކަމަށެވެ." އަދި އެމެރިކާ އިން ގޮވާލާ ކަންކަމަކީ ބައިނަލްއަގްވާމީ ގާނޫނާ ހިލާފުކަންކަން ކަމަށް ވެސް ޚުޝްރޫ ވިދާޅުވިއެވެ. ޚުޝްރޫ އދ އަށް ފޮނުއްވި ސިޓީގައި އިތުރަށް ވިދާޅުވީ އެމެރިކާ އަކީ އިރާނުގެ ދާހިލީ ކަންކަމާ ބެހުމުގެ ޓްރެކް ރިކޯޑެއް އޮތް ގައުމެއް ކަމަށެވެ.

ޚުޝްރޫގެ ސިޓީގައި އިތުރަށް ވިދާޅުވީ އެމެރިކާ އަކީ އިރާނުގެ ރައްޔިތުންނާ އެކީގައިވާ ގައުމެއް ނޫން ކަމަށެވެ. އޭގެ މިސާލެއްގެ ގޮތުން ޚުޝްރޫ ވިދާޅުވީ ބައެއް ގައުމުތަކުގެ ރައްޔިތުން އެމެރިކާ އަށް އެތެރެ ނުވޭވޭ ގޮތަށް ހަދާފައިވާ ކަމަށާއި އެގައުމުތަކުގެ ތެރޭގައި އިރާން ހިމެނޭ ކަމަށެވެ. އަދި އިރާނުގެ ނިއުކްލިއާ ޕްރޮގްރާމާ ބެހޭގޮތުން ވެސް ޚުޝްރޫ އެމެރިކާ އަށް ވަނީ ފާޑުވިދާޅުވެފައެވެ.

އަންގާރަ ދުވަހު، އެމެރިކާ އިން އދ އަށް ކަނޑައަޅުއްވާފައިވާ މަންދޫބު ވިދާޅުވެފައި ވަނީ އިރާނުގެ ދާހިލީ ކަމަކާ އެމެރިކާ އިން ނުބެހޭ ކަމަށެވެ. އަދި އިރާނުގެ ރައްޔިތުން ގޮވާލާނީ މިނިވަންކަން ލިބުމަށް ކަމަށެވެ.

އިރާނުގެ މިހާރުގެ ސަރުކާރަކީ "ޚުދުމުޚުތާރު" އަދި "ކޮރަޕްޓް" ސަރުކާރެއް ކަމަށާއި އަދި އިރާނުގެ މުޒާހަރާތައް ކުރިއަށްދާ ގޮތް އެމެރިކާ އިން ވަރަށް ގާތުން ބަލަމުންދާ ކަމަށް ވިދާޅުވެ އެމެރިކާގެ ރައީސް އަންގާރަ ދުވަހު އިރާނަށް ވަނީ ވަރަށް ވަރުގަދަ އިންޒާރެއް ދެއްވާފައެވެ. ރައީސް ޓްރަމްޕް ކުރެއްވި ޓްވީޓެއްގައި އެމަނިކުފާނު ވިދާޅުވީ "ޚުދުމުޚުތާރު އަދި ކޮރަޕްޓް ވެރިކަމާ ދެކޮޅަށް އެންމެ ފަހުން ރައްޔިތުން ނިކުމެއްޖެ" ކަމަށެވެ. އިރާނުގެ މުޒާހަރާތަކާ ގުޅޭ ގޮތުން ރައީސް ޓްރަމްޕް ހޯމަ ދުވަހު ވިދާޅުވީ އިރާނުން ދަނީ "ކޮންމެ ހަރުފަތަކުން ފެއިލްވަމުން ކަމަށާއި މިއީ އިރާނަށް ބަދަލު އަންނަންވީ ވަގުތު ކަމަށެވެ."

އިރާނުގައި ކުރަން ފެށި ސަރުކާރާ ދެކޮޅު މުޒާހަރާތައް ކުރަން ފަށާފައި ވަނީ ގައުމުގެ ކޮރަޕްޝަނުގެ ހާލަތާ ގުޅިގެންނާއި އަދި ދިރިއުޅުމުގެ ހާލަތު ދަށްވުމުގެ ސަބަބުންނެވެ. މިހާތަނަށް މިމުޒާހަރާތަކުގައި 21 މީހުން މަރުވެފައިވެއެވެ.

ތަކެއްޗާއި ޚިދުމަތުގެ އަގު ބޮޑުވުމުގެ މައްސަލައިގައި ފެށި މުޒާހަރާތައް ފުޅާވެ، ސިޔާސީ މުޒާހަރާތަކަކަށް ބަދަލުވެފައިވާއިރު، މުޒާހަރާގައި އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީގެ އިތުރުން ރައީސް ހަސަން ރޫހާނީގެ އިސްތިއުފާ އަށް ވެސް ދަނީ ގޮވަމުންނެވެ.