ކުރިއަށް އޮތް 2020 ވަނަ އަހަރު އޮންނަ ރިޔާސީ އިންތިޚާބު ކާމިޔާބުކުރަން ބޭނުން ނަމަ، އަންނަ ފެބްރުއަރީ މަހުގެ 10 ވަނަ ދުވަހު ބާއްވާ ލޯކަލް ކައުންސިލް އިންތިޚާބު ކާމިޔާބު ކުރަން ޖެހޭ ކަމަށް ލަންކާގެ ބޮޑުވަޒީރު ރަނިލް ވިކްރަމަ ސިންހަ ވިދާޅުވެއްޖެއެވެ.

ސަރުކާރަށް މި އިންތިޚާބުގެ މުހިއްމުކަމާ މެދު ރަނިލް ވާހަކަ ދައްކަވާފައި މި ވަނީ ލޯކަލް ކައުންސިލް އިންތިޚާބުގައި ވެރިކަންކުރާ ޔުނައިޓެޑް ނޭޝަނަލް ޕާޓީ (ޔޫއެންޕީ)ގެ ޓިކެޓްގައި ވާދަކުރައްވާ ކެންޑިޑޭޓުންނާ އެކު ޔޫއެންޕީގެ އޮފީހުގައި ބޭއްވި ބައްދަލުވުމެއްގައެވެ. މި ބައްދަލުވުމުގައި ބައިވެރިވެވަޑައިގެންނެވި ކެންޑިޑޭޓަކު ލަންކާގެ މީޑިއާއަށް މައުލޫމާތު ދެއްވަމުން ވިދާޅުވީ، ބޮޑުވަޒީރުގެ ވާހަކަފުޅުގައި އިންތިޚާބު ކާމިޔާބުކުރެއްވުމަށް ހިތްވަރުދެއްވައި، ސަރުކާރުން މި އިންތިޚާބު ކާމިޔާބުކުރުމުގެ މުހިއްމުކަމުގެ މައްޗަށް އަލިއަޅުއްވާލެއްވި ކަމަށެވެ. އަދި ކުރިއަށް އޮތްތަނުގައި ލޯކަލް ކައުންސިލްތަކަށް ސަރަހައްދީ ތަރައްޤީގައި ބައިވެރިވުމުގެ ފުރުސަތުދީ، ކައުންސިލްތަކުގެ ބާރުތައް އިތުރުކުރައްވާނެ ކަމަށް ރަނިލް ވިދާޅުވެއެވެ.

ފެބްރުއަރީ 10 ގައި އޮންނަ ލަންކާގެ ލޯކަލް ކައުންސިލް އިންތިޚާބުގެ ކަންކަން ޤާނޫނީ އިމުގެ ތެރެއިން ކުރިއަށް ގެންދިޔުމަށް ސަރުކާރަށް ކުރެވެން ހުރި ހުރިހާ މަސައްކަތެއް ކުރާނެކަމުގެ ޔަޤީންކަން ރަނިލް ވަނީ ދެއްވާފައެވެ. އިންތިޚާބު ކަވަރކުރުމުގައި މީޑިއާތަކުން ގެންގުޅެން ޖެހޭ މިންގަނޑުތަކާ ބެހޭ ގައިޑްލައިންގައި ސޮއެކުރެއްވުމަށް ފަހު ރަނިލް ވިދާޅުވީ މިއިންތިޚާބުގައި ކޮންމެ ދާއިރާއަކަށް ވެސް އެދާއިރާއެއް ތަމްސީލްކުރުމަށް ހޮވާ ކައުންސިލަރުން ހޮވުމުގެ ފުރިހަމަ މިނިވަންކަން ލިބޭނެ ކަމަށެވެ. އަދި އިންތިޚާބުގައި ވާދަކުރައްވާ ކެންޑިޑޭޓުންގެ 25 އިންސައްތައަކީ އަންހެނުން ކަމަށް ވެސް ބޮޑުވަޒީރު ފާހަގަކުރެއްވިއެވެ.

އަނެއްކޮޅުން ލަންކާގެ ކުރީގެ ރައީސް މަހިންދަ ރާޖަޕަކްސަގެ އާ ސިޔާސީ ޕާޓީ އާއި، އެޕާޓީއާ ގުޅިފައިވާ ޕާޓީތަކުން ވެސް މިހާރު ވަނީ އިންތިޚާބުގެ ކެމްޕޭން ލޯންޗްކޮށްފައެވެ. އިންތިޚާބު ލޯންޗްކުރުމަށް ސުގަތަދާސަ އިންޑޯ ސްޓޭޑިއަމްގައި ބޭއްވި އެއްވުމުގައި ރާޖަޕަކްސަ ވިދާޅުވީ އެމަނިކުފާނު ޤައުމު ހިންގެވިއިރު ލަންކާއަކީ އަމިއްލައަށް އުޅެވޭ ޤައުމެއް ކަމަށާއި، މިހާރު ހުރިހާ ކަމެއް ބޮއްސުންލާފައި ވާކަމަށެވެ.