މެކްސިކޯގެ އަމާޒަކީ ވޯލްޑް ކަޕް ހޯދުން: ޗިޗަރީތޯ

މެކްސިކޯގެ އަމާޒަކީ މިއަހަރު ރަޝިއާގައި އޮންނަ ފީފާ ވޯލްޑް ކަޕްގެ ތަށި ހޯދުން ކަމަށް ވެސްޓް ހަމް ޔުނައިޓެޑަށް ކުޅެމުން އަންނަ އެ ގައުމުގެ ފޯވާޑް ހަވިޔާ ހަނާންޑޭޒް (ޗިޗަރީތޯ) ބުނެފިއެވެ.

މެކްސިކޯއިން ވޯލްޑް ކަޕްގެ ޖާގައެއް ކަށަވަރުކުރީ އުތުރޔ އަދި މެދުތެރޭ އެމެރިކާގެ ކޮލިފައިން ގްރޫޕުގެ އެއްވަނަ ޓީމުގެ ގޮތުގައެވެ. ކޮލިފައިންގައި ކުޅުނު 10 މެޗުން އެ ޓީމު 21 ޕޮއިންޓް ހޯދިއިރު ކޮލިފައިންގައި ބަލިވެފައިވަނީ އެންމެ މެޗަކުންނެވެ. ފާއިތެވެދިޔަ އަހަރަކީ ގައުމީ ފެންވަރުގައި ޗިޗަރީތޯއަށް ކާމިޔާބު އަހަރެކެވެ. އެގޮތުން އޭނާވަނީ މެކްސިކޯގެ ގައުމީ ޓީމަށް 100 މެޗު ހަމަކޮށް އެ ގައުމަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ރެކޯޑު މުގުރާލާފައެވެ.

ވެސްޓް ހަމްގެ ރަސްމީ ވެބްސައިޓާއި ވާހަކަ ދައްކަމުން ޗިޗަރީތޯ ބުނެފައިވަނީ އަމާޒަކީ ހަމައެކަނި ކުއާޓާ ފައިނަލްގައި ކުޅުން ނޫން ކަމަށާއި އަމާޒަކީ މުބާރާތުގައި ދެވެން އޮތް އެންމެ ކުރިޔަކަށް ދިޔުން ކަމަށެވެ. ކޮންމެ ޓީމަކަށް ވެސް ފުރުސަތު އޮންނާނެ ކަމަށާއި ހަމައެގޮތަށް މެކްސިކޯގެ އަމާޒަކީ ވެސް ފައިނަލްގައި ވާދަކޮށް ވޯލްޑް ކަޕް ކާމިޔާބު ކުރުން ކަމަށް ޗިޗަރީތޯ ބުނެފައިވެއެވެ.

މީގެކުރިން ކުޅެވުނު ވޯލްޑް ކަޕްތަކުގައި މެކްސިކޯއަށް ކުއާޓާ ފައިނަލްއަށް ދަތުރު ކުރެވިފައިވަނީ ހަމައެކަނި 1970 ވަނަ އަހަރާއި 1986 ވަނަ އަހަރު އަމިއްލަ ގައުމުގައި ބޭއްވި ވޯލްޑް ކަޕްތަކުގައެވެ. ކުރިޔަށް ހުރި މަސްތަކަކީ މެކްސިކޯއަށް ވަރަށް މުހިންމު މަސްތަކައް ވާއިރު އެ ޓީމުން ވޯލްޑް ކަޕް ކާމިޔާބުކުރުމަށް ކުރަމުން އަންނަ މަސައްކަތުގައި ބްރެޒިލްއާ ދެކޮޅަށް ދެވަނަ ބުރުގައި ކުޅެން ޖެހުމަކީ ވެސް އެކަށީގެންވާ ކަމެކެވެ.

ޗިޗަރީތޯ ބުނީ ގްރޫޕް ސްޓޭޖް ފަހަނައަޅައި ދާނެ ޓީމުތައް ބުނަން ނޭނގޭ ކަމަށާއި އެހެން ނަމަވެސް ޖަރުމަނުން ގްރޫޕް ސްޓޭޖް ފަހަނައަޅައި ދާނެ ކަމަށެވެ. ޖަރުމަނަކީ މުބާރާތުގެ ފެވަރިޓެއް ކަމަށް ޗިޗަރީތޯ ބުނެފައިވާއިރު މެކްސިކޯ ހިމެނިފައިވާ ގްރޫޕުގައި ހިމެނޭ އެހެން ޓީމުތަކުގެ ތެރޭގައި ދެކުނު ކޮރެއާ އާއި އިޓަލީ ކަޓުވާލުމަށްފަހު މުބާރާތުން ޖާގަ ހޯދި ސްވިޑެން ހިމެނެއެވެ.

ޗިޗަރީތޯ ބުނީ ކުރިޔަށްއޮތް ހަމަސްދުވަހަކީ ވަރަށް މުހިންމު ދުވަސްތަކެއް ކަމަށާއި ރަހުމަތްތެރިކަމުގެ މެޗުތައް ކުޅުމަކީ ވަރަށް މުހިންމު ކަމެއް ކަމަށެވެ. އަދި މުބާރާތަށް ރަނގަޅަށް ތައްޔާރު ނުވެވިއްޖެނަމަ ބޭނުންވާ ނަތީޖާ ނުނެރެވޭ ކަމަށާއި އެހެންކަމުން ހުރިހާ ކުޅުންތެރިން ވެސް މުބާރާތަށް ފުރިހަމަޔަށް ތައްޔާރުވުމަށް ޗިޗަރީތޯ ވަނީ ބުނެފައެވެ.

ފިޓްނެސް ދަށްވުމުގެ ސަބަބުން ވެސްޓް ހަމްއަށް ބަދަލުވި ޗިޗަރީތޯއަށް އެ ޓީމުގެ ފުރަތަމަ އެގާރައިން ފުރުސަތު ލިބެމުން އަންނަނީ ވަރަށް މަދުންނެވެ. އޭނާ ބުނީ މިދިޔަ ސީޒަނަކީ ވަރަށް ކާމިޔާބު ސީޒަނެއް ކަމަށާއި އެހެން ނަމަވެސް މި ސީޒަނުގައި އަނިޔާއާ ކުރިމަތިވުމުގެ ސަބަބުން ބޭނުންވާ ވަރަށް ކުޅުމުގެ ފުރުސަތު ނުލިބޭ ކަމަށެވެ. އަދި މިކަމާއި ގުޅިގެން ވަރަށް ބޮޑަށް ހިތްހަމަނުޖެހިފައި ހުރި ކަމަށް ޗިޗަރީތޯ ބުނެފައިވެއެވެ.

މެކްސިކޯގެ ގައުމީ ޓީމަށް 100 މެޗު ކުޅެދީފައިވާ ޗިޗަރީތޯ ވަނީ އެ ޓީމަށް 49 ލަނޑު ޖަހައިދީފައެވެ. މެކްސިކޯގެ ގައުމީ ޓީމާއެކު 2011 ވަނަ އަހަރުގެ ކޮންކާކަފް ގޯލްޑް ކަޕް ކާމިޔާބުކުރި ޗިޗަރީތޯ ވަނީ އެ ޓީމާއެކު 2015 ވަނަ އަހަރު ކޮންކާކަފް ކަޕް ވެސް ކާމިޔާބުކޮށްފައެވެ.