އެމްޑީޕީ ބަލިކަށިކޮށްލަން ހީލަތްތެރި މަސައްކަތްތަކެއް އެބަ ކުރޭ: ހަސަން ލަތީފް
2 ޖެނުއަރީ 2018 | އަންގާރަ 16:21ހަސަން މި ގޮތަށް ޓްވީޓްކުރެއްވީ ޝާހިދާ ގުޅޭ ގޮތުން ދައުރުވަމުންދާ ވާހަކަތަކަށް އިޝާރަތް ކުރައްވައި
ްއެމްޑީޕީގެ ޗެއާޕާސަން ހަސަން ލަތީފް
އިދިކޮޅު އެންމެ ބޮޑު ޕާޓީ އެމްޑީޕީ ބަލަކަށިކޮށްލަން ހީލަތްތެރި މަސައްކަތްތަކެއް ބަޔަކު ކުރަމުންދާ ކަމަށް އެޕާޓީގެ ޗެއާޕާސަން ހަސަން ލަތީފް ވިދާޅުވިއެވެ.
އަންގާރަ ދުވަހު ހަސަން ލަތީފް ކުރެއްވި ޓްވީޓެއްގައި ވިދާޅުވީ އެމްޑީޕީގައި އިހްލާސްތެރިކަމާ އެކު މަސައްކަތް ކުރާ ބޭފުޅުންނާ ބެހޭ ގޮތުން ދޮގު ޚަބަރުތަށް ފަތުރަމުންދާ ކަމަށެވެ. އެކަން ކުށްވެރިކޮށް ހަސަން ކުރެއްވި ޓްވީޓްގައި ވިދާޅުވީ އެއީ ފިތުނައިގެ އަމަލެއް ކަމަށެވެ.
އެފަދަ ހީލަތްތެރި މަސައްކަތް ކުރައްވާ ފަރާތްތަކަށް ޖާގަ ނުދިނުމަށް ހަސަން ވަނީ ގޮވާލައްވާފައެވެ.
ހަސަން މި ގޮތަށް ޓްވީޓް ކުރެއްވީ ރައްޔިތުންގެ މަޖިލީހުގެ ކުރީގެ ރައީސް އަދި ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދާ ގުޅޭ ގޮތުން ސޯޝަލް މީޑިއާގައި ދައުރުވަމުންދާ ވާހަކަތަކަށް އިޝާރަތް ކުރައްވައެވެ.
ޝާހިދާ ގުޅޭ ގޮތުން ޓްވީޓާގައި ދައުރުވަމުންދާ ވާހަކަތައް ބުނާ ގޮތުގައި، އެމްޑީޕީ ޕްރައިމަރީގައި ވާދަކުރުމަށް ޝާހިދު ވަނީ ނިންމަވާފައެވެ. އަދި އެމްޑީޕީގެ ގައުމީ މަޖިލީހުގެ 15 މެމްބަރުން ޝާހިދަށް ބައިއަތު ހިފައިފާވާ ކަމަށާއި ރައީސް ނަޝީދު މިނިވަން ކުރުމަށް ކުރާ މަސައްކަތަށް ހުރަސްތައް ކުރިމަތިކުރަމުންދާ ކަމަށް ވެސް ދައުރުވަމުންދެއެވެ.
އެ ޓްވީޓަށް ރައްދުދެއްވަމުން ޝާހިދު ކުރެއްވި ޓްވީޓެއްގައި ވިދާޅުވީ، އެއީ ހަގީގަތެއް ނެތް ފިތުނައިގެ ވާހަކައެއް ކަމަށެވެ. އަދި ހުންނަވާނީ ސާބިތުކަމާއެކު ރައީސް ނަޝީދުއާއި އެމްޑީޕީއާއެކު ކަމަށްވެސް ޝާހިދު ވިދާޅުވެފައި ވެއެވެ.
ޝާހިދު ވިދާޅުވީ މާތް ﷲގެ ރަހްމަތްފުޅުން 2018 ވަނަ އަހަރުގެ ރިޔާސީ އިންތިހާބު ރައީސް ނަޝީދު ކާމިޔާބު ކުރައްވާނެ ކަމަށެވެ. އަދި އެމްޑީޕީގެ ސަފުތައް ރޫޅާލުމަށް ކުރާ މަސައްކަތް ވާނީ ނާކާމިޔާބު ކަމަށް ވެސް ޝާހިދު ވިދާޅުވެފައި ވެއެވެ.
ޓްވިޓަރގައި ފެތުރެމުންދާ ވާހަކަތަކާ ގުޅިގެން ޝާހިދު އިތުރަށް ވިދާޅުވީ މިފަދަ ކަންކަމަކީ އެމްޑީޕީގެ އިސް ސަފުތައް ރޫޅާލުމަށް ސަރުކާރުން ރާވާ ހިންގަމުންދާ ޒިންމާދާރުކަން ކުޑަ ހަޑިމުޑުދާރު ކަންތައްތަކެއް ކަމަށެވެ. އެމްޑީޕީ އާއި އެ ޕާޓީއަށް ސަޕޯޓްކުރާ ފަރާތްތަކުން އެވާހަކަތަކުގައި ނުޖެހުމަށް ޝާހިދު ގޮވައިލެއްވިއެވެ.
