ޔޫރަޕްގައި ކުޅޭ ބްރެޒިލްގެ އެންމެ މޮޅު ކުޅުންތެރިޔާ އަށް ދޭ ސަމްބާ ޑޯ އެވޯޑް ފްރާންސްގެ ޕެރިސް ސެއިންޓް ޖަމައިން (ޕީއެސްޖީ) އަށް ކުޅޭ ބްރެޒިލްގެ ތަރި ނޭމާ ހޯދައިފިއެވެ.

ޔޫރަޕްގައި ކުޅޭ ބްރެޒިލްގެ ކުޅުންތެރިންގެ ތެރެއިން މޮޅު ކުޅުންތެރިޔާގެ މަގާމް ހޮވާ މިއެވޯޑް ނޭމާ ކާމިޔާބު ކުރީ، މިދިޔަ އަހަރު މިއެވޯޑް ހޯދި ލިވަޕޫލްގެ މިޑްފީލްޑަރ ފިލީޕޭ ކޫޓީނިއޯގެ މައްޗަށް ކުރި ހޯދައިގެންނެވެ.

މިއީ ނޭމާގެ ކެރިއަރުގައި، ހަތަރު އަހަރުގެ ތެރޭގައި ސަމްބާ ޑޯ އެވޯޑް ހޯދި ތިން ވަނަ ފަހަރެވެ.

ސަޕޯޓަރުންނާއި ނޫސްވެރިން އަދި ހޮވާލެވިފައިވާ ކުރީގެ ކުޅުންތެރިންގެ ވޯޓުން ހޮވާ މިއެވޯޑް ނޭމާ މީގެ ކުރިން ކާމިޔާބު ކޮށްފައި ވަނީ 2014 އަދި 2015 ވަނަ އަހަރު ބާސެލޯނާގެ ކުޅުންތެރިޔެއްގެ ގޮތުގައެވެ.

ދުނިޔޭގެ ރެކޯޑް އަދަދެއް ކަމަށްވާ 222 މިލިއަން ޔޫރޯގެ އަގަކަށް މިދިޔަ އޯގަސްޓް މަހު ޕީއެސްޖީ އަށް ބަދަލުވި ނޭމާ ވަނީ، މިހާތަނަށް ޕީއެސްޖީ އަށް ކުޅުނު 20 މެޗުގައި 17 ލަނޑު ޖަހާފައެވެ.

ނޭމާ ފިޔަވައި މިއެވޯޑް ތިން ފަހަރު ހޯދާފައިވާ ހަމައެކަނި ކުޅުންތެރިޔަކީ އޭނާއާ އެކު ޕީއެސްޖީ އަށް ކުޅޭ ބްރެޒިލްގެ ޑިފެންޑަރު ތިއާގޯ ސިލްވާއެވެ. އެގޮތުން 2008 ވަނަ އަހަރު ތައާރަފް ކުރި މިއެވޯޑް އެންމެ ފުރަތަމަ ހޯދާފައި ވަނީ މިހާރު ރިޓަޔަރ ކޮށްފައިވާ ބްރެޒިލްގެ މިޑްފީލްޑަރ ކަކާއެވެ.

ފަންސާސް ހާހެއްހާ މީހުން ވޯޓު ދިން 2017 ވަނަ އަހަރުގެ ސަމްބާ ޑޯ އެވޯޑް ނޭމާ ހޯދީ 27.7 އިންސައްތައިގެ ވޯޓާއެކުގައެވެ. އޭނާއާ އެންމެ ވާދަކުރި ފިލިޕޭ ކޫޓީނިއޯ އަށް ލިބުނީ 16.64 އިންސައްތަ ވޯޓެވެ. ތިންވަނަ އަށް އެންމެ ގިނަ ވޯޓު ލިބިފައި ވަނީ ރެއާލް މެޑްރިޑްގެ ޑިފެންޑަރ މާސެލޯއެވެ. އޭނާ އަށް 14.43 އިންސައްތަ ވޯޓު ލިބިފައިވެއެވެ. މިތިން ކުޅުންތެރިންގެ އިތުރުން ދެން އެންމެ ގިނަ ވޯޓު ހޯދީ ބާސެލޯނާގެ މިޑްފީލްޑަރ ޕައުލީނިއޯ، ރެއާލް މެޑްރިޑްގެ މިޑްފީލްޑަރ ކަސެމީރޯ އަދި މެންޗެސްޓަރ ސިޓީގެ ފޯވާޑް ގެބްރިއެލް ޖީސަސްއެވެ.

މި އެވޯޑް ނޭމާއާ ހަވާލު ކުރާނީ ފެބްރުއަރީ މަހު ފްރާންސްގެ ޕެރިހުގައި ބާއްވާ ހަފްލާއެއްގައެވެ.