އޮސްޓްރޭލިއާގައި 9 މިލިއަން ޑޮލަރުގެ މިސްކިތެއް އަޅަމުންދާކަން އެނގޭތަ؟

އޮސްޓްރޭލިއާގެ ވެރިރަށް ސިޑްނީގައި 9 މިލިއަން ޑޮލަރު ޚަރަދު ކޮށްގެން، 99 ގުއްބު ހިމެނޭ މިސްކިތެއް ބިނާ ކުރަމުން އެބަދެއެވެ.

މިއަހަރުގެ މެއި މަހު، ރޯދަ މަހާއި ދިމާކޮށް ހުޅުވުމަށް މަސައްކަތް ކުރާ މި މިސްކިތް ޑިޒައިން ކުރީ ގްރީކް އޯތޮޑޮކްސް ނަޞާރާއެއް ކަމަށްވާ އެންޖެލޯ ކަންޑަލެޕާސް ކިޔާ މީހެކެވެ. އޭނާ ބުނީ އޭނާގެ ބޭނުމަކީ މިސްކިތަށް މީހުން ތައުރީފްކުރުން ނޫން ކަމަށާއި، އެމިސްކިތުގެ ސަބަބުން ސިޑްނީގައި އެކި ދީންތަކުގެ މީހުންގެ ގުޅުން ބަދަހިވުން ކަމަށެވެ. އަދި މިސްކިތުގެ ސަބަބުން އެކި ދީންތަކުގެ މީހުންގެ ގުޅުން ބަދަހިވެގެންދާނެ ކަމަށް އުއްމީދު ކުރާ ކަމަށް އޭނާ ބުންޏެވެ. އަދި މިސްކިތް ޑިޒައިން ކުރުމަށް އެންމެ ފުރަތަމަ ހުށަހެޅުމުން ކޮންމެވެސް ވަރަކަށް ފަސްޖެހުނު ކަމަށް އޭނާ ބުންޏެވެ.

"މިސްކިތުގެ ގޯތި ތެރެ އޮންނަނީ އެންމެންނަށް ބޭނުންކުރެވޭ ގޮތަށް. މިސްކިތުގެ މައި ދޮރު ހުންނާނީ މައި މަގަށް ވާގޮތަށް. އެހެންވީމާ ހުރިހާ އެންމެންނަށް މިސްކިތަށް ވަނުމުގެ ފުރުސަތު އޮންނާނެ،" އެންޖެލޯ ބުންޏެވެ.

ސިޑްނީ އާކިޓެކްޗަރ ފެއަރގެ ތެރެއިން މިދިޔަ ސެޕްޓެމްބަރު މަހު 'މީޓް ދަ އޮސީ މޮސްކް'ގެ ނަމުގައި އާއްމުންނަށް މިސްކިތް ދައްކާލުމަށް ހުޅުވާލާފައިވެއެވެ. މި ޙަރަކާތުގައި އެސަރަހައްދުގެ މުސްލިމުން ވަނީ އެ މިސްކިތް ބިނާ ކުރުމަށް 9 މިލިއަން ޑޮލަރު ހޯދުމަށް ކުރި މަސައްކަތާއި، އަދި އިސްލާމް ދީނާއި ބެހޭ ގޮތުން މައުލޫމާތު ދީފައެވެ.

އޮސްޓްރޭލިއާގައި މިސްކިތްތައް ބިނާކުރުމަށް ހުއްދަ ހޯދުން ވެފައިވަނީ ފަހަކަށް އައިސް އުނދަގޫ ކަމަކަށެވެ. ދާދި ފަހުން އެޤައުމުގެ ގޯލްޑް ކޯސްޓްގައި އިމާރާތްކުރަން އުޅުނު މިސްކިތެއް ވެސް 'މާބޮޑު'ކަމަށް ބުނެ ހުއްދަ ދިނުމަށް ސަރުކާރުން ވަނީ ދެކޮޅު ހަދާފައެވެ.

އެހެންކަމުން ސިޑްނީގެ މި މިސްކިތް ބިނާކުރާ ސަރަހައްދުގެ މުސްލިމުން މި މިސްކިތް ބިނާކުރަނީ އާޓް ވަރަށް ބޮޑަށް ފެންނަ ގޮތަށެވެ. އަދި އިސްލާމީވަންތަ އާޓްގެ އިތުރުން މި މިސްކިތުގައި ބޭނުން ކޮށްފައިވާ ބޮކިތަކަކީ އެންމެ އަގުބޮޑެތި އާޓް ގެލެރީތަކުގައި ބޭނުންކުރާ ޒާތުގެ ބޮކިތަކެވެ.

މިމިސްކިތުގައި މައި ގުއްބުގެ އިތުރުން، އިތުރު 99 ގުއްބު ހުރެއެވެ. އަދި މި ގުއްބުތަކުގައި ﷲގެ 99 އިސްމުފުޅު ކަނޑާ ނެގުމަށް ތުރުކީވިލާތުން އަތުލިޔުންތެރިން އަންނާނެއެވެ.

މި މިސްކިތް ބިނާކުރަން އެންމެ ފުރަތަމަ ހުށަހެޅީ 300 އަހަރުވަންދެން މިސްކިތް ދެމި ހުންނާނެ ފަދަ ގޮތަކަށެވެ. އެހެން ނަމަވެސް އެންޖެލޯ ބުނީ އޭނާ މިސްކިތް ޑިޒައިން ކުރީ 1000 އަހަރު ވަންދެން އެތަން ދެމިހުންނާނެ ގޮތަށް ކަމަށެވެ. މި މިސްކިތުގައި އޮސްޓްރޭލިއާގެ އެހެން މިސްކިތްތަކުން ފެންނަ ޢަރަބި އަދި އުސްމާނީ ޑިޒައިންތަކެއް މިމިސްކިތުން ނުފެނެއެވެ.

އޮސްޓްރޭލިއާގައި މިހާރުވެސް ގާތްގަނޑަކަށް 340 މިސްކިތް އެބަހުއްޓެވެ. އޮސްޓްރޭލިއާގެ އާބާދީގެ 3 އިންސައްތައަކީ މުސްލިމުންނެވެ.