ބެންކޮކް އެއަރޕޯޓުގައި 2 މަސް ދުވަހަށް ވުރެ ދިގު މުއްދަތަކަށް ތާށިވެފައި ތިބި އާއިލާ އެއްގެ ވާހަކަ ފެންމަތިވެއްޖެ!
އާއިލާ އަށް ކާން ދެނީ އެއަރލައިން ތަކުން
ބެންކޮކް އެއަރޕޯޓުގައި ތާށިވެފައި ތިބި ޒިމްބާބުވޭގެ އާއިލާ އާ ތައި އޮފިޝަލުން ވާހަކަ ދައްކަނީ
ބެންކޮކް އެއަރޕޯޓުގައި ދެ މަސް ދުވަހަށް ވުރެ ދިގު މުއްދަތަކަށް ތާށިވެފައި ތިބި ޒިމްބާބުވޭގެ އާއިލާއެއްގެ ވާހަކަ ފެންމަތި ވެއްޖެއެވެ.
ދެ މަސް ދުވަހުގެ މުއްދަތައް މި އާއިލާ ބެންކޮކްގެ މައި އެއަރޕޯޓުގައި ތާށިވެފައި ތިބިކަން ތައިލޭންޑްގެ އިމިގްރޭޝަން ފުލުހުން ހާމަކުރީ ބުރާސްފަތި ދުވަހުއެވެ. ރަސްމީ ފަރާތަކުން މި އާއިލާގެ ވާހަކަ އާއްމު މި ކުރީ އެ އާއިލާގެ ވީޑިއޯ އެއް ސޯޝަލް މީޑިއާގައި ވައިރަލް ވެފައިވާ ދަނޑިވަޅެއްގައި ކަން ފާހަގަ ކުރެވެއެވެ.
ހަތަރު ބޮޑެތި މީހުންނާއި ކުޑަ ހަތަރު ކުދިންގެ މައްޗަށް އެކުލެވިފައިވާ މި އާއިލާ ބެންކޮކަށް އައީ ޗުއްޓީ ހޭދަކުރުމަށެވެ. އެއަރޕޯޓުގައި ތާށިވާ ގޮތް ދިމާވީ ޗުއްޓީ ނިންމާލުމަށްފަހު ފުރަން ދިޔަ ހިސާބުން އޮކްޓޯބަރު މަހުގެ ތެރޭގައެވެ.
އެއަރޕޯޓުގައި ތާށިވީ، އެމީހުން ދާން އުޅުނު ގައުމަށް ވިސާ ނެތުމުން އެއަރލައިނުން ބޯޓަށް އެރުވުމަށް ދެކޮޅު ހެދުމުންނެވެ. ނުރައްކާވެދާނެ ކަމަށް ބުނެ އެމީހުން އެނބުރި އަމިއްލަ ގައުމު، ޒިމްބާބުވޭ އަށް ދާކަށް ބޭނުން ނުވުމާއި، ޗުއްޓީ ވިސާގެ މުއްދަތު ހަމަވެފައިވާތީ އެމީހުންނަށް އެނބުރި ތައިލެންޑަށް ވަނުމަށް ހުއްދަ ނުލިބުމުންނެވެ.
މި އާއިލާގެ ވާހަކަ އާއްމުވީ ކްރިސްމަސް ދުވަހު ތައިލޭންޑްގެ މީހަކު އެ އާއިލާގެ ކުޑަ ދެ ކުދިންނަށް ހަދިޔާއެއް ދިން ވީޑިއޯ ފޭސްބުކް ގައި ހާމަ ކުރުމުންނެވެ. އެއާ އެކު މި ކަމަށް މީހުންގެ ޝައުގުވެރިކަން އުފެދި އެހާ ދުވަހު އެއަރޕޯޓުގައި އާއިލާ އަކުން ދިރި އުޅުނީ ކިހިނެއްތޯ މީހުން ސުވާލު ކުރުމާއެކު، 2004 ވަނަ އަހަރު ނުކުތް ޓޮމް ހޭންކްސްގެ "ދަ ޓާމިނަލް" ފިލްމާ މިހާދިސާ އާ މީހުން ވަނީ ގުޅުވާފައެވެ. އެ ފިލްމުގައި ފެންނަނީ ނިއު ޔޯކު އެއަރޕޯޓުގެ ޑިޕާޗަރ ޓާމިނަލްގައި ޓޮމް ހޭންކްސް ތާށިވުމުން އޭނާ ދިރިއުޅެމުން ދިޔަ ގޮތެވެ.
ތައިލޭންޑްގެ އިމިގްރޭޝަން ފުލުހުން ބުނެފައިވަނީ ޓޫރިސްޓް ވިސާގައި މި އާއިލާ ތައިލޭންޑަށް އެތެރެވެފައިވަނީ މި އަހަރުގެ މެއި މަހުގައި ކަމަށެވެ.
އޮކްޓޯބަރު މަހުގެ 23 ވަނަ ދުވަހު އެމީހުން އުޅުނީ ޔޫކްރޭންގެ މަގުން ސްޕޭން އަށް ދަތުރު ކުރުމަށެވެ. ނަމަވެސް ސްޕޭން އަށް ދިއުމަށް އެމީހުންގެ އަތުގައި ވިސާ ނެތުމުން އެއަރލައިން އިން އެ އާއިލާ ބޯޓަށް އަރުވަން ދެކޮޅު ހެދީއެވެ.
ތައިލޭންޑަކީ ރެފިއުޖީން ބަލައިގަންނަ ގައުމަކަށް ނުވުމާއެކު ރެފިއުޖީންގެ ގޮތުގައި ތައިލެންޑަށް އެ އާއިލާ އިން އެތެރެވެވޭނެ ގޮތެއް ނެތް ނަމަވެސް، ތައިލެނޑްގައި ހުންނަ ޔޫއެން ރެފިއުޖީ އޭޖެންސީގެ ތަރުޖަމާނު ވިވިއަން ތާން ބުނެފައިވަނީ އެމީހުންނަށް ހެދޭނެ ގޮތްތައް ބަލަމުން ގެންދާ ކަމަށެވެ.
އެއަރޕޯޓުން އެމީހުންނަށް ކާބޯތަކެތި ފޯރު ކޮށްދެނީ އެއަރލައިން ތަކުން ކަމަށް ހާމަކޮށްފައިވެއެވެ.
